పోతన తెలుగు భాగవతము

ఏకాదశ స్కంధః : ద్వాదశోఽధ్యాయః - 12

• Print
• Email
• Share on FaceBook
• Share on Twitter

11-12-2
వ్రతాని యజ్ఞశ్ఛందాంసి తీర్థాని నియమా యమాః .
యథావరుంధే సత్సంగః సర్వసంగాపహో హి మాం

11-12-3
సత్సంగేన హి దైతేయా యాతుధానా మృగాః ఖగాః .
గంధర్వాప్సరసో నాగాః సిద్ధాశ్చారణగుహ్యకాః

11-12-4
విద్యాధరా మనుష్యేషు వైశ్యాః శూద్రాః స్త్రియోఽన్త్యజాః .
రజస్తమఃప్రకృతయస్తస్మింస్తస్మిన్ యుగేఽనఘ

11-12-5
బహవో మత్పదం ప్రాప్తాస్త్వాష్ట్రకాయాధవాదయః .
వృషపర్వా బలిర్బాణో మయశ్చాథ విభీషణః

11-12-6
సుగ్రీవో హనుమాన్ ఋక్షో గజో గృధ్రో వణిక్పథః .
వ్యాధః కుబ్జా వ్రజే గోప్యో యజ్ఞపత్న్యస్తథాపరే

11-12-7
తే నాధీతశ్రుతిగణా నోపాసితమహత్తమాః .
అవ్రతాతప్తతపసః సత్సంగాన్మాముపాగతాః

11-12-8
కేవలేన హి భావేన గోప్యో గావో నగా మృగాః .
యేఽన్యే మూఢధియో నాగాః సిద్ధా మామీయురంజసా

11-12-9
యం న యోగేన సాంఖ్యేన దానవ్రతతపోఽధ్వరైః .
వ్యాఖ్యాస్వాధ్యాయసన్న్యాసైః ప్రాప్నుయాద్యత్నవానపి

11-12-10
రామేణ సార్ధం మథురాం ప్రణీతే
శ్వాఫల్కినా మయ్యనురక్తచిత్తాః .
విగాఢభావేన న మే వియోగ-
తీవ్రాధయోఽన్యం దదృశుః సుఖాయ

11-12-11
తాస్తాః క్షపాః ప్రేష్ఠతమేన నీతా
మయైవ వృందావనగోచరేణ .
క్షణార్ధవత్తాః పునరంగ తాసాం
హీనా మయా కల్పసమా బభూవుః

11-12-12
తా నావిదన్ మయ్యనుషంగబద్ధధియః
స్వమాత్మానమదస్తథేదం .
యథా సమాధౌ మునయోఽబ్ధితోయే
నద్యః ప్రవిష్టా ఇవ నామరూపే

11-12-13
మత్కామా రమణం జారమస్వరూపవిదోఽబలాః .
బ్రహ్మ మాం పరమం ప్రాపుః సంగాచ్ఛతసహస్రశః

11-12-14
తస్మాత్త్వముద్ధవోత్సృజ్య చోదనాం ప్రతిచోదనాం .
ప్రవృత్తం చ నివృత్తం చ శ్రోతవ్యం శ్రుతమేవ చ

11-12-15
మామేకమేవ శరణమాత్మానం సర్వదేహినాం .
యాహి సర్వాత్మభావేన మయా స్యా హ్యకుతోభయః

11-12-16
ఉద్ధవ ఉవాచ
సంశయః శృణ్వతో వాచం తవ యోగేశ్వరేశ్వర .
న నివర్తత ఆత్మస్థో యేన భ్రామ్యతి మే మనః

11-12-17
శ్రీభగవానువాచ
స ఏష జీవో వివరప్రసూతిః
ప్రాణేన ఘోషేణ గుహాం ప్రవిష్టః .
మనోమయం సూక్ష్మముపేత్య రూపం
మాత్రా స్వరో వర్ణ ఇతి స్థవిష్ఠః

11-12-18
యథానలః ఖేఽనిలబంధురూష్మా
బలేన దారుణ్యధిమథ్యమానః .
అణుః ప్రజాతో హవిషా సమిధ్యతే
తథైవ మే వ్యక్తిరియం హి వాణీ

11-12-19
ఏవం గదిః కర్మగతిర్విసర్గో
ఘ్రాణో రసో దృక్స్పర్శః శ్రుతిశ్చ .
సంకల్పవిజ్ఞానమథాభిమానః
సూత్రం రజఃసత్త్వతమోవికారః

11-12-20
అయం హి జీవస్త్రివృదబ్జయోనిరవ్యక్త
ఏకో వయసా స ఆద్యః .
విశ్లిష్టశక్తిర్బహుధేవ భాతి
బీజాని యోనిం ప్రతిపద్య యద్వత్

11-12-21
యస్మిన్నిదం ప్రోతమశేషమోతం
పటో యథా తంతువితానసంస్థః .
య ఏష సంసారతరుః పురాణః
కర్మాత్మకః పుష్పఫలే ప్రసూతే

11-12-22
ద్వే అస్య బీజే శతమూలస్త్రినాలః
పంచస్కంధః పంచరసప్రసూతిః .
దశైకశాఖో ద్విసుపర్ణనీడస్త్రివల్కలో
ద్విఫలోఽర్కం ప్రవిష్టః

11-12-23
అదంతి చైకం ఫలమస్య గృధ్రా
గ్రామేచరా ఏకమరణ్యవాసాః .
హంసా య ఏకం బహురూపమిజ్యైర్మాయామయం
వేద స వేద వేదం

11-12-24
ఏవం గురూపాసనయైకభక్త్యా
విద్యాకుఠారేణ శితేన ధీరః
వివృశ్చ్య జీవాశయమప్రమత్తః
సంపద్య చాత్మానమథ త్యజాస్త్రం

11-12-25
ఇతి శ్రీమద్భాగవతే మహాపురాణే పారమహంస్యాం సంహితాయాం
ఏకాదశస్కంధే ద్వాదశోఽధ్యాయః