నవమ స్కంధః : ఏకాదశోఽధ్యాయః - 11
9-11-1
శ్రీశుక ఉవాచ
భగవానాత్మనాఽఽత్మానం రామ ఉత్తమకల్పకైః .
సర్వదేవమయం దేవమీజ ఆచార్యవాన్ మఖైః
9-11-2
హోత్రేఽదదాద్దిశం ప్రాచీం బ్రహ్మణే దక్షిణాం ప్రభుః .
అధ్వర్యవే ప్రతీచీం చ ఉదీచీం సామగాయ సః
9-11-3
ఆచార్యాయ దదౌ శేషాం యావతీ భూస్తదంతరా .
మన్యమాన ఇదం కృత్స్నం బ్రాహ్మణోఽర్హతి నిఃస్పృహః
9-11-4
ఇత్యయం తదలంకారవాసోభ్యామవశేషితః .
తథా రాజ్ఞ్యపి వైదేహీ సౌమంగల్యావశేషితా
9-11-5
తే తు బ్రహ్మణ్యదేవస్య వాత్సల్యం వీక్ష్య సంస్తుతం .
ప్రీతాః క్లిన్నధియస్తస్మై ప్రత్యర్ప్యేదం బభాషిరే
9-11-6
అప్రత్తం నస్త్వయా కిం ను భగవన్ భువనేశ్వర .
యన్నోఽన్తర్హృదయం విశ్య తమో హంసి స్వరోచిషా
9-11-7
నమో బ్రహ్మణ్యదేవాయ రామాయాకుంఠమేధసే .
ఉత్తమశ్లోకధుర్యాయ న్యస్తదండార్పితాంఘ్రయే
9-11-8
కదాచిల్లోకజిజ్ఞాసుర్గూఢో రాత్ర్యామలక్షితః .
చరన్ వాచోఽశృణోద్రామో భార్యాముద్దిశ్య కస్యచిత్
9-11-9
నాహం బిభర్మి త్వాం దుష్టామసతీం పరవేశ్మగాం .
స్త్రీలోభీ బిభృయాత్సీతాం రామో నాహం భజే పునః
9-11-10
ఇతి లోకాద్బహుముఖాద్దురారాధ్యాదసంవిదః .
పత్యా భీతేన సా త్యక్తా ప్రాప్తా ప్రాచేతసాశ్రమం
9-11-11
అంతర్వత్న్యాగతే కాలే యమౌ సా సుషువే సుతౌ .
కుశో లవ ఇతి ఖ్యాతౌ తయోశ్చక్రే క్రియా మునిః
9-11-12
అంగదశ్చిత్రకేతుశ్చ లక్ష్మణస్యాత్మజౌ స్మృతౌ .
తక్షః పుష్కల ఇత్యాస్తాం భరతస్య మహీపతే
9-11-13
సుబాహుః శ్రుతసేనశ్చ శత్రుఘ్నస్య బభూవతుః .
గంధర్వాన్ కోటిశో జఘ్నే భరతో విజయే దిశాం
9-11-14
తదీయం ధనమానీయ సర్వం రాజ్ఞే న్యవేదయత్ .
శత్రుఘ్నశ్చ మధోః పుత్రం లవణం నామ రాక్షసం .
హత్వా మధువనే చక్రే మథురాం నామ వై పురీం
9-11-15
మునౌ నిక్షిప్య తనయౌ సీతా భర్త్రా వివాసితా .
ధ్యాయంతీ రామచరణౌ వివరం ప్రవివేశ హ
9-11-16
తచ్ఛ్రుత్వా భగవాన్ రామో రుంధన్నపి ధియా శుచః .
స్మరంస్తస్యా గుణాంస్తాంస్తాన్నాశక్నోద్రోద్ధుమీశ్వరః
9-11-17
స్త్రీపుంప్రసంగ ఏతాదృక్ సర్వత్ర త్రాసమావహః .
అపీశ్వరాణాం కిముత గ్రామ్యస్య గృహచేతసః
9-11-18
తత ఊర్ధ్వం బ్రహ్మచర్యం ధారయన్నజుహోత్ప్రభుః .
త్రయోదశాబ్దసాహస్రమగ్నిహోత్రమఖండితం
9-11-19
స్మరతాం హృది విన్యస్య విద్ధం దండకకంటకైః .
స్వపాదపల్లవం రామ ఆత్మజ్యోతిరగాత్తతః
9-11-20
నేదం యశో రఘుపతేః సురయాచ్ఞయాత్త-
లీలాతనోరధికసామ్యవిముక్తధామ్నః .
రక్షోవధో జలధిబంధనమస్త్రపూగైః
కిం తస్య శత్రుహననే కపయః సహాయాః
9-11-21
యస్యామలం నృపసదఃసు యశోఽధునాపి
గాయంత్యఘఘ్నమృషయో దిగిభేంద్రపట్టం .
తం నాకపాలవసుపాలకిరీటజుష్టపాదాంబుజం
రఘుపతిం శరణం ప్రపద్యే
9-11-22
స యైః స్పృష్టోఽభిదృష్టో వా సంవిష్టోఽనుగతోఽపి వా .
కోసలాస్తే యయుః స్థానం యత్ర గచ్ఛంతి యోగినః
9-11-23
పురుషో రామచరితం శ్రవణైరుపధారయన్ .
ఆనృశంస్యపరో రాజన్ కర్మబంధైర్విముచ్యతే
9-11-24
రాజోవాచ
కథం స భగవాన్ రామో భ్రాతౄన్ వా స్వయమాత్మనః .
తస్మిన్ వా తేఽన్వవర్తంత ప్రజాః పౌరాశ్చ ఈశ్వరే
9-11-25
శ్రీశుక ఉవాచ
అథాదిశద్దిగ్విజయే భ్రాతౄంస్త్రిభువనేశ్వరః .
ఆత్మానం దర్శయన్ స్వానాం పురీమైక్షత సానుగః
9-11-26
ఆసిక్తమార్గాం గంధోదైః కరిణాం మదశీకరైః .
స్వామినం ప్రాప్తమాలోక్య మత్తాం వా సుతరామివ
9-11-27
ప్రాసాదగోపురసభాచైత్యదేవగృహాదిషు .
విన్యస్తహేమకలశైః పతాకాభిశ్చ మండితాం
9-11-28
పూగైః సవృంతై రంభాభిః పట్టికాభిః సువాససాం .
ఆదర్శైరంశుకైః స్రగ్భిః కృతకౌతుకతోరణాం
9-11-29
తముపేయుస్తత్ర తత్ర పౌరా అర్హణపాణయః .
ఆశిషో యుయుజుర్దేవ పాహీమాం ప్రాక్ త్వయోద్ధృతాం
9-11-30
తతః ప్రజా వీక్ష్య పతిం చిరాగతం
దిదృక్షయోత్సృష్టగృహాః స్త్రియో నరాః .
ఆరుహ్య హర్మ్యాణ్యరవిందలోచనమతృప్తనేత్రాః
కుసుమైరవాకిరన్
9-11-31
అథ ప్రవిష్టః స్వగృహం జుష్టం స్వైః పూర్వరాజభిః .
అనంతాఖిలకోషాఢ్యమనర్ఘ్యోరుపరిచ్ఛదం
9-11-32
విద్రుమోదుంబరద్వారైర్వైదూర్యస్తంభపంక్తిభిః .
స్థలైర్మారకతైః స్వచ్ఛైర్భాతస్ఫటికభిత్తిభిః
9-11-33
చిత్రస్రగ్భిః పట్టికాభిర్వాసోమణిగణాంశుకైః .
ముక్తాఫలైశ్చిదుల్లాసైః కాంతకామోపపత్తిభిః
9-11-34
ధూపదీపైః సురభిభిర్మండితం పుష్పమండనైః .
స్త్రీపుంభిః సురసంకాశైర్జుష్టం భూషణభూషణైః
9-11-35
తస్మిన్ స భగవాన్ రామః స్నిగ్ధయా ప్రియయేష్టయా .
రేమే స్వారామధీరాణామృషభః సీతయా కిల
9-11-36
బుభుజే చ యథాకాలం కామాన్ ధర్మమపీడయన్ .
వర్షపూగాన్ బహూన్ నౄణామభిధ్యాతాంఘ్రిపల్లవః
9-11-37
ఇతి శ్రీమద్భాగవతే మహాపురాణే పారమహంస్యాం సంహితాయాం
నవమస్కంధే శ్రీరామోపాఖ్యానే ఏకాదశోఽధ్యాయః