దశమ స్కంధః- ఉత్తరార్థః : త్రిషష్టితమోఽధ్యాయః - 63
10(2)-63-1
శ్రీశుక ఉవాచ
అపశ్యతాం చానిరుద్ధం తద్బంధూనాం చ భారత .
చత్వారో వార్షికా మాసా వ్యతీయురనుశోచతాం
10(2)-63-2
నారదాత్తదుపాకర్ణ్య వార్తాం బద్ధస్య కర్మ చ .
ప్రయయుః శోణితపురం వృష్ణయః కృష్ణదేవతాః
10(2)-63-3
ప్రద్యుమ్నో యుయుధానశ్చ గదః సాంబోఽథ సారణః .
నందోపనందభద్రాద్యా రామకృష్ణానువర్తినః
10(2)-63-4
అక్షౌహిణీభిర్ద్వాదశభిః సమేతాః సర్వతోదిశం .
రురుధుర్బాణనగరం సమంతాత్సాత్వతర్షభాః
10(2)-63-5
భజ్యమానపురోద్యానప్రాకారాట్టాలగోపురం .
ప్రేక్షమాణో రుషావిష్టస్తుల్యసైన్యోఽభినిర్యయౌ
10(2)-63-6
బాణార్థే భగవాన్ రుద్రః ససుతైః ప్రమథైర్వృతః .
ఆరుహ్య నందివృషభం యుయుధే రామకృష్ణయోః
10(2)-63-7
ఆసీత్సుతుములం యుద్ధమద్భుతం రోమహర్షణం .
కృష్ణశంకరయో రాజన్ ప్రద్యుమ్నగుహయోరపి
10(2)-63-8
కుంభాండకూపకర్ణాభ్యాం బలేన సహ సంయుగః .
సాంబస్య బాణపుత్రేణ బాణేన సహ సాత్యకేః
10(2)-63-9
బ్రహ్మాదయః సురాధీశా మునయః సిద్ధచారణాః .
గంధర్వాప్సరసో యక్షా విమానైర్ద్రష్టుమాగమన్
10(2)-63-10
శంకరానుచరాన్ శౌరిర్భూతప్రమథగుహ్యకాన్ .
డాకినీర్యాతుధానాంశ్చ వేతాలాన్ సవినాయకాన్
10(2)-63-11
ప్రేతమాతృపిశాచాంశ్చ కుష్మాండాన్ బ్రహ్మరాక్షసాన్ .
ద్రావయామాస తీక్ష్ణాగ్రైః శరైః శార్ఙ్గధనుశ్చ్యుతైః
10(2)-63-12
పృథగ్విధాని ప్రాయుంక్త పినాక్యస్త్రాణి శార్ఙ్గిణే .
ప్రత్యస్త్రైః శమయామాస శార్ఙ్గపాణిరవిస్మితః
10(2)-63-13
బ్రహ్మాస్త్రస్య చ బ్రహ్మాస్త్రం వాయవ్యస్య చ పార్వతం .
ఆగ్నేయస్య చ పార్జన్యం నైజం పాశుపతస్య చ
10(2)-63-14
మోహయిత్వా తు గిరిశం జృంభణాస్త్రేణ జృంభితం .
బాణస్య పృతనాం శౌరిర్జఘానాసిగదేషుభిః
10(2)-63-15
స్కందః ప్రద్యుమ్నబాణౌఘైరర్ద్యమానః సమంతతః .
అసృగ్విముంచన్ గాత్రేభ్యః శిఖినాపాక్రమద్రణాత్
10(2)-63-16
కుంభాండః కూపకర్ణశ్చ పేతతుర్ముసలార్దితౌ .
దుద్రువుస్తదనీకాని హతనాథాని సర్వతః
10(2)-63-17
విశీర్యమాణం స్వబలం దృష్ట్వా బాణోఽత్యమర్షణః .
కృష్ణమభ్యద్రవత్సంఖ్యే రథీ హిత్వైవ సాత్యకిం
10(2)-63-18
ధనూంష్యాకృష్య యుగపద్బాణః పంచశతాని వై .
ఏకైకస్మిన్ శరౌ ద్వౌ ద్వౌ సందధే రణదుర్మదః
10(2)-63-19
తాని చిచ్ఛేద భగవాన్ ధనూంషి యుగపద్ధరిః .
సారథిం రథమశ్వాంశ్చ హత్వా శంఖమపూరయత్
10(2)-63-20
తన్మాతా కోటరా నామ నగ్నా ముక్తశిరోరుహా .
పురోఽవతస్థే కృష్ణస్య పుత్రప్రాణరిరక్షయా
10(2)-63-21
తతస్తిర్యఙ్ముఖో నగ్నామనిరీక్షన్ గదాగ్రజః .
బాణశ్చ తావద్విరథశ్ఛిన్నధన్వావిశత్పురం
10(2)-63-22
విద్రావితే భూతగణే జ్వరస్తు త్రిశిరాస్త్రిపాత్ .
అభ్యధావత దాశార్హం దహన్నివ దిశో దశ
10(2)-63-23
అథ నారాయణో దేవస్తం దృష్ట్వా వ్యసృజజ్జ్వరం .
మాహేశ్వరో వైష్ణవశ్చ యుయుధాతే జ్వరావుభౌ
10(2)-63-24
మాహేశ్వరః సమాక్రందన్ వైష్ణవేన బలార్దితః .
అలబ్ధ్వాభయమన్యత్ర భీతో మాహేశ్వరో జ్వరః .
శరణార్థీ హృషీకేశం తుష్టావ ప్రయతాంజలిః
10(2)-63-25
జ్వర ఉవాచ
నమామి త్వానంతశక్తిం పరేశం
సర్వాత్మానం కేవలం జ్ఞప్తిమాత్రం .
విశ్వోత్పత్తిస్థానసంరోధహేతుం
యత్తద్బ్రహ్మ బ్రహ్మలింగం ప్రశాంతం
10(2)-63-26
కాలో దైవం కర్మ జీవః స్వభావో
ద్రవ్యం క్షేత్రం ప్రాణ ఆత్మా వికారః .
తత్సంఘాతో బీజరోహప్రవాహ-
స్త్వన్మాయైషా తన్నిషేధం ప్రపద్యే
10(2)-63-27
నానాభావైర్లీలయైవోపపన్నైర్దేవాన్
సాధూన్ లోకసేతూన్ బిభర్షి .
హంస్యున్మార్గాన్ హింసయా వర్తమానాన్
జన్మైతత్తే భారహారాయ భూమేః
10(2)-63-28
తప్తోఽహం తే తేజసా దుఃసహేన
శాంతోగ్రేణాత్యుల్బణేన జ్వరేణ .
తావత్తాపో దేహినాం తేఽఙ్ఘ్రిమూలం
నో సేవేరన్ యావదాశానుబద్ధాః
10(2)-63-29
శ్రీభగవానువాచ
త్రిశిరస్తే ప్రసన్నోఽస్మి వ్యేతు తే మజ్జ్వరాద్భయం .
యో నౌ స్మరతి సంవాదం తస్య త్వన్న భవేద్భయం
10(2)-63-30
ఇత్యుక్తోఽచ్యుతమానమ్య గతో మాహేశ్వరో జ్వరః .
బాణస్తు రథమారూఢః ప్రాగాద్యోత్స్యన్ జనార్దనం
10(2)-63-31
తతో బాహుసహస్రేణ నానాయుధధరోఽసురః .
ముమోచ పరమక్రుద్ధో బాణాంశ్చక్రాయుధే నృప
10(2)-63-32
తస్యాస్యతోఽస్త్రాణ్యసకృచ్చక్రేణ క్షురనేమినా .
చిచ్ఛేద భగవాన్ బాహూన్ శాఖా ఇవ వనస్పతేః
10(2)-63-33
బాహుషు ఛిద్యమానేషు బాణస్య భగవాన్ భవః .
భక్తానుకంప్యుపవ్రజ్య చక్రాయుధమభాషత
10(2)-63-34
శ్రీరుద్ర ఉవాచ
త్వం హి బ్రహ్మ పరం జ్యోతిర్గూఢం బ్రహ్మణి వాఙ్మయే .
యం పశ్యంత్యమలాత్మాన ఆకాశమివ కేవలం
10(2)-63-35
నాభిర్నభోఽగ్నిర్ముఖమంబు రేతో
ద్యౌః శీర్షమాశాః శ్రుతిరంఘ్రిరుర్వీ .
చంద్రో మనో యస్య దృగర్క ఆత్మా
అహం సముద్రో జఠరం భుజేంద్రః
10(2)-63-36
రోమాణి యస్యౌషధయోఽమ్బువాహాః
కేశా విరించో ధిషణా విసర్గః .
ప్రజాపతిర్హృదయం యస్య ధర్మః
స వై భవాన్ పురుషో లోకకల్పః
10(2)-63-37
తవావతారోఽయమకుంఠధామన్
ధర్మస్య గుప్త్యై జగతో భవాయ .
వయం చ సర్వే భవతానుభావితా
విభావయామో భువనాని సప్త
10(2)-63-38
త్వమేక ఆద్యః పురుషోఽద్వితీయస్తుర్యః
స్వదృఘేతురహేతురీశః .
ప్రతీయసేఽథాపి యథావికారం
స్వమాయయా సర్వగుణప్రసిద్ధ్యై
10(2)-63-39
యథైవ సూర్యః పిహితశ్ఛాయయా స్వయా
ఛాయాం చ రూపాణి చ సంచకాస్తి .
ఏవం గుణేనాపిహితో గుణాంస్త్వ-
మాత్మప్రదీపో గుణినశ్చ భూమన్
10(2)-63-40
యన్మాయామోహితధియః పుత్రదారగృహాదిషు .
ఉన్మజ్జంతి నిమజ్జంతి ప్రసక్తా వృజినార్ణవే
10(2)-63-41
దేవదత్తమిమం లబ్ధ్వా నృలోకమజితేంద్రియః .
యో నాద్రియేత త్వత్పాదౌ స శోచ్యో హ్యాత్మవంచకః
10(2)-63-42
యస్త్వాం విసృజతే మర్త్య ఆత్మానం ప్రియమీశ్వరం .
విపర్యయేంద్రియార్థార్థం విషమత్త్యమృతం త్యజన్
10(2)-63-43
అహం బ్రహ్మాథ విబుధా మునయశ్చామలాశయాః .
సర్వాత్మనా ప్రపన్నాస్త్వామాత్మానం ప్రేష్ఠమీశ్వరం
10(2)-63-44
తం త్వా జగత్స్థిత్యుదయాంతహేతుం
సమం ప్రశాంతం సుహృదాత్మదైవం .
అనన్యమేకం జగదాత్మకేతం
భవాపవర్గాయ భజామ దేవం
10(2)-63-45
అయం మమేష్టో దయితోఽనువర్తీ
మయాభయం దత్తమముష్య దేవ .
సంపాద్యతాం తద్భవతః ప్రసాదో
యథా హి తే దైత్యపతౌ ప్రసాదః
10(2)-63-46
శ్రీభగవానువాచ
యదాత్థ భగవంస్త్వం నః కరవామ ప్రియం తవ .
భవతో యద్వ్యవసితం తన్మే సాధ్వనుమోదితం
10(2)-63-47
అవధ్యోఽయం మమాప్యేష వైరోచనిసుతోఽసురః .
ప్రహ్లాదాయ వరో దత్తో న వధ్యో మే తవాన్వయః
10(2)-63-48
దర్పోపశమనాయాస్య ప్రవృక్ణా బాహవో మయా .
సూదితం చ బలం భూరి యచ్చ భారాయితం భువః
10(2)-63-49
చత్వారోఽస్య భుజాః శిష్టా భవిష్యంత్యజరామరః .
పార్షదముఖ్యో భవతో నకుతశ్చిద్భయోఽసురః
10(2)-63-50
ఇతి లబ్ధ్వాభయం కృష్ణం ప్రణమ్య శిరసాసురః .
ప్రాద్యుమ్నిం రథమారోప్య సవధ్వా సముపానయత్
10(2)-63-51
అక్షౌహిణ్యా పరివృతం సువాసఃసమలంకృతం .
సపత్నీకం పురస్కృత్య యయౌ రుద్రానుమోదితః
10(2)-63-52
స్వరాజధానీం సమలంకృతాం ధ్వజైః
సతోరణైరుక్షితమార్గచత్వరాం .
వివేశ శంఖానకదుందుభిస్వనై-
రభ్యుద్యతః పౌరసుహృద్ద్విజాతిభిః
10(2)-63-53
య ఏవం కృష్ణవిజయం శంకరేణ చ సంయుగం .
సంస్మరేత్ప్రాతరుత్థాయ న తస్య స్యాత్పరాజయః
10(2)-63-54
ఇతి శ్రీమద్భాగవతే మహాపురాణే పారమహంస్యాం సంహితాయాం
దశమస్కంధే ఉత్తరార్ధే అనిరుద్ధానయనం నామ త్రిషష్టితమోఽధ్యాయః