పోతన తెలుగు భాగవతము

పోతన తెలుగు భాగవతము

నవమ స్కంధః : ద్వితీయోఽధ్యాయః

9-2-1
శ్రీశుక ఉవాచ
ఏవం గతేఽథ సుద్యుమ్నే మనుర్వైవస్వతః సుతే .
పుత్రకామస్తపస్తేపే యమునాయాం శతం సమాః

9-2-2
తతోఽయజన్మనుర్దేవమపత్యార్థం హరిం ప్రభుం .
ఇక్ష్వాకుపూర్వజాన్ పుత్రాన్ లేభే స్వసదృశాన్ దశ

9-2-3
పృషధ్రస్తు మనోః పుత్రో గోపాలో గురుణా కృతః .
పాలయామాస గా యత్తో రాత్ర్యాం వీరాసనవ్రతః

9-2-4
ఏకదా ప్రావిశద్గోష్ఠం శార్దూలో నిశి వర్షతి .
శయానా గావ ఉత్థాయ భీతాస్తా బభ్రముర్వ్రజే

9-2-5
ఏకాం జగ్రాహ బలవాన్ సా చుక్రోశ భయాతురా .
తస్యాస్తత్క్రందితం శ్రుత్వా పృషధ్రోఽభిససార హ

9-2-6
ఖడ్గమాదాయ తరసా ప్రలీనోడుగణే నిశి .
అజానన్నహనద్బభ్రోః శిరః శార్దూలశంకయా

9-2-7
వ్యాఘ్రోఽపి వృక్ణశ్రవణో నిస్త్రింశాగ్రాహతస్తతః .
నిశ్చక్రామ భృశం భీతో రక్తం పథి సముత్సృజన్

9-2-8
మన్యమానో హతం వ్యాఘ్రం పృషధ్రః పరవీరహా .
అద్రాక్షీత్స్వహతాం బభ్రుం వ్యుష్టాయాం నిశి దుఃఖితః

9-2-9
తం శశాప కులాచార్యః కృతాగసమకామతః .
న క్షత్రబంధుః శూద్రస్త్వం కర్మణా భవితామునా

9-2-10
ఏవం శప్తస్తు గురుణా ప్రత్యగృహ్ణాత్కృతాంజలిః .
అధారయద్వ్రతం వీర ఊర్ధ్వరేతా మునిప్రియం

9-2-11
వాసుదేవే భగవతి సర్వాత్మని పరేఽమలే .
ఏకాంతిత్వం గతో భక్త్యా సర్వభూతసుహృత్సమః

9-2-12
విముక్తసంగః శాంతాత్మా సంయతాక్షోఽపరిగ్రహః .
యదృచ్ఛయోపపన్నేన కల్పయన్ వృత్తిమాత్మనః

9-2-13
ఆత్మన్యాత్మానమాధాయ జ్ఞానతృప్తః సమాహితః .
విచచార మహీమేతాం జడాంధబధిరాకృతిః

9-2-14
ఏవంవృత్తో వనం గత్వా దృష్ట్వా దావాగ్నిముత్థితం .
తేనోపయుక్తకరణో బ్రహ్మ ప్రాప పరం మునిః

9-2-15
కవిః కనీయాన్ విషయేషు నిఃస్పృహో
విసృజ్య రాజ్యం సహ బంధుభిర్వనం .
నివేశ్య చిత్తే పురుషం స్వరోచిషం
వివేశ కైశోరవయాః పరం గతః

9-2-16
కరూషాన్మానవాదాసన్ కారూషాః క్షత్రజాతయః .
ఉత్తరాపథగోప్తారో బ్రహ్మణ్యా ధర్మవత్సలాః

9-2-17
ధృష్టాద్ధార్ష్టమభూత్క్షత్రం బ్రహ్మభూయం గతం క్షితౌ .
నృగస్య వంశః సుమతిర్భూతజ్యోతిస్తతో వసుః

9-2-18
వసోః ప్రతీకస్తత్పుత్ర ఓఘవానోఘవత్పితా .
కన్యా చౌఘవతీ నామ సుదర్శన ఉవాహ తాం

9-2-19
చిత్రసేనో నరిష్యంతాద్దక్షస్తస్య సుతోఽభవత్ .
తస్య మీఢ్వాంస్తతః కూర్చ ఇంద్రసేనస్తు తత్సుతః

9-2-20
వీతిహోత్రస్త్వింద్రసేనాత్తస్య సత్యశ్రవా అభూత్ .
ఉరుశ్రవాః సుతస్తస్య దేవదత్తస్తతోఽభవత్

9-2-21
తతోఽగ్నివేశ్యో భగవానగ్నిః స్వయమభూత్సుతః .
కానీన ఇతి విఖ్యాతో జాతూకర్ణ్యో మహాన్ ఋషిః

9-2-22
తతో బ్రహ్మకులం జాతమాగ్నివేశ్యాయనం నృప .
నరిష్యంతాన్వయః ప్రోక్తో దిష్టవంశమతః శృణు

9-2-23
నాభాగో దిష్టపుత్రోఽన్యః కర్మణా వైశ్యతాం గతః .
భలందనః సుతస్తస్య వత్సప్రీతిర్భలందనాత్

9-2-24
వత్సప్రీతేః సుతః ప్రాంశుస్తత్సుతం ప్రమతిం విదుః .
ఖనిత్రః ప్రమతేస్తస్మాచ్చాక్షుషోఽథ వివింశతిః

9-2-25
వివింశతిసుతో రంభః ఖనినేత్రోఽస్య ధార్మికః .
కరంధమో మహారాజ తస్యాసీదాత్మజో నృప

9-2-26
తస్యావీక్షిత్సుతో యస్య మరుత్తశ్చక్రవర్త్యభూత్ .
సంవర్తోఽయాజయద్యం వై మహాయోగ్యంగిరఃసుతః

9-2-27
మరుత్తస్య యథా యజ్ఞో న తథాన్న్యస్య కశ్చన .
సర్వం హిరణ్మయం త్వాసీద్యత్కించిచ్చాస్య శోభనం

9-2-28
అమాద్యదింద్రః సోమేన దక్షిణాభిర్ద్విజాతయః .
మరుతః పరివేష్టారో విశ్వేదేవాః సభాసదః

9-2-29
మరుత్తస్య దమః పుత్రస్తస్యాసీద్రాజ్యవర్ధనః .
సుధృతిస్తత్సుతో జజ్ఞే సౌధృతేయో నరః సుతః

9-2-30
తత్సుతః కేవలస్తస్మాద్బంధుమాన్ వేగవాంస్తతః .
బంధుస్తస్యాభవద్యస్య తృణబిందుర్మహీపతిః

9-2-31
తం భేజేఽలంబుషా దేవీ భజనీయగుణాలయం .
వరాప్సరా యతః పుత్రాః కన్యా చేడవిడాభవత్

9-2-32
తస్యాముత్పాదయామాస విశ్రవా ధనదం సుతం .
ప్రాదాయ విద్యాం పరమామృషిర్యోగేశ్వరాత్పితుః

9-2-33
విశాలః శూన్యబంధుశ్చ ధూమ్రకేతుశ్చ తత్సుతాః .
విశాలో వంశకృద్రాజా వైశాలీం నిర్మమే పురీం

9-2-34
హేమచంద్రః సుతస్తస్య ధూమ్రాక్షస్తస్య చాత్మజః .
తత్పుత్రాత్సంయమాదాసీత్కృశాశ్వః సహదేవజః

9-2-35
కృశాశ్వాత్సోమదత్తోఽభూద్యోఽశ్వమేధైరిడస్పతిం .
ఇష్ట్వా పురుషమాపాగ్ర్యాం గతిం యోగేశ్వరాశ్రితః

9-2-36
సౌమదత్తిస్తు సుమతిస్తత్సుతో జనమేజయః .
ఏతే వైశాలభూపాలాస్తృణబిందోర్యశోధరాః

9-2-37
ఇతి శ్రీమద్భాగవతే మహాపురాణే పారమహంస్యాం సంహితాయాం
నవమస్కంధే ద్వితీయోఽధ్యాయః