ఏకాదశ స్కంధః : షడ్వింశోఽధ్యాయః - 26
11-26-1
శ్రీభగవానువాచ
మల్లక్షణమిమం కాయం లబ్ధ్వా మద్ధర్మ ఆస్థితః .
ఆనందం పరమాత్మానమాత్మస్థం సముపైతి మాం
11-26-2
గుణమయ్యా జీవయోన్యా విముక్తో జ్ఞాననిష్ఠయా .
గుణేషు మాయామాత్రేషు దృశ్యమానేష్వవస్తుతః .
వర్తమానోఽపి న పుమాన్ యుజ్యతేఽవస్తుభిర్గుణైః
11-26-3
సంగం న కుర్యాదసతాం శిశ్నోదరతృపాం క్వచిత్ .
తస్యానుగస్తమస్యంధే పతత్యంధానుగాంధవత్
11-26-4
ఐలః సమ్రాడిమాం గాథామగాయత బృహచ్ఛ్రవాః .
ఉర్వశీవిరహాన్ముహ్యన్ నిర్విణ్ణః శోకసంయమే
11-26-5
త్యక్త్వాఽఽత్మానం వ్రజంతీం తాం నగ్న ఉన్మత్తవన్నృపః .
విలపన్నన్వగాజ్జాయే ఘోరే తిష్ఠేతి విక్లవః
11-26-6
కామానతృప్తోఽనుజుషన్ క్షుల్లకాన్ వర్షయామినీః .
న వేద యాంతీర్నాయాంతీరుర్వశ్యాకృష్టచేతనః
11-26-7
ఐల ఉవాచ
అహో మే మోహవిస్తారః కామకశ్మలచేతసః .
దేవ్యా గృహీతకంఠస్య నాయుః ఖండా ఇమే స్మృతాః
11-26-8
నాహం వేదాభినిర్ముక్తః సూర్యో వాభ్యుదితోఽముయా .
ముషితో వర్షపూగానాం బతాహాని గతాన్యుత
11-26-9
అహో మే ఆత్మసమ్మోహో యేనాత్మా యోషితాం కృతః .
క్రీడామృగశ్చక్రవర్తీ నరదేవశిఖామణిః
11-26-10
సపరిచ్ఛదమాత్మానం హిత్వా తృణమివేశ్వరం .
యాంతీం స్త్రియం చాన్వగమం నగ్న ఉన్మత్తవద్రుదన్
11-26-11
కుతస్తస్యానుభావః స్యాత్తేజ ఈశత్వమేవ వా .
యోఽన్వగచ్ఛం స్త్రియం యాంతీం ఖరవత్పాదతాడితః
11-26-12
కిం విద్యయా కిం తపసా కిం త్యాగేన శ్రుతేన వా .
కిం వివిక్తేన మౌనేన స్త్రీభిర్యస్య మనో హృతం
11-26-13
స్వార్థస్యాకోవిదం ధిఙ్ మాం మూర్ఖం పండితమానినం .
యోఽహమీశ్వరతాం ప్రాప్య స్త్రీభిర్గోఖరవజ్జితః
11-26-14
సేవతో వర్షపూగాన్ మే ఉర్వశ్యా అధరాసవం .
న తృప్యత్యాత్మభూః కామో వహ్నిరాహుతిభిర్యథా
11-26-15
పుంశ్చల్యాపహృతం చిత్తం కో న్వన్యో మోచితుం ప్రభుః .
ఆత్మారామేశ్వరమృతే భగవంతమధోక్షజం
11-26-16
బోధితస్యాపి దేవ్యా మే సూక్తవాక్యేన దుర్మతేః .
మనో గతో మహామోహో నాపయాత్యజితాత్మనః
11-26-17
కిమేతయా నోపకృతం రజ్జ్వా వా సర్పచేతసః .
రజ్జుస్వరూపావిదుషో యోఽహం యదజితేంద్రియః
11-26-18
క్వాయం మలీమసః కాయో దౌర్గంధ్యాద్యాత్మకోఽశుచిః .
క్వ గుణాః సౌమనస్యాద్యా హ్యధ్యాసోఽవిద్యయా కృతః
11-26-19
పిత్రోః కిం స్వం ను భార్యాయాః స్వామినోఽగ్నేః శ్వగృధ్రయోః .
కిమాత్మనః కిం సుహృదామితి యో నావసీయతే
11-26-20
తస్మిన్ కలేవరేఽమేధ్యే తుచ్ఛనిష్ఠే విషజ్జతే .
అహో సుభద్రం సునసం సుస్మితం చ ముఖం స్త్రియాః
11-26-21
త్వఙ్ మాంసరుధిరస్నాయుమేదోమజ్జాస్థిసంహతౌ .
విణ్మూత్రపూయే రమతాం కృమీణాం కియదంతరం
11-26-22
అథాపి నోపసజ్జేత స్త్రీషు స్త్రైణేషు చార్థవిత్ .
విషయేంద్రియసంయోగాన్మనః క్షుభ్యతి నాన్యథా
11-26-23
అదృష్టాదశ్రుతాద్భావాన్న భావ ఉపజాయతే .
అసంప్రయుంజతః ప్రాణాన్ శామ్యతి స్తిమితం మనః
11-26-24
తస్మాత్సంగో న కర్తవ్యః స్త్రీషు స్త్రైణేషు చేంద్రియైః .
విదుషాం చాప్యవిస్రబ్ధః షడ్ వర్గః కిము మాదృశాం
11-26-25
శ్రీభగవానువాచ
ఏవం ప్రగాయన్ నృపదేవదేవః
స ఉర్వశీలోకమథో విహాయ .
ఆత్మానమాత్మన్యవగమ్య మాం వై
ఉపారమజ్జ్ఞానవిధూతమోహః
11-26-26
తతో దుఃసంగముత్సృజ్య సత్సు సజ్జేత బుద్ధిమాన్ .
సంత ఏతస్య ఛిందంతి మనోవ్యాసంగముక్తిభిః
11-26-27
సంతోఽనపేక్షా మచ్చిత్తాః ప్రశాంతాః సమదర్శినః .
నిర్మమా నిరహంకారా నిర్ద్వంద్వా నిష్పరిగ్రహాః
11-26-28
తేషు నిత్యం మహాభాగ మహాభాగేషు మత్కథాః .
సంభవంతి హి తా నౄణాం జుషతాం ప్రపునంత్యఘం
11-26-29
తా యే శృణ్వంతి గాయంతి హ్యనుమోదంతి చాదృతాః .
మత్పరాః శ్రద్దధానాశ్చ భక్తిం విందంతి తే మయి
11-26-30
భక్తిం లబ్ధవతః సాధోః కిమన్యదవశిష్యతే .
మయ్యనంతగుణే బ్రహ్మణ్యానందానుభవాత్మని
11-26-31
యథోపశ్రయమాణస్య భగవంతం విభావసుం .
శీతం భయం తమోఽప్యేతి సాధూన్ సంసేవతస్తథా
11-26-32
నిమజ్జ్యోన్మజ్జతాం ఘోరే భవాబ్ధౌ పరమాయణం .
సంతో బ్రహ్మవిదః శాంతా నౌర్దృఢేవాప్సు మజ్జతాం
11-26-33
అన్నం హి ప్రాణినాం ప్రాణ ఆర్తానాం శరణం త్వహం .
ధర్మో విత్తం నృణాం ప్రేత్య సంతోఽర్వాగ్బిభ్యతోఽరణం
11-26-34
సంతో దిశంతి చక్షూంషి బహిరర్కః సముత్థితః .
దేవతా బాంధవాః సంతః సంత ఆత్మాహమేవ చ
11-26-35
వైతసేనస్తతోఽప్యేవముర్వశ్యా లోకనిస్పృహః .
ముక్తసంగో మహీమేతామాత్మారామశ్చచార హ
11-26-36
ఇతి శ్రీమద్భాగవతే మహాపురాణే పారమహంస్యాం సంహితాయాం
ఏకాదశస్కంధే షడ్వింశోఽధ్యాయః