ఏకాదశ స్కంధః : ఏకోనత్రింశోఽధ్యాయః - 29
11-29-1
ఉద్ధవ ఉవాచ
సుదుశ్చరామిమాం మన్యే యోగచర్యామనాత్మనః .
యథాంజసా పుమాన్ సిద్ధ్యేత్తన్మే బ్రూహ్యంజసాచ్యుత
11-29-2
ప్రాయశః పుండరీకాక్ష యుంజంతో యోగినో మనః .
విషీదంత్యసమాధానాన్మనోనిగ్రహకర్శితాః
11-29-3
అథాత ఆనందదుఘం పదాంబుజం
హంసాః శ్రయేరన్నరవిందలోచన .
సుఖం ను విశ్వేశ్వర యోగకర్మభి-
స్త్వన్మాయయామీ విహతా న మానినః
11-29-4
కిం చిత్రమచ్యుత తవైతదశేషబంధో
దాసేష్వనన్యశరణేషు యదాత్మసాత్త్వం .
యోఽరోచయత్సహ మృగైః స్వయమీశ్వరాణాం
శ్రీమత్కిరీటతటపీడితపాదపీఠః
11-29-5
తం త్వాఖిలాత్మదయితేశ్వరమాశ్రితానాం
సర్వార్థదం స్వకృతవిద్విసృజేత కో ను .
కో వా భజేత్కిమపి విస్మృతయేఽనుభూత్యై
కిం వా భవేన్న తవ పాదరజోజుషాం నః
11-29-6
నైవోపయంత్యపచితిం కవయస్తవేశ
బ్రహ్మాయుషాపి కృతమృద్ధముదః స్మరంతః .
యోఽన్తర్బహిస్తనుభృతామశుభం విధున్వ-
న్నాచార్యచైత్త్యవపుషా స్వగతిం వ్యనక్తి
11-29-7
శ్రీశుక ఉవాచ
ఇత్యుద్ధవేనాత్యనురక్తచేతసా
పృష్టో జగత్క్రీడనకః స్వశక్తిభిః .
గృహీతమూర్తిత్రయ ఈశ్వరేశ్వరో
జగాద సప్రేమమనోహరస్మితః
11-29-8
శ్రీభగవానువాచ
హంత తే కథయిష్యామి మమ ధర్మాన్ సుమంగలాన్ .
యాన్ శ్రద్ధయాఽఽచరన్ మర్త్యో మృత్యుం జయతి దుర్జయం
11-29-9
కుర్యాత్సర్వాణి కర్మాణి మదర్థం శనకైః స్మరన్ .
మయ్యర్పితమనశ్చిత్తో మద్ధర్మాత్మమనోరతిః
11-29-10
దేశాన్ పుణ్యానాశ్రయేత మద్భక్తైః సాధుభిః శ్రితాన్ .
దేవాసురమనుష్యేషు మద్భక్తాచరితాని చ
11-29-11
పృథక్ సత్రేణ వా మహ్యం పర్వయాత్రామహోత్సవాన్ .
కారయేద్గీతనృత్యాద్యైర్మహారాజవిభూతిభిః
11-29-12
మామేవ సర్వభూతేషు బహిరంతరపావృతం .
ఈక్షేతాత్మని చాత్మానం యథా ఖమమలాశయః
11-29-13
ఇతి సర్వాణి భూతాని మద్భావేన మహాద్యుతే .
సభాజయన్ మన్యమానో జ్ఞానం కేవలమాశ్రితః
11-29-14
బ్రాహ్మణే పుల్కసే స్తేనే బ్రహ్మణ్యేఽర్కే స్ఫులింగకే .
అక్రూరే క్రూరకే చైవ సమదృక్ పండితో మతః
11-29-15
నరేష్వభీక్ష్ణం మద్భావం పుంసో భావయతోఽచిరాత్ .
స్పర్ధాసూయాతిరస్కారాః సాహంకారా వియంతి హి
11-29-16
విసృజ్య స్మయమానాన్ స్వాన్ దృశం వ్రీడాం చ దైహికీం .
ప్రణమేద్దండవద్భూమావాశ్వచాండాలగోఖరం
11-29-17
యావత్సర్వేషు భూతేషు మద్భావో నోపజాయతే .
తావదేవముపాసీత వాఙ్ మనఃకాయవృత్తిభిః
11-29-18
సర్వం బ్రహ్మాత్మకం తస్య విద్యయాత్మమనీషయా .
పరిపశ్యన్నుపరమేత్సర్వతో ముక్తసంశయః
11-29-19
అయం హి సర్వకల్పానాం సధ్రీచీనో మతో మమ .
మద్భావః సర్వభూతేషు మనోవాక్కాయవృత్తిభిః
11-29-20
న హ్యంగోపక్రమే ధ్వంసో మద్ధర్మస్యోద్ధవాణ్వపి .
మయా వ్యవసితః సమ్యఙ్ నిర్గుణత్వాదనాశిషః
11-29-21
యో యో మయి పరే ధర్మః కల్ప్యతే నిష్ఫలాయ చేత్ .
తదాయాసో నిరర్థః స్యాద్భయాదేరివ సత్తమ
11-29-22
ఏషా బుద్ధిమతాం బుద్ధిర్మనీషా చ మనీషిణాం .
యత్సత్యమనృతేనేహ మర్త్యేనాప్నోతి మామృతం
11-29-23
ఏష తేఽభిహితః కృత్స్నో బ్రహ్మవాదస్య సంగ్రహః .
సమాసవ్యాసవిధినా దేవానామపి దుర్గమః
11-29-24
అభీక్ష్ణశస్తే గదితం జ్ఞానం విస్పష్టయుక్తిమత్ .
ఏతద్విజ్ఞాయ ముచ్యేత పురుషో నష్టసంశయః
11-29-25
సువివిక్తం తవ ప్రశ్నం మయైతదపి ధారయేత్ .
సనాతనం బ్రహ్మగుహ్యం పరం బ్రహ్మాధిగచ్ఛతి
11-29-26
య ఏతన్మమ భక్తేషు సంప్రదద్యాత్సుపుష్కలం .
తస్యాహం బ్రహ్మదాయస్య దదామ్యాత్మానమాత్మనా
11-29-27
య ఏతత్సమధీయీత పవిత్రం పరమం శుచి .
స పూయేతాహరహర్మాం జ్ఞానదీపేన దర్శయన్
11-29-28
య ఏతచ్ఛ్రద్ధయా నిత్యమవ్యగ్రః శృణుయాన్నరః .
మయి భక్తిం పరాం కుర్వన్ కర్మభిర్న స బధ్యతే
11-29-29
అప్యుద్ధవ త్వయా బ్రహ్మ సఖే సమవధారితం .
అపి తే విగతో మోహః శోకశ్చాసౌ మనోభవః
11-29-30
నైతత్త్వయా దాంభికాయ నాస్తికాయ శఠాయ చ .
అశుశ్రూషోరభక్తాయ దుర్వినీతాయ దీయతాం
11-29-31
ఏతైర్దోషైర్విహీనాయ బ్రహ్మణ్యాయ ప్రియాయ చ .
సాధవే శుచయే బ్రూయాద్భక్తిః స్యాచ్ఛూద్రయోషితాం
11-29-32
నైతద్విజ్ఞాయ జిజ్ఞాసోర్జ్ఞాతవ్యమవశిష్యతే .
పీత్వా పీయూషమమృతం పాతవ్యం నావశిష్యతే
11-29-33
జ్ఞానే కర్మణి యోగే చ వార్తాయాం దండధారణే .
యావానర్థో నృణాం తాత తావాంస్తేఽహం చతుర్విధః
11-29-34
మర్త్యో యదా త్యక్తసమస్తకర్మా
నివేదితాత్మా విచికీర్షితో మే .
తదామృతత్వం ప్రతిపద్యమానో
మయాత్మభూయాయ చ కల్పతే వై
11-29-35
శ్రీశుక ఉవాచ
స ఏవమాదర్శితయోగమార్గ-
స్తదోత్తమశ్లోకవచో నిశమ్య .
బద్ధాంజలిః ప్రీత్యుపరుద్ధకంఠో
న కించిదూచేఽశ్రుపరిప్లుతాక్షః
11-29-36
విష్టభ్య చిత్తం ప్రణయావఘూర్ణం
ధైర్యేణ రాజన్ బహుమన్యమానః .
కృతాంజలిః ప్రాహ యదుప్రవీరం
శీర్ష్ణా స్పృశంస్తచ్చరణారవిందం
11-29-37
ఉద్ధవ ఉవాచ
విద్రావితో మోహమహాంధకారో
య ఆశ్రితో మే తవ సన్నిధానాత్ .
విభావసోః కిం ను సమీపగస్య
శీతం తమో భీః ప్రభవంత్యజాద్య
11-29-38
ప్రత్యర్పితో మే భవతానుకంపినా
భృత్యాయ విజ్ఞానమయః ప్రదీపః .
హిత్వా కృతజ్ఞస్తవ పాదమూలం
కోఽన్యం సమీయాచ్ఛరణం త్వదీయం
11-29-39
వృక్ణశ్చ మే సుదృఢః స్నేహపాశో
దాశార్హవృష్ణ్యంధకసాత్వతేషు .
ప్రసారితః సృష్టివివృద్ధయే త్వయా
స్వమాయయా హ్యాత్మసుబోధహేతినా
11-29-40
నమోఽస్తు తే మహాయోగిన్ ప్రపన్నమనుశాధి మాం .
యథా త్వచ్చరణాంభోజే రతిః స్యాదనపాయినీ
11-29-41
శ్రీభగవానువాచ
గచ్ఛోద్ధవ మయాదిష్టో బదర్యాఖ్యం మమాశ్రమం .
తత్ర మత్పాదతీర్థోదే స్నానోపస్పర్శనైః శుచిః
11-29-42
ఈక్షయాలకనందాయా విధూతాశేషకల్మషః .
వసానో వల్కలాన్యంగ వన్యభుక్ సుఖనిఃస్పృహః
11-29-43
తితిక్షుర్ద్వంద్వమాత్రాణాం సుశీలః సంయతేంద్రియః .
శాంతః సమాహితధియా జ్ఞానవిజ్ఞానసంయుతః
11-29-44
మత్తోఽనుశిక్షితం యత్తే వివిక్తమనుభావయన్ .
మయ్యావేశితవాక్ చిత్తో మద్ధర్మనిరతో భవ .
అతివ్రజ్య గతీస్తిస్రో మామేష్యసి తతః పరం
11-29-45
శ్రీశుక ఉవాచ
స ఏవముక్తో హరిమేధసోద్ధవః
ప్రదక్షిణం తం పరిసృత్య పాదయోః .
శిరో నిధాయాశ్రుకలాభిరార్ద్రధీ-
ర్న్యషించదద్వంద్వపరోఽప్యపక్రమే
11-29-46
సుదుస్త్యజస్నేహవియోగకాతరో
న శక్నువంస్తం పరిహాతుమాతురః .
కృచ్ఛ్రం యయౌ మూర్ధని భర్తృపాదుకే
బిభ్రన్నమస్కృత్య యయౌ పునః పునః
11-29-47
తతస్తమంతర్హృది సన్నివేశ్య
గతో మహాభాగవతో విశాలాం .
యథోపదిష్టాం జగదేకబంధునా
తపః సమాస్థాయ హరేరగాద్గతిం
11-29-48
య ఏతదానందసముద్రసంభృతం
జ్ఞానామృతం భాగవతాయ భాషితం .
కృష్ణేన యోగేశ్వరసేవితాంఘ్రిణా
సచ్ఛ్రద్ధయాసేవ్య జగద్విముచ్యతే
11-29-49
భవభయమపహంతుం జ్ఞానవిజ్ఞానసారం
నిగమకృదుపజహ్రే భృంగవద్వేదసారం .
అమృతముదధితశ్చాపాయయద్భృత్యవర్గాన్
పురుషమృషభమాద్యం కృష్ణసంజ్ఞం నతోఽస్మి
11-29-50
ఇతి శ్రీమద్భాగవతే మహాపురాణే పారమహంస్యాం సంహితాయాం
ఏకాదశస్కంధే ఏకోనత్రింశోఽధ్యాయః