పోతన తెలుగు భాగవతము

పోతన తెలుగు భాగవతము

పంచమ స్కంధః : పంచదశోఽధ్యాయః - 15

5-15-1
శ్రీశుక ఉవాచ
భరతస్యాత్మజః సుమతిర్నామాభిహితో
యము హ వావ కేచిత్పాఖండిన ఋషభ-
పదవీమనువర్తమానం చానార్యా అవేద-
సమామ్నాతాం దేవతాం స్వమనీషయా పాపీయస్యా
కలౌ కల్పయిష్యంతి

5-15-2
తస్మాద్వృద్ధసేనాయాం దేవతాజిన్నామ పుత్రోఽభవత్

5-15-3
అథాసుర్యాం తత్తనయో దేవద్యుమ్నస్తతో ధేనుమత్యాం
సుతః పరమేష్ఠీ తస్య సువర్చలాయాం ప్రతీహ
ఉపజాతః

5-15-4
య ఆత్మవిద్యామాఖ్యాయ స్వయం సంశుద్ధో
మహాపురుషమనుసస్మార

5-15-5
ప్రతీహాత్సువర్చలాయాం ప్రతిహర్త్రాదయస్త్రయ
ఆసన్నిజ్యాకోవిదాః సూనవః ప్రతిహర్తుః
స్తుత్యామజభూమానావజనిషాతాం

5-15-6
భూమ్న ఋషికుల్యాయాముద్గీథస్తతః ప్రస్తావో
దేవకుల్యాయాం ప్రస్తావాన్నియుత్సాయాం హృదయజ
ఆసీద్విభుర్విభో రత్యాం చ పృథుషేణస్తస్మా-
న్నక్త ఆకూత్యాం జజ్ఞే నక్తాద్ద్రుతిపుత్రో గయో
రాజర్షిప్రవర ఉదారశ్రవా అజాయత . సాక్షా-
ద్భగవతో విష్ణోర్జగద్రిరక్షిషయా గృహీత-
సత్త్వస్య కలాత్మవత్త్వాది లక్షణేన
మహాపురుషతాం ప్రాప్తః

5-15-7
స వై స్వధర్మేణ ప్రజాపాలనపోషణప్రీణనో-
పలాలనానుశాసనలక్షణేనేజ్యాదినా చ
భగవతి మహాపురుషే పరావరే బ్రహ్మణి
సర్వాత్మనార్పితపరమార్థలక్షణేన బ్రహ్మవి-
చ్చరణానుసేవయాపాదితభగవద్భక్తియోగేన
చాభీక్ష్ణశః పరిభావితాతిశుద్ధమతి-
రుపరతానాత్మ్య ఆత్మని స్వయముపలభ్య-
మానబ్రహ్మాత్మానుభవోఽపి నిరభిమాన
ఏవావనిమజూగుపత్

5-15-8
తస్యేమాం గాథాం పాండవేయ పురావిద ఉపగాయంతి

5-15-9
గయం నృపః కః ప్రతియాతి కర్మభి-
ర్యజ్వాభిమానీ బహువిద్ధర్మగోప్తా .
సమాగతశ్రీః సదసస్పతిః సతాం
సత్సేవకోఽన్యో భగవత్కలామృతే

5-15-10
యమభ్యషించన్ పరయా ముదా సతీః
సత్యాశిషో దక్షకన్యాః సరిద్భిః .
యస్య ప్రజానాం దుదుహే ధరాశిషో
నిరాశిషో గుణవత్సస్నుతోధాః

5-15-11
ఛందాంస్యకామస్య చ యస్య కామాన్
దుదూహురాజహ్రురథో బలిం నృపాః .
ప్రత్యంచితా యుధి ధర్మేణ విప్రా
యదాశిషాం షష్ఠమంశం పరేత్య

5-15-12
యస్యాధ్వరే భగవానధ్వరాత్మా
మఘోని మాద్యత్యురుసోమపీథే .
శ్రద్ధా విశుద్ధాచలభక్తియోగ-
సమర్పితేజ్యాఫలమాజహార

5-15-13
యత్ప్రీణనాద్బర్హిషి దేవతిర్యఙ్-
మనుష్యవీరుత్తృణమావిరించాత్ .
ప్రీయేత సద్యః స హ విశ్వజీవః
ప్రీతః స్వయం ప్రీతిమగాద్గయస్య

5-15-14
గయాద్గయంత్యాం చిత్రరథః సుగతిరవరోధన
ఇతి త్రయః పుత్రా బభూవుశ్చిత్రరథాదూర్ణాయాం
సమ్రాడజనిష్ట

5-15-15
తత ఉత్కలాయాం మరీచిర్మరీచేర్బిందుమత్యాం
బిందుమానుదపద్యత తస్మాత్సరఘాయాం
మధుర్నామాభవన్మధోః సుమనసి వీరవ్రత-
స్తతో భోజాయాం మంథుప్రమంథూ జజ్ఞాతే మంథోః
సత్యాయాం భౌవనస్తతో దూషణాయాం త్వష్టాజనిష్ట
త్వష్టుర్విరోచనాయాం విరజో విరజస్య శతజి-
త్ప్రవరం పుత్రశతం కన్యా చ విషూచ్యాం కిల
జాతం

5-15-16
తత్రాయం శ్లోకః
ప్రైయవ్రతం వంశమిమం విరజశ్చరమోద్భవః .
అకరోదత్యలం కీర్త్యా విష్ణుః సురగణం యథా

5-15-17
ఇతి శ్రీమద్భాగవతే మహాపురాణే పారమహంస్యాం సంహితాయాం
పంచమస్కంధే ప్రియవ్రతవంశానుకీర్తనం నామ పంచదశోఽధ్యాయః