పోతన తెలుగు భాగవతము

పోతన తెలుగు భాగవతము

ఏకాదశ స్కంధః : నవమోఽధ్యాయః - 9

11-9-1
బ్రాహ్మణ ఉవాచ
పరిగ్రహో హి దుఃఖాయ యద్యత్ప్రియతమం నృణాం .
అనంతం సుఖమాప్నోతి తద్విద్వాన్యస్త్వకించనః

11-9-2
సామిషం కురరం జఘ్నుర్బలినో యే నిరామిషాః .
తదామిషం పరిత్యజ్య స సుఖం సమవిందత

11-9-3
న మే మానావమానౌ స్తో న చింతా గేహపుత్రిణాం .
ఆత్మక్రీడ ఆత్మరతిర్విచరామీహ బాలవత్

11-9-4
ద్వావేవ చింతయా ముక్తౌ పరమానంద ఆప్లుతౌ .
యో విముగ్ధో జడో బాలో యో గుణేభ్యః పరం గతః

11-9-5
క్వచిత్కుమారీ త్వాత్మానం వృణానాన్ గృహమాగతాన్ .
స్వయం తానర్హయామాస క్వాపి యాతేషు బంధుషు

11-9-6
తేషామభ్యవహారార్థం శాలీన్ రహసి పార్థివ .
అవఘ్నంత్యాః ప్రకోష్ఠస్థాశ్చక్రుః శంఖాః స్వనం మహత్

11-9-7
సా తజ్జుగుప్సితం మత్వా మహతీ వృడితా తతః .
బభంజైకైకశః శంఖాన్ ద్వౌ ద్వౌ పాణ్యోరశేషయత్

11-9-8
ఉభయోరప్యభూద్ఘోషో హ్యవఘ్నంత్యాః స్మ శంఖయోః .
తత్రాప్యేకం నిరభిదదేకస్మాన్నాభవద్ధ్వనిః

11-9-9
అన్వశిక్షమిమం తస్యా ఉపదేశమరిందమ .
లోకాననుచరన్నేతాన్ లోకతత్త్వవివిత్సయా

11-9-10
వాసే బహూనాం కలహో భవేద్వార్తా ద్వయోరపి .
ఏక ఏవ చరేత్తస్మాత్కుమార్యా ఇవ కంకణః

11-9-11
మన ఏకత్ర సంయుంజ్యాజ్జితశ్వాసో జితాసనః .
వైరాగ్యాభ్యాసయోగేన ధ్రియమాణమతంద్రితః

11-9-12
యస్మిన్ మనో లబ్ధపదం యదేతచ్ఛనైః
శనైర్ముంచతి కర్మరేణూన్ .
సత్త్వేన వృద్ధేన రజస్తమశ్చ
విధూయ నిర్వాణముపైత్యనింధనం

11-9-13
తదైవమాత్మన్యవరుద్ధచిత్తో
న వేద కించిద్బహిరంతరం వా .
యథేషుకారో నృపతిం వ్రజంతమిషౌ
గతాత్మా న దదర్శ పార్శ్వే

11-9-14
ఏకచార్యనికేతః స్యాదప్రమత్తో గుహాశయః .
అలక్ష్యమాణ ఆచారైర్మునిరేకోఽల్పభాషణః

11-9-15
గృహారంభోఽతి దుఃఖాయ విఫలశ్చాధ్రువాత్మనః .
సర్పః పరకృతం వేశ్మ ప్రవిశ్య సుఖమేధతే

11-9-16
ఏకో నారాయణో దేవః పూర్వసృష్టం స్వమాయయా .
సంహృత్య కాలకలయా కల్పాంత ఇదమీశ్వరః .
ఏక ఏవాద్వితీయోఽభూదాత్మాధారోఽఖిలాశ్రయః

11-9-17
కాలేనాత్మానుభావేన సామ్యం నీతాసు శక్తిషు .
సత్త్వాదిష్వాదిపురుషః ప్రధానపురుషేశ్వరః

11-9-18
పరావరాణాం పరమ ఆస్తే కైవల్యసంజ్ఞితః .
కేవలానుభవానందసందోహో నిరుపాధికః

11-9-19
కేవలాత్మానుభావేన స్వమాయాం త్రిగుణాత్మికాం .
సంక్షోభయన్ సృజత్యాదౌ తయా సూత్రమరిందమ

11-9-20
తామాహుస్త్రిగుణవ్యక్తిం సృజంతీం విశ్వతోముఖం .
యస్మిన్ ప్రోతమిదం విశ్వం యేన సంసరతే పుమాన్

11-9-21
యథోర్ణనాభిర్హృదయాదూర్ణాం సంతత్య వక్త్రతః .
తయా విహృత్య భూయస్తాం గ్రసత్యేవం మహేశ్వరః

11-9-22
యత్ర యత్ర మనో దేహీ ధారయేత్సకలం ధియా .
స్నేహాద్ద్వేషాద్భయాద్వాపి యాతి తత్తత్స్వరూపతాం

11-9-23
కీటః పేశస్కృతం ధ్యాయన్ కుడ్యాం తేన ప్రవేశితః .
యాతి తత్సాత్మతాం రాజన్ పూర్వరూపమసంత్యజన్

11-9-24
ఏవం గురుభ్య ఏతేభ్య ఏషా మే శిక్షితా మతిః .
స్వాత్మోపశిక్షితాం బుద్ధిం శృణు మే వదతః ప్రభో

11-9-25
దేహో గురుర్మమ విరక్తివివేకహేతుః
బిభ్రత్స్మ సత్త్వనిధనం సతతార్త్యుదర్కం .
తత్త్వాన్యనేన విమృశామి యథా తథాపి
పారక్యమిత్యవసితో విచరామ్యసంగః

11-9-26
జాయాత్మజార్థపశుభృత్యగృహాప్తవర్గాన్
పుష్ణాతి యత్ప్రియచికీర్షయా వితన్వన్ .
స్వాంతే సకృచ్ఛ్రమవరుద్ధధనః స దేహః
సృష్ట్వాస్య బీజమవసీదతి వృక్షధర్మః

11-9-27
జిహ్వైకతోఽముమపకర్షతి కర్హి తర్షా
శిశ్నోఽన్యతస్త్వగుదరం శ్రవణం కుతశ్చిత్ .
ఘ్రాణోఽన్యతశ్చపలదృక్ క్వ చ కర్మశక్తిః
బహ్వ్యః సపత్న్య ఇవ గేహపతిం లునంతి

11-9-28
సృష్ట్వా పురాణి వివిధాన్యజయాఽఽత్మశక్త్యా
వృక్షాన్ సరీసృపపశూన్ ఖగదంశమత్స్యాన్ .
తైస్తైరతుష్టహృదయః పురుషం విధాయ
బ్రహ్మావలోకధిషణం ముదమాప దేవః

11-9-29
లబ్ధ్వా సుదుర్లభమిదం బహుసంభవాంతే
మానుష్యమర్థదమనిత్యమపీహ ధీరః .
తూర్ణం యతేత న పతేదనుమృత్యు యావ-
న్నిఃశ్రేయసాయ విషయః ఖలు సర్వతః స్యాత్

11-9-30
ఏవం సంజాతవైరాగ్యో విజ్ఞానాలోక ఆత్మని .
విచరామి మహీమేతాం ముక్తసంగోఽనహంకృతిః

11-9-31
న హ్యేకస్మాద్గురోర్జ్ఞానం సుస్థిరం స్యాత్సుపుష్కలం .
బ్రహ్మైతదద్వితీయం వై గీయతే బహుధర్షిభిః

11-9-32
శ్రీభగవానువాచ
ఇత్యుక్త్వా స యదుం విప్రస్తమామంత్ర్య గభీరధీః .
వందితోఽభ్యర్థితో రాజ్ఞా యయౌ ప్రీతో యథాగతం

11-9-33
అవధూతవచః శ్రుత్వా పూర్వేషాం నః స పూర్వజః .
సర్వసంగవినిర్ముక్తః సమచిత్తో బభూవ హ

11-9-34
ఇతి శ్రీమద్భాగవతే మహాపురాణే పారమహంస్యాం సంహితాయాం
ఏకాదశస్కంధే నవమోఽధ్యాయః