ఏకాదశ స్కంధః : అష్టమోఽధ్యాయః - 8
11-8-1
బ్రాహ్మణ ఉవాచ
సుఖమైంద్రియకం రాజన్ స్వర్గే నరక ఏవ చ .
దేహినాం యద్యథా దుఃఖం తస్మాన్నేచ్ఛేత తద్బుధః
11-8-2
గ్రాసం సుమృష్టం విరసం మహాంతం స్తోకమేవ వా .
యదృచ్ఛయైవాపతితం గ్రసేదాజగరోఽక్రియః
11-8-3
శయీతాహాని భూరీణి నిరాహారోఽనుపక్రమః .
యది నోపనమేద్గ్రాసో మహాహిరివ దిష్టభుక్
11-8-4
ఓజః సహో బలయుతం బిభ్రద్దేహమకర్మకం .
శయానో వీతనిద్రశ్చ నేహేతేంద్రియవానపి
11-8-5
మునిః ప్రసన్నగంభీరో దుర్విగాహ్యో దురత్యయః .
అనంతపారో హ్యక్షోభ్యః స్తిమితోద ఇవార్ణవః
11-8-6
సమృద్ధకామో హీనో వా నారాయణపరో మునిః .
నోత్సర్పేత న శుష్యేత సరిద్భిరివ సాగరః
11-8-7
దృష్ట్వా స్త్రియం దేవమాయాం తద్భావైరజితేంద్రియః .
ప్రలోభితః పతత్యంధే తమస్యగ్నౌ పతంగవత్
11-8-8
యోషిద్ధిరణ్యాభరణాంబరాదిద్రవ్యేషు
మాయారచితేషు మూఢః .
ప్రలోభితాత్మా హ్యుపభోగబుద్ధ్యా
పతంగవన్నశ్యతి నష్టదృష్టిః
11-8-9
స్తోకం స్తోకం గ్రసేద్గ్రాసం దేహో వర్తేత యావతా .
గృహానహింసన్నాతిష్ఠేద్వృత్తిం మాధుకరీం మునిః
11-8-10
అణుభ్యశ్చ మహద్భ్యశ్చ శాస్త్రేభ్యః కుశలో నరః .
సర్వతః సారమాదద్యాత్పుష్పేభ్య ఇవ షట్పదః
11-8-11
సాయంతనం శ్వస్తనం వా న సంగృహ్ణీత భిక్షితం .
పాణిపాత్రోదరామత్రో మక్షికేవ న సంగ్రహీ
11-8-12
సాయంతనం శ్వస్తనం వా న సంగృహ్ణీత భిక్షుకః .
మక్షికా ఇవ సంగృహ్ణన్ సహ తేన వినశ్యతి
11-8-13
పదాపి యువతీం భిక్షుర్న స్పృశేద్దారవీమపి .
స్పృశన్ కరీవ బధ్యేత కరిణ్యా అంగసంగతః
11-8-14
నాధిగచ్ఛేత్స్త్రియం ప్రాజ్ఞః కర్హిచిన్మృత్యుమాత్మనః .
బలాధికైః స హన్యేత గజైరన్యైర్గజో యథా
11-8-15
న దేయం నోపభోగ్యం చ లుబ్ధైర్యద్దుఃఖసంచితం .
భుంక్తే తదపి తచ్చాన్యో మధుహేవార్థవిన్మధు
11-8-16
సుదుఃఖోపార్జితైర్విత్తైరాశాసానాం గృహాశిషః .
మధుహేవాగ్రతో భుంక్తే యతిర్వై గృహమేధినాం
11-8-17
గ్రామ్యగీతం న శృణుయాద్యతిర్వనచరః క్వచిత్ .
శిక్షేత హరిణాద్బద్ధాన్మృగయోర్గీతమోహితాత్
11-8-18
నృత్యవాదిత్రగీతాని జుషన్ గ్రామ్యాణి యోషితాం .
ఆసాం క్రీడనకో వశ్య ఋష్యశృంగో మృగీసుతః
11-8-19
జిహ్వయాతిప్రమాథిన్యా జనో రసవిమోహితః .
మృత్యుమృచ్ఛత్యసద్బుద్ధిర్మీనస్తు బడిశైర్యథా
11-8-20
ఇంద్రియాణి జయంత్యాశు నిరాహారా మనీషిణః .
వర్జయిత్వా తు రసనం తన్నిరన్నస్య వర్ధతే
11-8-21
తావజ్జితేంద్రియో న స్యాద్విజితాన్యేంద్రియః పుమాన్ .
న జయేద్రసనం యావజ్జితం సర్వం జితే రసే
11-8-22
పింగలా నామ వేశ్యాసీద్విదేహనగరే పురా .
తస్యా మే శిక్షితం కించిన్నిబోధ నృపనందన
11-8-23
సా స్వైరిణ్యేకదా కాంతం సంకేత ఉపనేష్యతీ .
అభూత్కాలే బహిర్ద్వారి బిభ్రతీ రూపముత్తమం
11-8-24
మార్గ ఆగచ్ఛతో వీక్ష్య పురుషాన్ పురుషర్షభ .
తాన్ శుల్కదాన్ విత్తవతః కాంతాన్ మేనేఽర్థకాముకా
11-8-25
ఆగతేష్వపయాతేషు సా సంకేతోపజీవినీ .
అప్యన్యో విత్తవాన్ కోఽపి మాముపైష్యతి భూరిదః
11-8-26
ఏవం దురాశయా ధ్వస్తనిద్రా ద్వార్యవలంబతీ .
నిర్గచ్ఛంతీ ప్రవిశతీ నిశీథం సమపద్యత
11-8-27
తస్యా విత్తాశయా శుష్యద్వక్త్రాయా దీనచేతసః .
నిర్వేదః పరమో జజ్ఞే చింతాహేతుః సుఖావహః
11-8-28
తస్యా నిర్విణ్ణచిత్తాయా గీతం శృణు యథా మమ .
నిర్వేద ఆశాపాశానాం పురుషస్య యథా హ్యసిః
11-8-29
న హ్యంగాజాతనిర్వేదో దేహబంధం జిహాసతి .
యథా విజ్ఞానరహితో మనుజో మమతాం నృప
11-8-30
పింగలోవాచ
అహో మే మోహవితతిం పశ్యతావిజితాత్మనః .
యా కాంతాదసతః కామం కామయే యేన బాలిశా
11-8-31
సంతం సమీపే రమణం రతిప్రదం
విత్తప్రదం నిత్యమిమం విహాయ .
అకామదం దుఃఖభయాధిశోకమోహప్రదం
తుచ్ఛమహం భజేఽజ్ఞా
11-8-32
అహో మయాఽఽత్మా పరితాపితో వృథా
సాంకేత్యవృత్త్యాతివిగర్హ్యవార్తయా .
స్త్రైణాన్నరాద్యార్థతృషోఽనుశోచ్యాత్
క్రీతేన విత్తం రతిమాత్మనేచ్ఛతీ
11-8-33
యదస్థిభిర్నిర్మితవంశవంశ్యస్థూణం
త్వచా రోమనఖైః పినద్ధం .
క్షరన్నవద్వారమగారమేతద్విణ్మూత్రపూర్ణం
మదుపైతి కాన్యా
11-8-34
విదేహానాం పురే హ్యస్మిన్నహమేకైవ మూఢధీః .
యాన్యమిచ్ఛంత్యసత్యస్మాదాత్మదాత్కామమచ్యుతాత్
11-8-35
సుహృత్ప్రేష్ఠతమో నాథ ఆత్మా చాయం శరీరిణాం .
తం విక్రీయాత్మనైవాహం రమేఽనేన యథా రమా
11-8-36
కియత్ప్రియం తే వ్యభజన్ కామా యే కామదా నరాః .
ఆద్యంతవంతో భార్యాయా దేవా వా కాలవిద్రుతాః
11-8-37
నూనం మే భగవాన్ ప్రీతో విష్ణుః కేనాపి కర్మణా .
నిర్వేదోఽయం దురాశాయా యన్మే జాతః సుఖావహః
11-8-38
మైవం స్యుర్మందభాగ్యాయాః క్లేశా నిర్వేదహేతవః .
యేనానుబంధం నిర్హృత్య పురుషః శమమృచ్ఛతి
11-8-39
తేనోపకృతమాదాయ శిరసా గ్రామ్యసంగతాః .
త్యక్త్వా దురాశాః శరణం వ్రజామి తమధీశ్వరం
11-8-40
సంతుష్టా శ్రద్దధత్యేతద్యథా లాభేన జీవతీ .
విహరామ్యమునైవాహమాత్మనా రమణేన వై
11-8-41
సంసారకూపే పతితం విషయైర్ముషితేక్షణం .
గ్రస్తం కాలాహినాత్మానం కోఽన్యస్త్రాతుమధీశ్వరః
11-8-42
ఆత్మైవ హ్యాత్మనో గోప్తా నిర్విద్యేత యదాఖిలాత్ .
అప్రమత్త ఇదం పశ్యేద్గ్రస్తం కాలాహినా జగత్
11-8-43
బ్రాహ్మణ ఉవాచ
ఏవం వ్యవసితమతిర్దురాశాం కాంతతర్షజాం .
ఛిత్త్వోపశమమాస్థాయ శయ్యాముపవివేశ సా
11-8-44
ఆశా హి పరమం దుఃఖం నైరాశ్యం పరమం సుఖం .
యథా సంఛిద్య కాంతాశాం సుఖం సుష్వాప పింగలా
11-8-45
ఇతి శ్రీమద్భాగవతే మహాపురాణే పారమహంస్యాం సంహితాయాం
ఏకాదశస్కంధే అష్టమోఽధ్యాయః