పోతన తెలుగు భాగవతము

పోతన తెలుగు భాగవతము

నవమ స్కంధః : పంచదశోఽధ్యాయః - 15

9-15-1
శ్రీశుక ఉవాచ
ఐలస్య చోర్వశీగర్భాత్షడాసన్నాత్మజా నృప .
ఆయుః శ్రుతాయుః సత్యాయూ రయోఽథ విజయో జయః

9-15-2
శ్రుతాయోర్వసుమాన్ పుత్రః సత్యాయోశ్చ శ్రుతంజయః .
రయస్య సుత ఏకశ్చ జయస్య తనయోఽమితః

9-15-3
భీమస్తు విజయస్యాథ కాంచనో హోత్రకస్తతః .
తస్య జహ్నుః సుతో గంగాం గండూషీకృత్య యోఽపిబత్ .
జహ్నోస్తు పూరుస్తత్పుత్రో బలాకశ్చాత్మజోఽజకః

9-15-4
తతః కుశః కుశస్యాపి కుశాంబుస్తనయో వసుః .
కుశనాభశ్చ చత్వారో గాధిరాసీత్కుశాంబుజః

9-15-5
తస్య సత్యవతీం కన్యామృచీకోఽయాచత ద్విజః .
వరం విసదృశం మత్వా గాధిర్భార్గవమబ్రవీత్

9-15-6
ఏకతః శ్యామకర్ణానాం హయానాం చంద్రవర్చసాం .
సహస్రం దీయతాం శుల్కం కన్యాయాః కుశికా వయం

9-15-7
ఇత్యుక్తస్తన్మతం జ్ఞాత్వా గతః స వరుణాంతికం .
ఆనీయ దత్త్వా తానశ్వానుపయేమే వరాననాం

9-15-8
స ఋషిః ప్రార్థితః పత్న్యా శ్వశ్ర్వా చాపత్యకామ్యయా .
శ్రపయిత్వోభయైర్మంత్రైశ్చరుం స్నాతుం గతో మునిః

9-15-9
తావత్సత్యవతీ మాత్రా స్వచరుం యాచితా సతీ .
శ్రేష్ఠం మత్వా తయాయచ్ఛన్మాత్రే మాతురదత్స్వయం

9-15-10
తద్విజ్ఞాయ మునిః ప్రాహ పత్నీం కష్టమకారషీః .
ఘోరో దండధరః పుత్రో భ్రాతా తే బ్రహ్మవిత్తమః

9-15-11
ప్రసాదితః సత్యవత్యా మైవం భూదితి భార్గవః .
అథ తర్హి భవేత్పౌత్రో జమదగ్నిస్తతోఽభవత్

9-15-12
సా చాభూత్సుమహత్పుణ్యా కౌశికీ లోకపావనీ .
రేణోః సుతాం రేణుకాం వై జమదగ్నిరువాహ యాం

9-15-13
తస్యాం వై భార్గవఋషేః సుతా వసుమదాదయః .
యవీయాన్ జజ్ఞ ఏతేషాం రామ ఇత్యభివిశ్రుతః

9-15-14
యమాహుర్వాసుదేవాంశం హైహయానాం కులాంతకం .
త్రిఃసప్తకృత్వో య ఇమాం చక్రే నిఃక్షత్రియాం మహీం

9-15-15
దుష్టం క్షత్రం భువో భారమబ్రహ్మణ్యమనీనశత్ .
రజస్తమోవృతమహన్ ఫల్గున్యపి కృతేంఽహసి

9-15-16
రాజోవాచ
కిం తదంహో భగవతో రాజన్యైరజితాత్మభిః .
కృతం యేన కులం నష్టం క్షత్రియాణామభీక్ష్ణశః

9-15-17
శ్రీశుక ఉవాచ
హైహయానామధిపతిరర్జునః క్షత్రియర్షభః .
దత్తం నారాయణస్యాంశమారాధ్య పరికర్మభిః

9-15-18
బాహూన్ దశశతం లేభే దుర్ధర్షత్వమరాతిషు .
అవ్యాహతేంద్రియౌజః శ్రీతేజోవీర్యయశోబలం

9-15-19
యోగేశ్వరత్వమైశ్వర్యం గుణా యత్రాణిమాదయః .
చచారావ్యాహతగతిర్లోకేషు పవనో యథా

9-15-20
స్త్రీరత్నైరావృతః క్రీడన్ రేవాంభసి మదోత్కటః .
వైజయంతీం స్రజం బిభ్రద్రురోధ సరితం భుజైః

9-15-21
విప్లావితం స్వశిబిరం ప్రతిస్రోతఃసరిజ్జలైః .
నామృష్యత్తస్య తద్వీర్యం వీరమానీ దశాననః

9-15-22
గృహీతో లీలయా స్త్రీణాం సమక్షం కృతకిల్బిషః .
మాహిష్మత్యాం సన్నిరుద్ధో ముక్తో యేన కపిర్యథా

9-15-23
స ఏకదా తు మృగయాం విచరన్ విపినే వనే .
యదృచ్ఛయాఽఽశ్రమపదం జమదగ్నేరుపావిశత్

9-15-24
తస్మై స నరదేవాయ మునిరర్హణమాహరత్ .
ససైన్యామాత్యవాహాయ హవిష్మత్యా తపోధనః

9-15-25
స వీరస్తత్ర తద్దృష్ట్వా ఆత్మైశ్వర్యాతిశాయనం .
తన్నాద్రియతాగ్నిహోత్ర్యాం సాభిలాషః స హైహయః

9-15-26
హవిర్ధానీమృషేర్దర్పాన్నరాన్ హర్తుమచోదయత్ .
తే చ మాహిష్మతీం నిన్యుః సవత్సాం క్రందతీం బలాత్

9-15-27
అథ రాజని నిర్యాతే రామ ఆశ్రమ ఆగతః .
శ్రుత్వా తత్తస్య దౌరాత్మ్యం చుక్రోధాహిరివాహతః

9-15-28
ఘోరమాదాయ పరశుం సతూణం వర్మ కార్ముకం .
అన్వధావత దుర్మర్షో మృగేంద్ర ఇవ యూథపం

9-15-29
తమాపతంతం భృగువర్యమోజసా
ధనుర్ధరం బాణపరశ్వధాయుధం .
ఐణేయచర్మాంబరమర్కధామభిర్యుతం
జటాభిర్దదృశే పురీం విశన్

9-15-30
అచోదయద్ధస్తిరథాశ్వపత్తిభి-
ర్గదాసిబాణర్ష్టిశతఘ్నిశక్తిభిః .
అక్షౌహిణీః సప్తదశాతిభీషణాస్తా
రామ ఏకో భగవానసూదయత్

9-15-31
యతో యతోఽసౌ ప్రహరత్పరశ్వధో
మనోఽనిలౌజాః పరచక్రసూదనః .
తతస్తతశ్ఛిన్నభుజోరుకంధరా
నిపేతురుర్వ్యాం హతసూతవాహనాః

9-15-32
దృష్ట్వా స్వసైన్యం రుధిరౌఘకర్దమే
రణాజిరే రామకుఠారసాయకైః .
వివృక్ణచర్మధ్వజచాపవిగ్రహం
నిపాతితం హైహయ ఆపతద్రుషా

9-15-33
అథార్జునః పంచశతేషు బాహుభిర్ధనుఃషు
బాణాన్ యుగపత్స సందధే .
రామాయ రామోఽస్త్రభృతాం సమగ్రణీ-
స్తాన్యేకధన్వేషుభిరాచ్ఛినత్సమం

9-15-34
పునః స్వహస్తైరచలాన్ మృధేఽఙ్ఘ్రిపా-
నుత్క్షిప్య వేగాదభిధావతో యుధి .
భుజాన్ కుఠారేణ కఠోరనేమినా
చిచ్ఛేద రామః ప్రసభం త్వహేరివ

9-15-35
కృత్తబాహోః శిరస్తస్య గిరేః శృంగమివాహరత్ .
హతే పితరి తత్పుత్రా అయుతం దుద్రువుర్భయాత్

9-15-36
అగ్నిహోత్రీముపావర్త్య సవత్సాం పరవీరహా .
సముపేత్యాశ్రమం పిత్రే పరిక్లిష్టాం సమర్పయత్

9-15-37
స్వకర్మ తత్కృతం రామః పిత్రే భ్రాతృభ్య ఏవ చ .
వర్ణయామాస తచ్ఛ్రుత్వా జమదగ్నిరభాషత

9-15-38
రామ రామ మహాబాహో భవాన్ పాపమకారషీత్ .
అవధీన్నరదేవం యత్సర్వదేవమయం వృథా

9-15-39
వయం హి బ్రాహ్మణాస్తాత క్షమయార్హణతాం గతాః .
యయా లోకగురుర్దేవః పారమేష్ఠ్యమగాత్పదం

9-15-40
క్షమయా రోచతే లక్ష్మీర్బ్రాహ్మీ సౌరీ యథా ప్రభా .
క్షమిణామాశు భగవాంస్తుష్యతే హరిరీశ్వరః

9-15-41
రాజ్ఞో మూర్ధాభిషిక్తస్య వధో బ్రహ్మవధాద్గురుః .
తీర్థసంసేవయా చాంహో జహ్యంగాచ్యుతచేతనః

9-15-42
ఇతి శ్రీమద్భాగవతే మహాపురాణే పారమహంస్యాం సంహితాయాం
నవమస్కంధే పంచదశోఽధ్యాయః