పంచమ స్కంధః : అష్టాదశోఽధ్యాయః - 18
5-18-1
శ్రీశుక ఉవాచ
తథా చ భద్రశ్రవా నామ ధర్మసుతస్తత్కులపతయః
పురుషా భద్రాశ్వవర్షే సాక్షాద్భగవతో వాసుదేవస్య
ప్రియాం తనుం ధర్మమయీం హయశీర్షాభిధానాం పరమేణ
సమాధినా సన్నిధాప్యేదమభిగృణంత ఉపధావంతి
5-18-2
భద్రశ్రవస ఊచుః
ఓం నమో భగవతే ధర్మాయాత్మవిశోధనాయ నమ ఇతి
5-18-3
అహో విచిత్రం భగవద్విచేష్టితం
ఘ్నంతం జనోఽయం హి మిషన్న పశ్యతి .
ధ్యాయన్నసద్యర్హి వికర్మ సేవితుం
నిర్హృత్య పుత్రం పితరం జిజీవిషతి
5-18-4
వదంతి విశ్వం కవయః స్మ నశ్వరం
పశ్యంతి చాధ్యాత్మవిదో విపశ్చితః .
తథాపి ముహ్యంతి తవాజ మాయయా
సువిస్మితం కృత్యమజం నతోఽస్మి తం
5-18-5
విశ్వోద్భవస్థాననిరోధకర్మ తే
హ్యకర్తురంగీకృతమప్యపావృతః .
యుక్తం న చిత్రం త్వయి కార్యకారణే
సర్వాత్మని వ్యతిరిక్తే చ వస్తుతః
5-18-6
వేదాన్ యుగాంతే తమసా తిరస్కృతాన్
రసాతలాద్యో నృతురంగవిగ్రహః .
ప్రత్యాదదే వై కవయేఽభియాచతే
తస్మై నమస్తేఽవితథేహితాయ ఇతి
5-18-7
హరివర్షే చాపి భగవాన్ నరహరిరూపేణాస్తే
తద్రూపగ్రహణనిమిత్తముత్తరత్రాభిధాస్యే తద్దయితం
రూపం మహాపురుషగుణభాజనో మహాభాగవతో
దైత్యదానవకులతీర్థీకరణశీలాచరితః
ప్రహ్లాదోఽవ్యవధానానన్యభక్తియోగేన సహ
తద్వర్షపురుషైరుపాస్తే ఇదం చోదాహరతి
5-18-8
ఓం నమో భగవతే నరసింహాయ నమస్తేజస్తేజసే
ఆవిరావిర్భవ వజ్రనఖ వజ్రదంష్ట్ర కర్మాశయాన్
రంధయ రంధయ తమో గ్రస గ్రస ఓం స్వాహా
అభయమభయమాత్మని భూయిష్ఠా ఓం క్ష్రౌం
5-18-9
స్వస్త్యస్తు విశ్వస్య ఖలః ప్రసీదతాం
ధ్యాయంతు భూతాని శివం మిథో ధియా .
మనశ్చ భద్రం భజతాదధోక్షజే
ఆవేశ్యతాం నో మతిరప్యహైతుకీ
5-18-10
మాగారదారాత్మజవిత్తబంధుషు
సంగో యది స్యాద్భగవత్ప్రియేషు నః .
యః ప్రాణవృత్త్యా పరితుష్ట ఆత్మవాన్
సిద్ధ్యత్యదూరాన్న తథేంద్రియప్రియః
5-18-11
యత్సంగలబ్ధం నిజవీర్యవైభవం
తీర్థం ముహుః సంస్పృశతాం హి మానసం .
హరత్యజోఽన్తఃశ్రుతిభిర్గతోఽఙ్గజం
కో వై న సేవేత ముకుందవిక్రమం
5-18-12
యస్యాస్తి భక్తిర్భగవత్యకించనా
సర్వైర్గుణైస్తత్ర సమాసతే సురాః .
హరావభక్తస్య కుతో మహద్గుణా
మనోరథేనాసతి ధావతో బహిః
5-18-13
హరిర్హి సాక్షాద్భగవాన్ శరీరిణామాత్మా
ఝషాణామివ తోయమీప్సితం .
హిత్వా మహాంస్తం యది సజ్జతే గృహే
తదా మహత్త్వం వయసా దంపతీనాం
5-18-14
తస్మాద్రజోరాగవిషాదమన్యు-
మానస్పృహాభయదైన్యాధిమూలం .
హిత్వా గృహం సంసృతిచక్రవాలం
నృసింహపాదం భజతాకుతోభయమితి
5-18-15
కేతుమాలేఽపి భగవాన్ కామదేవస్వరూపేణ
లక్ష్మ్యాః ప్రియచికీర్షయా ప్రజాపతేర్దుహితౄణాం
పుత్రాణాం తద్వర్షపతీనాం పురుషాయుషాహోరాత్ర-
పరిసంఖ్యానానాం యాసాం గర్భా మహాపురుష-
మహాస్త్రతేజసోద్వేజితమనసాం విధ్వస్తా
వ్యసవః సంవత్సరాంతే వినిపతంతి
5-18-16
అతీవ సులలితగతివిలాసవిలసిత-
రుచిరహాసలేశావలోకలీలయా కించి-
దుత్తంభితసుందరభ్రూమండలసుభగవదనా-
రవిందశ్రియా రమాం రమయన్నింద్రియాణి రమయతే
5-18-17
తద్భగవతో మాయామయం రూపం పరమసమాధి-
యోగేన రమాదేవీ సంవత్సరస్య రాత్రిషు
ప్రజాపతేర్దుహితృభిరుపేతాహఃసు చ తద్భర్తృభి-
రుపాస్తే ఇదం చోదాహరతి
5-18-18
ఓం హ్రాం హ్రీం హ్రూం ఓం నమో భగవతే హృషీకేశాయ
సర్వగుణవిశేషైర్విలక్షితాత్మనే ఆకూతీనాం
చిత్తీనాం చేతసాం విశేషాణాం చాధిపతయే
షోడశకలాయ చ్ఛందోమయాయాన్నమయాయా-
మృతమయాయ సర్వమయాయ సహసే ఓజసే
బలాయ కాంతాయ కామాయ నమస్తే
ఉభయత్ర భూయాత్
5-18-19
స్త్రియో వ్రతైస్త్వా హృషీకేశ్వరం స్వతో
హ్యారాధ్య లోకే పతిమాశాసతేఽన్యం .
తాసాం న తే వై పరిపాంత్యపత్యం
ప్రియం ధనాయూంషి యతోఽస్వతంత్రాః
5-18-20
స వై పతిః స్యాదకుతోభయః స్వయం
సమంతతః పాతి భయాతురం జనం .
స ఏక ఏవేతరథా మిథో భయం
నైవాత్మలాభాదధి మన్యతే పరం
5-18-21
యా తస్య తే పాదసరోరుహార్హణం
నికామయేత్సాఖిలకామలంపటా .
తదేవ రాసీప్సితమీప్సితోఽర్చితో
యద్భగ్నయాచ్ఞా భగవన్ ప్రతప్యతే
5-18-22
మత్ప్రాప్తయేఽజేశసురాసురాదయస్తప్యంత
ఉగ్రం తప ఐంద్రియే ధియః .
ఋతే భవత్పాదపరాయణాన్న మాం
విందంత్యహం త్వద్ధృదయా యతోఽజిత
5-18-23
స త్వం మమాప్యచ్యుత శీర్ష్ణి వందితం
కరాంబుజం యత్త్వదధాయి సాత్వతాం .
బిభర్షి మాం లక్ష్మ వరేణ్య మాయయా
క ఈశ్వరస్యేహితమూహితుం విభురితి
5-18-24
రమ్యకే చ భగవతః ప్రియతమం మాత్స్య-
మవతారరూపం తద్వర్షపురుషస్య మనోః
ప్రాక్ప్రదర్శితం స ఇదానీమపి
మహతా భక్తియోగేనారాధయతీదం చోదాహరతి
5-18-25
ఓం నమో భగవతే ముఖ్యతమాయ నమః
సత్త్వాయ ప్రాణాయౌజసే సహసే బలాయ
మహామత్స్యాయ నమ ఇతి
5-18-26
అంతర్బహిశ్చాఖిలలోకపాలకై-
రదృష్టరూపో విచరస్యురుస్వనః .
స ఈశ్వరస్త్వం య ఇదం వశేఽనయన్నామ్నా
యథా దారుమయీం నరః స్త్రియం
5-18-27
యం లోకపాలాః కిల మత్సరజ్వరా
హిత్వా యతంతోఽపి పృథక్సమేత్య చ .
పాతుం న శేకుర్ద్విపదశ్చతుష్పదః
సరీసృపం స్థాణు యదత్ర దృశ్యతే
5-18-28
భవాన్ యుగాంతార్ణవ ఊర్మిమాలిని
క్షోణీమిమామోషధివీరుధాం నిధిం .
మయా సహోరుక్రమతేజ ఓజసా తస్మై
జగత్ప్రాణగణాత్మనే నమ ఇతి
5-18-29
హిరణ్మయేఽపి భగవాన్ నివసతి కూర్మతనుం
బిభ్రాణస్తస్య తత్ప్రియతమాం తనుమర్యమా సహ
వర్షపురుషైః పితృగణాధిపతిరుపధావతి
మంత్రమిమం చానుజపతి
5-18-30
ఓం నమో భగవతే అకూపారాయ సర్వసత్త్వగుణ-
విశేషణాయానుపలక్షితస్థానాయ నమో వర్ష్మణే
నమో భూమ్నే నమో నమోఽవస్థానాయ నమస్తే
5-18-31
యద్రూపమేతన్నిజమాయయార్పిత-
మర్థస్వరూపం బహురూపరూపితం .
సంఖ్యా న యస్యాస్త్యయథోపలంభనాత్తస్మై
నమస్తేఽవ్యపదేశరూపిణే
5-18-32
జరాయుజం స్వేదజమండజోద్భిదం
చరాచరం దేవర్షిపితృభూతమైంద్రియం .
ద్యౌః ఖం క్షితిః శైలసరిత్సముద్ర-
ద్వీపగ్రహర్క్షేత్యభిధేయ ఏకః
5-18-33
యస్మిన్నసంఖ్యేయవిశేషనామరూపాకృతౌ
కవిభిః కల్పితేయం .
సంఖ్యా యయా తత్త్వదృశాపనీయతే
తస్మై నమః సాంఖ్యనిదర్శనాయ తే ఇతి
5-18-34
ఉత్తరేషు చ కురుషు భగవాన్ యజ్ఞపురుషః
కృతవరాహరూప ఆస్తే తం తు దేవీ హైషా భూః
సహ కురుభిరస్ఖలితభక్తియోగేనోపధావతి
ఇమాం చ పరమాముపనిషదమావర్తయతి
5-18-35
ఓం నమో భగవతే మంత్రతత్త్వలింగాయ
యజ్ఞక్రతవే మహాధ్వరావయవాయ మహాపురుషాయ
నమః కర్మశుక్లాయ త్రియుగాయ నమస్తే
5-18-36
యస్య స్వరూపం కవయో విపశ్చితో
గుణేషు దారుష్వివ జాతవేదసం .
మథ్నంతి మథ్నా మనసా దిదృక్షవో
గూఢం క్రియార్థైర్నమ ఈరితాత్మనే
5-18-37
ద్రవ్యక్రియాహేత్వయనేశకర్తృభి-
ర్మాయాగుణైర్వస్తునిరీక్షితాత్మనే .
అన్వీక్షయాంగాతిశయాత్మబుద్ధిభి-
ర్నిరస్తమాయాకృతయే నమో నమః
5-18-38
కరోతి విశ్వస్థితిసంయమోదయం
యస్యేప్సితం నేప్సితమీక్షితుర్గుణైః .
మాయా యథాయో భ్రమతే తదాశ్రయం
గ్రావ్ణో నమస్తే గుణకర్మసాక్షిణే
5-18-39
ప్రమథ్య దైత్యం ప్రతివారణం మృధే
యో మాం రసాయా జగదాదిసూకరః .
కృత్వాగ్రదంష్ట్రే నిరగాదుదన్వతః
క్రీడన్నివేభః ప్రణతాస్మి తం విభుమితి
5-18-40
ఇతి శ్రీమద్భాగవతే మహాపురాణే పారమహంస్యాం సంహితాయాం
పంచమస్కంధే భువనకోశవర్ణనం నామాష్టాదశోఽధ్యాయః