నవమ స్కంధః : వింశోఽధ్యాయః - 20
9-20-1
శ్రీశుక ఉవాచ
పూరోర్వంశం ప్రవక్ష్యామి యత్ర జాతోఽసి భారత .
యత్ర రాజర్షయో వంశ్యా బ్రహ్మవంశ్యాశ్చ జజ్ఞిరే
9-20-2
జనమేజయో హ్యభూత్పూరోః ప్రచిన్వాంస్తత్సుతస్తతః .
ప్రవీరోఽథ నమస్యుర్వై తస్మాచ్చారుపదోఽభవత్
9-20-3
తస్య సుద్యురభూత్పుత్రస్తస్మాద్బహుగవస్తతః .
సంయాతిస్తస్యాహంయాతీ రౌద్రాశ్వస్తత్సుతః స్మృతః
9-20-4
ఋతేయుస్తస్య కక్షేయుః స్థండిలేయుః కృతేయుకః .
జలేయుః సంతతేయుశ్చ ధర్మసత్యవ్రతేయవః
9-20-5
దశైతేఽప్సరసః పుత్రా వనేయుశ్చావమః స్మృతః .
ఘృతాచ్యామింద్రియాణీవ ముఖ్యస్య జగదాత్మనః
9-20-6
ఋతేయో రంతిభారోఽభూత్త్రయస్తస్యాత్మజా నృప .
సుమతిర్ధ్రువోఽప్రతిరథః కణ్వోఽప్రతిరథాత్మజః
9-20-7
తస్య మేధాతిథిస్తస్మాత్ప్రస్కణ్వాద్యా ద్విజాతయః .
పుత్రోఽభూత్సుమతే రైభ్యో దుష్యంతస్తత్సుతో మతః
9-20-8
దుష్యంతో మృగయాం యాతః కణ్వాశ్రమపదం గతః .
తత్రాసీనాం స్వప్రభయా మండయంతీం రమామివ
9-20-9
విలోక్య సద్యో ముముహే దేవమాయామివ స్త్రియం .
బభాషే తాం వరారోహాం భటైః కతిపయైర్వృతః
9-20-10
తద్దర్శనప్రముదితః సన్నివృత్తపరిశ్రమః .
పప్రచ్ఛ కామసంతప్తః ప్రహసఞ్శ్లక్ష్ణయా గిరా
9-20-11
కా త్వం కమలపత్రాక్షి కస్యాసి హృదయంగమే .
కిం వా చికీర్షితం త్వత్ర భవత్యా నిర్జనే వనే
9-20-12
వ్యక్తం రాజన్యతనయాం వేద్మ్యహం త్వాం సుమధ్యమే .
న హి చేతః పౌరవాణామధర్మే రమతే క్వచిత్
9-20-13
శకుంతలోవాచ
విశ్వామిత్రాత్మజైవాహం త్యక్తా మేనకయా వనే .
వేదైతద్భగవాన్ కణ్వో వీర కిం కరవామ తే
9-20-14
ఆస్యతాం హ్యరవిందాక్ష గృహ్యతామర్హణం చ నః .
భుజ్యతాం సంతి నీవారా ఉష్యతాం యది రోచతే
9-20-15
దుష్యంత ఉవాచ
ఉపపన్నమిదం సుభ్రు జాతాయాః కుశికాన్వయే .
స్వయం హి వృణుతే రాజ్ఞాం కన్యకాః సదృశం వరం
9-20-16
ఓమిత్యుక్తే యథాధర్మముపయేమే శకుంతలాం .
గాంధర్వవిధినా రాజా దేశకాలవిధానవిత్
9-20-17
అమోఘవీర్యో రాజర్షిర్మహిష్యాం వీర్యమాదధే .
శ్వోభూతే స్వపురం యాతః కాలేనాసూత సా సుతం
9-20-18
కణ్వః కుమారస్య వనే చక్రే సముచితాః క్రియాః .
బద్ధ్వా మృగేంద్రాంస్తరసా క్రీడతి స్మ స బాలకః
9-20-19
తం దురత్యయవిక్రాంతమాదాయ ప్రమదోత్తమా .
హరేరంశాంశసంభూతం భర్తురంతికమాగమత్
9-20-20
యదా న జగృహే రాజా భార్యాపుత్రావనిందితౌ .
శృణ్వతాం సర్వభూతానాం ఖే వాగాహాశరీరిణీ
9-20-21
మాతా భస్త్రా పితుః పుత్రో యేన జాతః స ఏవ సః .
భరస్వ పుత్రం దుష్యంత మావమంస్థాః శకుంతలాం
9-20-22
రేతోధాః పుత్రో నయతి నరదేవ యమక్షయాత్ .
త్వం చాస్య ధాతా గర్భస్య సత్యమాహ శకుంతలా
9-20-23
పితర్యుపరతే సోఽపి చక్రవర్తీ మహాయశాః .
మహిమా గీయతే తస్య హరేరంశభువో భువి
9-20-24
చక్రం దక్షిణహస్తేఽస్య పద్మకోశోఽస్య పాదయోః .
ఈజే మహాభిషేకేణ సోఽభిషిక్తోఽధిరాడ్విభుః
9-20-25
పంచపంచాశతా మేధ్యైర్గంగాయామను వాజిభిః .
మామతేయం పురోధాయ యమునాయామను ప్రభుః
9-20-26
అష్టసప్తతిమేధ్యాశ్వాన్ బబంధ ప్రదదద్వసు .
భరతస్య హి దౌష్యంతేరగ్నిః సాచీగుణే చితః .
సహస్రం బద్వశో యస్మిన్ బ్రాహ్మణా గా విభేజిరే
9-20-27
త్రయస్త్రింశచ్ఛతం హ్యశ్వాన్ బద్ధ్వా విస్మాపయన్ నృపాన్ .
దౌష్యంతిరత్యగాన్మాయాం దేవానాం గురుమాయయౌ
9-20-28
మృగాన్ శుక్లదతః కృష్ణాన్ హిరణ్యేన పరీవృతాన్ .
అదాత్కర్మణి మష్ణారే నియుతాని చతుర్దశ
9-20-29
భరతస్య మహత్కర్మ న పూర్వే నాపరే నృపాః .
నైవాపుర్నైవ ప్రాప్స్యంతి బాహుభ్యాం త్రిదివం యథా
9-20-30
కిరాతహూణాన్ యవనానంధ్రాన్
కంకాన్ ఖశాన్ ఛకాన్ .
అబ్రహ్మణ్యాన్ నృపాంశ్చాహన్
మ్లేచ్ఛాన్ దిగ్విజయేఽఖిలాన్
9-20-31
జిత్వా పురాసురా దేవాన్ యే రసౌకాంసి భేజిరే .
దేవస్త్రియో రసాం నీతాః ప్రాణిభిః పునరాహరత్
9-20-32
సర్వాన్ కామాన్ దుదుహతుః ప్రజానాం తస్య రోదసీ .
సమాస్త్రిణవసాహస్రీర్దిక్షు చక్రమవర్తయత్
9-20-33
స సమ్రాడ్ లోకపాలాఖ్యమైశ్వర్యమధిరాట్ శ్రియం .
చక్రం చాస్ఖలితం ప్రాణాన్ మృషేత్యుపరరామ హ
9-20-34
తస్యాసన్ నృప వైదర్భ్యః పత్న్యస్తిస్రః సుసమ్మతాః .
జఘ్నుస్త్యాగభయాత్పుత్రాన్ నానురూపా ఇతీరితే
9-20-35
తస్యైవం వితథే వంశే తదర్థం యజతః సుతం .
మరుత్స్తోమేన మరుతో భరద్వాజముపాదదుః
9-20-36
అంతర్వత్న్యాం భ్రాతృపత్న్యాం మైథునాయ బృహస్పతిః .
ప్రవృత్తో వారితో గర్భం శప్త్వా వీర్యమవాసృజత్
9-20-37
తం త్యక్తుకామాం మమతాం భర్తృత్యాగవిశంకితాం .
నామనిర్వాచనం తస్య శ్లోకమేనం సురా జగుః
9-20-38
మూఢే భర ద్వాజమిమం భర ద్వాజం బృహస్పతే .
యాతౌ యదుక్త్వా పితరౌ భరద్వాజస్తతస్త్వయం
9-20-39
చోద్యమానా సురైరేవం మత్వా వితథమాత్మజం .
వ్యసృజన్మరుతోఽబిభ్రన్ దత్తోఽయం వితథేఽన్వయే
9-20-40
ఇతి శ్రీమద్భాగవతే మహాపురాణే పారమహంస్యాం సంహితాయాం
నవమస్కంధే వింశోఽధ్యాయః