ఏకాదశ స్కంధః : షష్ఠోఽధ్యాయః - 6
11-6-1
శ్రీశుక ఉవాచ
అథ బ్రహ్మాఽఽత్మజైర్దేవైః ప్రజేశైరావృతోఽభ్యగాత్ .
భవశ్చ భూతభవ్యేశో యయౌ భూతగణైర్వృతః
11-6-2
ఇంద్రో మరుద్భిర్భగవానాదిత్యా వసవోఽశ్వినౌ .
ఋభవోఽఙ్గిరసో రుద్రా విశ్వే సాధ్యాశ్చ దేవతాః
11-6-3
గంధర్వాప్సరసో నాగాః సిద్ధచారణగుహ్యకాః .
ఋషయః పితరశ్చైవ సవిద్యాధరకిన్నరాః
11-6-4
ద్వారకాముపసంజగ్ముః సర్వే కృష్ణదిదృక్షవః .
వపుషా యేన భగవాన్నరలోకమనోరమః .
యశో వితేనే లోకేషు సర్వలోకమలాపహం
11-6-5
తస్యాం విభ్రాజమానాయాం సమృద్ధాయాం మహర్ద్ధిభిః .
వ్యచక్షతావితృప్తాక్షాః కృష్ణమద్భుతదర్శనం
11-6-6
స్వర్గోద్యానోపగైర్మాల్యైశ్ఛాదయంతో యుదూత్తమం .
గీర్భిశ్చిత్రపదార్థాభిస్తుష్టువుర్జగదీశ్వరం
11-6-7
దేవా ఊచుః
నతాః స్మ తే నాథ పదారవిందం
బుద్ధీంద్రియప్రాణమనోవచోభిః .
యచ్చింత్యతేఽన్తర్హృది భావయుక్తైర్ముముక్షుభిః
కర్మమయోరుపాశాత్
11-6-8
త్వం మాయయా త్రిగుణయాఽఽత్మని దుర్విభావ్యం
వ్యక్తం సృజస్యవసి లుంపసి తద్గుణస్థః .
నైతైర్భవానజిత కర్మభిరజ్యతే వై
యత్స్వే సుఖేఽవ్యవహితేఽభిరతోఽనవద్యః
11-6-9
శుద్ధిర్నృణాం న తు తథేడ్య దురాశయానాం
విద్యాశ్రుతాధ్యయనదానతపఃక్రియాభిః .
సత్త్వాత్మనామృషభ తే యశసి ప్రవృద్ధ-
సచ్ఛ్రద్ధయా శ్రవణసంభృతయా యథా స్యాత్
11-6-10
స్యాన్నస్తవాంఘ్రిరశుభాశయధూమకేతుః
క్షేమాయ యో మునిభిరార్ద్రహృదోహ్యమానః .
యః సాత్వతైః సమవిభూతయ ఆత్మవద్భి-
వ్యూహేఽర్చితః సవనశః స్వరతిక్రమాయ
11-6-11
యశ్చింత్యతే ప్రయతపాణిభిరధ్వరాగ్నౌ
త్రయ్యా నిరుక్తవిధినేశ హవిర్గృహీత్వా .
అధ్యాత్మయోగ ఉత యోగిభిరాత్మమాయాం
జిజ్ఞాసుభిః పరమభాగవతైః పరీష్టః
11-6-12
పర్యుష్టయా తవ విభో వనమాలయేయం
సంస్పర్ధినీ భగవతీ ప్రతిపత్నివచ్ఛ్రీః .
యః సుప్రణీతమముయార్హణమాదదన్నో
భూయాత్సదాంఘ్రిరశుభాశయధూమకేతుః
11-6-13
కేతుస్త్రివిక్రమయుతస్త్రిపతత్పతాకో
యస్తే భయాభయకరోఽసురదేవచమ్వోః .
స్వర్గాయ సాధుషు ఖలేష్వితరాయ భూమన్
పాదః పునాతు భగవన్ భజతామఘం నః
11-6-14
నస్యోతగావ ఇవ యస్య వశే భవంతి
బ్రహ్మాదయస్తనుభృతో మిథురర్ద్యమానాః .
కాలస్య తే ప్రకృతిపూరుషయోః పరస్య
శం నస్తనోతు చరణః పురుషోత్తమస్య
11-6-15
అస్యాసి హేతురుదయస్థితిసంయమానా-
మవ్యక్తజీవమహతామపి కాలమాహుః .
సోఽయం త్రిణాభిరఖిలాపచయే ప్రవృత్తః
కాలో గభీరరయ ఉత్తమపూరుషస్త్వం
11-6-16
త్వత్తః పుమాన్ సమధిగమ్య యయా స్వవీర్యం
ధత్తే మహాంతమివ గర్భమమోఘవీర్యః .
సోఽయం తయానుగత ఆత్మన ఆండకోశం
హైమం ససర్జ బహిరావరణైరుపేతం
11-6-17
తత్తస్థుషశ్చ జగతశ్చ భవానధీశో
యన్మాయయోత్థగుణవిక్రియయోపనీతాన్ .
అర్థాంజుషన్నపి హృషీకపతే న లిప్తో
యేఽన్యే స్వతః పరిహృతాదపి బిభ్యతి స్మ
11-6-18
స్మాయావలోకలవదర్శితభావహారి-
భ్రూమండలప్రహితసౌరతమంత్రశౌండైః .
పత్న్యస్తు షోడశసహస్రమనంగబాణై-
ర్యస్యేంద్రియం విమథితుం కరణైర్న విభ్వ్యః
11-6-19
విభ్వ్యస్తవామృతకథోదవహాస్త్రిలోక్యాః
పాదావనేజసరితః శమలాని హంతుం .
ఆనుశ్రవం శ్రుతిభిరంఘ్రిజమంగసంగై-
స్తీర్థద్వయం శుచిషదస్త ఉపస్పృశంతి
11-6-20
బాదరాయణిరువాచ
ఇత్యభిష్టూయ విబుధైః సేశః శతధృతిర్హరిం .
అభ్యభాషత గోవిందం ప్రణమ్యాంబరమాశ్రితః
11-6-21
బ్రహ్మోవాచ
భూమేర్భారావతారాయ పురా విజ్ఞాపితః ప్రభో .
త్వమస్మాభిరశేషాత్మంస్తత్తథైవోపపాదితం
11-6-22
ధర్మశ్చ స్థాపితః సత్సు సత్యసంధేషు వై త్వయా .
కీర్తిశ్చ దిక్షు విక్షిప్తా సర్వలోకమలాపహా
11-6-23
అవతీర్య యదోర్వంశే బిభ్రద్రూపమనుత్తమం .
కర్మాణ్యుద్దామవృత్తాని హితాయ జగతోఽకృథాః
11-6-24
యాని తే చరితానీశ మనుష్యాః సాధవః కలౌ .
శృణ్వంతః కీర్తయంతశ్చ తరిష్యంత్యంజసా తమః
11-6-25
యదువంశేఽవతీర్ణస్య భవతః పురుషోత్తమ .
శరచ్ఛతం వ్యతీయాయ పంచవింశాధికం ప్రభో
11-6-26
నాధునా తేఽఖిలాధార దేవకార్యావశేషితం .
కులం చ విప్రశాపేన నష్టప్రాయమభూదిదం
11-6-27
తతః స్వధామ పరమం విశస్వ యది మన్యసే .
సలోకాఀల్లోకపాలాన్నః పాహి వైకుంఠకింకరాన్
11-6-28
శ్రీభగవానువాచ
అవధారితమేతన్మే యదాత్థ విబుధేశ్వర .
కృతం వః కార్యమఖిలం భూమేర్భారోఽవతారితః
11-6-29
తదిదం యాదవకులం వీర్యశౌర్యశ్రియోద్ధతం .
లోకం జిఘృక్షద్రుద్ధం మే వేలయేవ మహార్ణవః
11-6-30
యద్యసంహృత్య దృప్తానాం యదూనాం విపులం కులం .
గంతాస్మ్యనేన లోకోఽయముద్వేలేన వినంక్ష్యతి
11-6-31
ఇదానీం నాశ ఆరబ్ధః కులస్య ద్విజశాపజః .
యాస్యామి భవనం బ్రహ్మన్నేతదంతే తవానఘ
11-6-32
శ్రీశుక ఉవాచ
ఇత్యుక్తో లోకనాథేన స్వయంభూః ప్రణిపత్య తం .
సహ దేవగణైర్దేవః స్వధామ సమపద్యత
11-6-33
అథ తస్యాం మహోత్పాతాన్ ద్వారవత్యాం సముత్థితాన్ .
విలోక్య భగవానాహ యదువృద్ధాన్ సమాగతాన్
11-6-34
శ్రీభగవానువాచ
ఏతే వై సుమహోత్పాతా వ్యుత్తిష్ఠంతీహ సర్వతః .
శాపశ్చ నః కులస్యాసీద్బ్రాహ్మణేభ్యో దురత్యయః
11-6-35
న వస్తవ్యమిహాస్మాభిర్జిజీవిషుభిరార్యకాః .
ప్రభాసం సుమహత్పుణ్యం యాస్యామోఽద్యైవ మా చిరం
11-6-36
యత్ర స్నాత్వా దక్షశాపాద్గృహీతో యక్ష్మణోడురాట్ .
విముక్తః కిల్బిషాత్సద్యో భేజే భూయః కలోదయం
11-6-37
వయం చ తస్మిన్నాప్లుత్య తర్పయిత్వా పితౄన్ సురాన్ .
భోజయిత్వోశిజో విప్రాన్ నానాగుణవతాంధసా
11-6-38
తేషు దానాని పాత్రేషు శ్రద్ధయోప్త్వా మహాంతి వై .
వృజినాని తరిష్యామో దానైర్నౌభిరివార్ణవం
11-6-39
శ్రీశుక ఉవాచ
ఏవం భగవతాఽఽదిష్టా యాదవాః కులనందన .
గంతుం కృతధియస్తీర్థం స్యందనాన్ సమయూయుజన్
11-6-40
తన్నిరీక్ష్యోద్ధవో రాజన్ శ్రుత్వా భగవతోదితం .
దృష్ట్వారిష్టాని ఘోరాణి నిత్యం కృష్ణమనువ్రతః
11-6-41
వివిక్త ఉపసంగమ్య జగతామీశ్వరేశ్వరం .
ప్రణమ్య శిరిసా పాదౌ ప్రాంజలిస్తమభాషత
11-6-42
ఉద్ధవ ఉవాచ
దేవదేవేశ యోగేశ పుణ్యశ్రవణకీర్తన .
సంహృత్యైతత్కులం నూనం లోకం సంత్యక్ష్యతే భవాన్ .
విప్రశాపం సమర్థోఽపి ప్రత్యహన్న యదీశ్వరః
11-6-43
నాహం తవాంఘ్రికమలం క్షణార్ధమపి కేశవ .
త్యక్తుం సముత్సహే నాథ స్వధామ నయ మామపి
11-6-44
తవ విక్రీడితం కృష్ణ నృణాం పరమమంగలం .
కర్ణపీయూషమాస్వాద్య త్యజంత్యన్యస్పృహాం జనాః
11-6-45
శయ్యాసనాటనస్థానస్నానక్రీడాశనాదిషు .
కథం త్వాం ప్రియమాత్మానం వయం భక్తాస్త్యజేమహి
11-6-46
త్వయోపభుక్తస్రగ్గంధవాసోఽలంకారచర్చితాః .
ఉచ్ఛిష్టభోజినో దాసాస్తవ మాయాం జయేమహి
11-6-47
వాతరశనా య ఋషయః శ్రమణా ఊర్ధ్రమంథినః .
బ్రహ్మాఖ్యం ధామ తే యాంతి శాంతాః సన్న్యాసినోఽమలాః
11-6-48
వయం త్విహ మహాయోగిన్ భ్రమంతః కర్మవర్త్మసు .
త్వద్వార్తయా తరిష్యామస్తావకైర్దుస్తరం తమః
11-6-49
స్మరంతః కీర్తయంతస్తే కృతాని గదితాని చ .
గత్యుత్స్మితేక్షణక్ష్వేలి యన్నృలోకవిడంబనం
11-6-50
శ్రీశుక ఉవాచ
ఏవం విజ్ఞాపితో రాజన్ భగవాన్ దేవకీసుతః .
ఏకాంతినం ప్రియం భృత్యముద్ధవం సమభాషత
11-6-51
ఇతి శ్రీమద్భాగవతే మహాపురాణే పారమహంస్యాం సంహితాయాం
ఏకాదశస్కంధే షష్ఠోఽధ్యాయః