నవమ స్కంధః : త్రయోవింశోఽధ్యాయః - 23
9-23-1
శ్రీశుక ఉవాచ
అనోః సభానరశ్చక్షుః పరోక్షశ్చ త్రయః సుతాః .
సభానరాత్కాలనరః సృంజయస్తత్సుతస్తతః
9-23-2
జనమేజయస్తస్య పుత్రో మహాశీలో మహామనాః .
ఉశీనరస్తితిక్షుశ్చ మహామనస ఆత్మజౌ
9-23-3
శిబిర్వనః శమిర్దక్షశ్చత్వారోశీనరాత్మజాః .
వృషాదర్భః సువీరశ్చ మద్రః కైకేయ ఆత్మజాః
9-23-4
శిబేశ్చత్వార ఏవాసంస్తితిక్షోశ్చ రుషద్రథః .
తతో హేమోఽథ సుతపా బలిః సుతపసోఽభవత్
9-23-5
అంగవంగకలింగాద్యాః సుహ్మపుండ్రాంధ్రసంజ్ఞితాః .
జజ్ఞిరే దీర్ఘతమసో బలేః క్షేత్రే మహీక్షితః
9-23-6
చక్రుః స్వనామ్నా విషయాన్ షడిమాన్ ప్రాచ్యకాంశ్చ తే .
ఖనపానోఽఙ్గతో జజ్ఞే తస్మాద్దివిరథస్తతః
9-23-7
సుతో ధర్మరథో యస్య జజ్ఞే చిత్రరథోఽప్రజాః .
రోమపాద ఇతి ఖ్యాతస్తస్మై దశరథః సఖా
9-23-8
శాంతాం స్వకన్యాం ప్రాయచ్ఛదృష్యశృంగ ఉవాహ తాం .
దేవేఽవర్షతి యం రామా ఆనిన్యుర్హరిణీసుతం
9-23-9
నాట్యసంగీతవాదిత్రైర్విభ్రమాలింగనార్హణైః .
స తు రాజ్ఞోఽనపత్యస్య నిరూప్యేష్టిం మరుత్వతః
9-23-10
ప్రజామదాద్దశరథో యేన లేభేఽప్రజాః ప్రజాః .
చతురంగో రోమపాదాత్పృథులాక్షస్తు తత్సుతః
9-23-11
బృహద్రథో బృహత్కర్మా బృహద్భానుశ్చ తత్సుతాః .
ఆద్యాద్బృహన్మనాస్తస్మాజ్జయద్రథ ఉదాహృతః
9-23-12
విజయస్తస్య సంభూత్యాం తతో ధృతిరజాయత .
తతో ధృతవ్రతస్తస్య సత్కర్మాధిరథస్తతః
9-23-13
యోఽసౌ గంగాతటే క్రీడన్ మంజూషాంతర్గతం శిశుం .
కుంత్యాపవిద్ధం కానీనమనపత్యోఽకరోత్సుతం
9-23-14
వృషసేనః సుతస్తస్య కర్ణస్య జగతీపతేః .
ద్రుహ్యోశ్చ తనయో బభ్రుః సేతుస్తస్యాత్మజస్తతః
9-23-15
ఆరబ్ధస్తస్య గాంధారస్తస్య ధర్మస్తతో ధృతః .
ధృతస్య దుర్మదస్తస్మాత్ప్రచేతాః ప్రాచేతసం శతం
9-23-16
మ్లేచ్ఛాధిపతయోఽభూవన్నుదీచీం దిశమాశ్రితాః .
తుర్వసోశ్చ సుతో వహ్నిర్వహ్నేర్భర్గోఽథ భానుమాన్
9-23-17
త్రిభానుస్తత్సుతోఽస్యాపి కరంధమ ఉదారధీః .
మరుతస్తత్సుతోఽపుత్రః పుత్రం పౌరవమన్వభూత్
9-23-18
దుష్యంతః స పునర్భేజే స్వం వంశం రాజ్యకాముకః .
యయాతేర్జ్యేష్ఠపుత్రస్య యదోర్వంశం నరర్షభ
9-23-19
వర్ణయామి మహాపుణ్యం సర్వపాపహరం నృణాం .
యదోర్వంశం నరః శ్రుత్వా సర్వపాపైః ప్రముచ్యతే
9-23-20
యత్రావతీర్ణో భగవాన్ పరమాత్మా నరాకృతిః .
యదోః సహస్రజిత్క్రోష్టా నలో రిపురితి శ్రుతాః
9-23-21
చత్వారః సూనవస్తత్ర శతజిత్ప్రథమాత్మజః .
మహాహయో వేణుహయో హైహయశ్చేతి తత్సుతాః
9-23-22
ధర్మస్తు హైహయసుతో నేత్రః కుంతేః పితా తతః .
సోహంజిరభవత్కుంతేర్మహిష్మాన్ భద్రసేనకః
9-23-23
దుర్మదో భద్రసేనస్య ధనకః కృతవీర్యసూః .
కృతాగ్నిః కృతవర్మా చ కృతౌజా ధనకాత్మజాః
9-23-24
అర్జునః కృతవీర్యస్య సప్తద్వీపేశ్వరోఽభవత్ .
దత్తాత్రేయాద్ధరేరంశాత్ప్రాప్తయోగమహాగుణః
9-23-25
న నూనం కార్తవీర్యస్య గతిం యాస్యంతి పార్థివాః .
యజ్ఞదానతపోయోగశ్రుతవీర్యదయాదిభిః
9-23-26
పంచాశీతి సహస్రాణి హ్యవ్యాహతబలః సమాః .
అనష్టవిత్తస్మరణో బుభుజేఽక్షయ్యషడ్వసు
9-23-27
తస్య పుత్రసహస్రేషు పంచైవోర్వరితా మృధే .
జయధ్వజః శూరసేనో వృషభో మధురూర్జితః
9-23-28
జయధ్వజాత్తాలజంఘస్తస్య పుత్రశతం త్వభూత్ .
క్షత్రం యత్తాలజంఘాఖ్యమౌర్వతేజోపసంహృతం
9-23-29
తేషాం జ్యేష్ఠో వీతిహోత్రో వృష్ణిః పుత్రో మధోః స్మృతః .
తస్య పుత్రశతం త్వాసీద్వృష్ణిజ్యేష్ఠం యతః కులం
9-23-30
మాధవా వృష్ణయో రాజన్ యాదవాశ్చేతి సంజ్ఞితాః .
యదుపుత్రస్య చ క్రోష్టోః పుత్రో వృజినవాంస్తతః
9-23-31
శ్వాహిస్తతో రుశేకుర్వై తస్య చిత్రరథస్తతః .
శశబిందుర్మహాయోగీ మహాభోజో మహానభూత్
9-23-32
చతుర్దశమహారత్నశ్చక్రవర్త్యపరాజితః .
తస్య పత్నీసహస్రాణాం దశానాం సుమహాయశాః
9-23-33
దశలక్షసహస్రాణి పుత్రాణాం తాస్వజీజనత్ .
తేషాం తు షట్ ప్రధానానాం పృథుశ్రవస ఆత్మజః
9-23-34
ధర్మో నామోశనా తస్య హయమేధశతస్య యాట్ .
తత్సుతో రుచకస్తస్య పంచాసన్నాత్మజాః శృణు
9-23-35
పురుజిద్రుక్మరుక్మేషుపృథుజ్యామఘసంజ్ఞితాః .
జ్యామఘస్త్వప్రజోఽప్యన్యాం భార్యాం శైబ్యాపతిర్భయాత్
9-23-36
నావిందచ్ఛత్రుభవనాద్భోజ్యాం కన్యామహారషీత్ .
రథస్థాం తాం నిరీక్ష్యాహ శైబ్యా పతిమమర్షితా
9-23-37
కేయం కుహక మత్స్థానం రథమారోపితేతి వై .
స్నుషా తవేత్యభిహితే స్మయంతీ పతిమబ్రవీత్
9-23-38
అహం వంధ్యాసపత్నీ చ స్నుషా మే యుజ్యతే కథం .
జనయిష్యసి యం రాజ్ఞి తస్యేయముపయుజ్యతే
9-23-39
అన్వమోదంత తద్విశ్వేదేవాః పితర ఏవ చ .
శైబ్యా గర్భమధాత్కాలే కుమారం సుషువే శుభం .
స విదర్భ ఇతి ప్రోక్త ఉపయేమే స్నుషాం సతీం
9-23-40
ఇతి శ్రీమద్భాగవతే మహాపురాణే పారమహంస్యాం సంహితాయాం
నవమస్కంధే యదువంశానువర్ణనే త్రయోవింశోఽధ్యాయః