పోతన తెలుగు భాగవతము

పోతన తెలుగు భాగవతము

నవమ స్కంధః : ఏకవింశోఽధ్యాయః - 21

9-21-1
శ్రీశుక ఉవాచ
వితథస్య సుతో మన్యుర్బృహత్క్షత్రో జయస్తతః .
మహావీర్యో నరో గర్గః సంకృతిస్తు నరాత్మజః

9-21-2
గురుశ్చ రంతిదేవశ్చ సంకృతేః పాండునందన .
రంతిదేవస్య హి యశ ఇహాముత్ర చ గీయతే

9-21-3
వియద్విత్తస్య దదతో లబ్ధం లబ్ధం బుభుక్షతః .
నిష్కించనస్య ధీరస్య సకుటుంబస్య సీదతః

9-21-4
వ్యతీయురష్టచత్వారింశదహాన్యపిబతః కిల .
ఘృతపాయససంయావం తోయం ప్రాతరుపస్థితం

9-21-5
కృచ్ఛ్రప్రాప్తకుటుంబస్య క్షుత్తృడ్భ్యాం జాతవేపథోః .
అతిథిర్బ్రాహ్మణః కాలే భోక్తుకామస్య చాగమత్

9-21-6
తస్మై సంవ్యభజత్సోఽన్నమాదృత్య శ్రద్ధయాన్వితః .
హరిం సర్వత్ర సంపశ్యన్ స భుక్త్వా ప్రయయౌ ద్విజః

9-21-7
అథాన్యో భోక్ష్యమాణస్య విభక్తస్య మహీపతే .
విభక్తం వ్యభజత్తస్మై వృషలాయ హరిం స్మరన్

9-21-8
యాతే శూద్రే తమన్యోఽగాదతిథిః శ్వభిరావృతః .
రాజన్ మే దీయతామన్నం సగణాయ బుభుక్షతే

9-21-9
స ఆదృత్యావశిష్టం యద్బహుమానపురస్కృతం .
తచ్చ దత్త్వా నమశ్చక్రే శ్వభ్యః శ్వపతయే విభుః

9-21-10
పానీయమాత్రముచ్ఛేషం తచ్చైకపరితర్పణం .
పాస్యతః పుల్కసోఽభ్యాగాదపో దేహ్యశుభస్య మే

9-21-11
తస్య తాం కరుణాం వాచం నిశమ్య విపులశ్రమాం .
కృపయా భృశసంతప్త ఇదమాహామృతం వచః

9-21-12
న కామయేఽహం గతిమీశ్వరాత్పరా-
మష్టర్ద్ధియుక్తామపునర్భవం వా .
ఆర్తిం ప్రపద్యేఽఖిలదేహభాజా-
మంతఃస్థితో యేన భవంత్యదుఃఖాః

9-21-13
క్షుత్తృట్ శ్రమో గాత్రపరిశ్రమశ్చ
దైన్యం క్లమః శోకవిషాదమోహాః .
సర్వే నివృత్తాః కృపణస్య జంతో-
ర్జిజీవిషోర్జీవజలార్పణాన్మే

9-21-14
ఇతి ప్రభాష్య పానీయం మ్రియమాణః పిపాసయా .
పుల్కసాయాదదాద్ధీరో నిసర్గకరుణో నృపః

9-21-15
తస్య త్రిభువనాధీశాః ఫలదాః ఫలమిచ్ఛతాం .
ఆత్మానం దర్శయాంచక్రుర్మాయా విష్ణువినిర్మితాః

9-21-16
స వై తేభ్యో నమస్కృత్య నిఃసంగో విగతస్పృహః .
వాసుదేవే భగవతి భక్త్యా చక్రే మనః పరం

9-21-17
ఈశ్వరాలంబనం చిత్తం కుర్వతోఽనన్యరాధసః .
మాయా గుణమయీ రాజన్ స్వప్నవత్ప్రత్యలీయత

9-21-18
తత్ప్రసంగానుభావేన రంతిదేవానువర్తినః .
అభవన్ యోగినః సర్వే నారాయణపరాయణాః

9-21-19
గర్గాచ్ఛినిస్తతో గార్గ్యః క్షత్రాద్బ్రహ్మ హ్యవర్తత .
దురితక్షయో మహావీర్యాత్తస్య త్రయ్యారుణిః కవిః

9-21-20
పుష్కరారుణిరిత్యత్ర యే బ్రాహ్మణగతిం గతాః .
బృహత్క్షత్రస్య పుత్రోఽభూద్ధస్తీ యద్ధస్తినాపురం

9-21-21
అజమీఢో ద్విమీఢశ్చ పురుమీఢశ్చ హస్తినః .
అజమీఢస్య వంశ్యాః స్యుః ప్రియమేధాదయో ద్విజాః

9-21-22
అజమీఢాద్బృహదిషుస్తస్య పుత్రో బృహద్ధనుః .
బృహత్కాయస్తతస్తస్య పుత్ర ఆసీజ్జయద్రథః

9-21-23
తత్సుతో విశదస్తస్య సేనజిత్సమజాయత .
రుచిరాశ్వో దృఢహనుః కాశ్యో వత్సశ్చ తత్సుతాః

9-21-24
రుచిరాశ్వసుతః పారః పృథుసేనస్తదాత్మజః .
పారస్య తనయో నీపస్తస్య పుత్రశతం త్వభూత్

9-21-25
స కృత్వ్యాం శుకకన్యాయాం బ్రహ్మదత్తమజీజనత్ .
స యోగీ గవి భార్యాయాం విష్వక్సేనమధాత్సుతం

9-21-26
జైగీషవ్యోపదేశేన యోగతంత్రం చకార హ .
ఉదక్స్వనస్తతస్తస్మాద్భల్లాదో బార్హదీషవాః

9-21-27
యవీనరో ద్విమీఢస్య కృతిమాంస్తత్సుతః స్మృతః .
నామ్నా సత్యధృతిర్యస్య దృఢనేమిః సుపార్శ్వకృత్

9-21-28
సుపార్శ్వాత్సుమతిస్తస్య పుత్రః సన్నతిమాంస్తతః .
కృతిర్హిరణ్యనాభాద్యో యోగం ప్రాప్య జగౌ స్మ షట్

9-21-29
సంహితాః ప్రాచ్యసామ్నాం వై నీపో హ్యుగ్రాయుధస్తతః .
తస్య క్షేమ్యః సువీరోఽథ సువీరస్య రిపుంజయః

9-21-30
తతో బహురథో నామ పురమీఢోఽప్రజోఽభవత్ .
నలిన్యామజమీఢస్య నీలః శాంతిః సుతస్తతః

9-21-31
శాంతేః సుశాంతిస్తత్పుత్రః పురుజోఽర్కస్తతోఽభవత్ .
భర్మ్యాశ్వస్తనయస్తస్య పంచాసన్ ముద్గలాదయః

9-21-32
యవీనరో బృహదిషుః కాంపిల్యః సంజయః సుతాః .
భర్మ్యాశ్వః ప్రాహ పుత్రా మే పంచానాం రక్షణాయ హి

9-21-33
విషయాణామలమిమే ఇతి పంచాలసంజ్ఞితాః .
ముద్గలాద్బ్రహ్మ నిర్వృత్తం గోత్రం మౌద్గల్యసంజ్ఞితం

9-21-34
మిథునం ముద్గలాద్భార్మ్యాద్దివోదాసః పుమానభూత్ .
అహల్యా కన్యకా యస్యాం శతానందస్తు గౌతమాత్

9-21-35
తస్య సత్యధృతిః పుత్రో ధనుర్వేదవిశారదః .
శరద్వాంస్తత్సుతో యస్మాదుర్వశీదర్శనాత్కిల

9-21-36
శరస్తంబేఽపతద్రేతో మిథునం తదభూచ్ఛుభం .
తద్దృష్ట్వా కృపయాగృహ్ణాచ్ఛంతనుర్మృగయాం చరన్ .
కృపః కుమారః కన్యా చ ద్రోణపత్న్యభవత్కృపీ

9-21-37
ఇతి శ్రీమద్భాగవతే మహాపురాణే పారమహంస్యాం సంహితాయాం
నవమస్కంధే ఏకవింశోఽధ్యాయః