దశమ స్కంధః- ఉత్తరార్థః : షడశీతితమోఽధ్యాయః - 86
10(2)-86-1
రాజోవాచ
బ్రహ్మన్ వేదితుమిచ్ఛామః స్వసారాం రామకృష్ణయోః .
యథోపయేమే విజయో యా మమాసీత్పితామహీ
10(2)-86-2
శ్రీశుక ఉవాచ
అర్జునస్తీర్థయాత్రాయాం పర్యటన్నవనీం ప్రభుః .
గతః ప్రభాసమశృణోన్మాతులేయీం స ఆత్మనః
10(2)-86-3
దుర్యోధనాయ రామస్తాం దాస్యతీతి న చాపరే .
తల్లిప్సుః స యతిర్భూత్వా త్రిదండీ ద్వారకామగాత్
10(2)-86-4
తత్ర వై వార్షికాన్ మాసానవాత్సీత్స్వార్థసాధకః .
పౌరైః సభాజితోఽభీక్ష్ణం రామేణాజానతా చ సః
10(2)-86-5
ఏకదా గృహమానీయ ఆతిథ్యేన నిమంత్ర్య తం .
శ్రద్ధయోపహృతం భైక్ష్యం బలేన బుభుజే కిల
10(2)-86-6
సోఽపశ్యత్తత్ర మహతీం కన్యాం వీరమనోహరాం .
ప్రీత్యుత్ఫుల్లేక్షణస్తస్యాం భావక్షుబ్ధం మనో దధే
10(2)-86-7
సాపి తం చకమే వీక్ష్య నారీణాం హృదయంగమం .
హసంతీ వ్రీడితాపాంగీ తన్న్యస్తహృదయేక్షణా
10(2)-86-8
తాం పరం సమనుధ్యాయన్నంతరం ప్రేప్సురర్జునః .
న లేభే శం భ్రమచ్చిత్తః కామేనాతిబలీయసా
10(2)-86-9
మహత్యాం దేవయాత్రాయాం రథస్థాం దుర్గనిర్గతాం .
జహారానుమతః పిత్రోః కృష్ణస్య చ మహారథః
10(2)-86-10
రథస్థో ధనురాదాయ శూరాంశ్చారుంధతో భటాన్ .
విద్రావ్య క్రోశతాం స్వానాం స్వభాగం మృగరాడివ
10(2)-86-11
తచ్ఛ్రుత్వా క్షుభితో రామః పర్వణీవ మహార్ణవః .
గృహీతపాదః కృష్ణేన సుహృద్భిశ్చాన్వశామ్యత
10(2)-86-12
ప్రాహిణోత్పారిబర్హాణి వరవధ్వోర్ముదా బలః .
మహాధనోపస్కరేభరథాశ్వనరయోషితః
10(2)-86-13
శ్రీశుక ఉవాచ
కృష్ణస్యాసీద్ద్విజశ్రేష్ఠః శ్రుతదేవ ఇతి శ్రుతః .
కృష్ణైకభక్త్యా పూర్ణార్థః శాంతః కవిరలంపటః
10(2)-86-14
స ఉవాస విదేహేషు మిథిలాయాం గృహాశ్రమీ .
అనీహయాఽఽగతాహార్యనిర్వర్తితనిజక్రియః
10(2)-86-15
యాత్రామాత్రం త్వహరహర్దైవాదుపనమత్యుత .
నాధికం తావతా తుష్టః క్రియాశ్చక్రే యథోచితాః
10(2)-86-16
తథా తద్రాష్ట్రపాలోఽఙ్గ బహులాశ్వ ఇతి శ్రుతః .
మైథిలో నిరహమ్మాన ఉభావప్యచ్యుతప్రియౌ
10(2)-86-17
తయోః ప్రసన్నో భగవాన్ దారుకేణాహృతం రథం .
ఆరుహ్య సాకం మునిభిర్విదేహాన్ ప్రయయౌ ప్రభుః
10(2)-86-18
నారదో వామదేవోఽత్రిః కృష్ణో రామోఽసితోఽరుణిః .
అహం బృహస్పతిః కణ్వో మైత్రేయశ్చ్యవనాదయః
10(2)-86-19
తత్ర తత్ర తమాయాంతం పౌరా జానపదా నృప .
ఉపతస్థుః సార్ఘ్యహస్తా గ్రహైః సూర్యమివోదితం
10(2)-86-20
ఆనర్తధన్వకురుజాంగలకంకమత్స్య-
పాంచాలకుంతిమధుకేకయకోసలార్ణాః .
అన్యే చ తన్ముఖసరోజముదారహాస-
స్నిగ్ధేక్షణం నృప పపుర్దృశిభిర్నృనార్యః
10(2)-86-21
తేభ్యః స్వవీక్షణవినష్టతమిస్రదృగ్భ్యః
క్షేమం త్రిలోకగురురర్థదృశం చ యచ్ఛన్ .
శృణ్వన్ దిగంతధవలం స్వయశోఽశుభఘ్నం
గీతం సురైర్నృభిరగాచ్ఛనకైర్విదేహాన్
10(2)-86-22
తేఽచ్యుతం ప్రాప్తమాకర్ణ్య పౌరా జానపదా నృప .
అభీయుర్ముదితాస్తస్మై గృహీతార్హణపాణయః
10(2)-86-23
దృష్ట్వా త ఉత్తమశ్లోకం ప్రీత్యుత్ఫుల్లాననాశయాః .
కైర్ధృతాంజలిభిర్నేముః శ్రుతపూర్వాంస్తథా మునీన్
10(2)-86-24
స్వానుగ్రహాయ సంప్రాప్తం మన్వానౌ తం జగద్గురుం .
మైథిలః శ్రుతదేవశ్చ పాదయోః పేతతుః ప్రభోః
10(2)-86-25
న్యమంత్రయేతాం దాశార్హమాతిథ్యేన సహ ద్విజైః .
మైథిలః శ్రుతదేవశ్చయుగపత్సంహతాంజలీ
10(2)-86-26
భగవాంస్తదభిప్రేత్య ద్వయోః ప్రియచికీర్షయా .
ఉభయోరావిశద్గేహముభాభ్యాం తదలక్షితః
10(2)-86-27
శ్రోతుమప్యసతాం దూరాన్ జనకః స్వగృహాగతాన్ .
ఆనీతేష్వాసనాగ్ర్యేషు సుఖాసీనాన్ మహామనాః
10(2)-86-28
ప్రవృద్ధభక్త్యా ఉద్ధర్షహృదయాస్రావిలేక్షణః .
నత్వా తదంఘ్రీన్ ప్రక్షాల్య తదపో లోకపావనీః
10(2)-86-29
సకుటుంబో వహన్ మూర్ధ్నా పూజయాంచక్ర ఈశ్వరాన్ .
గంధమాల్యాంబరాకల్పధూపదీపార్ఘ్యగోవృషైః
10(2)-86-30
వాచా మధురయా ప్రీణన్నిదమాహాన్నతర్పితాన్ .
పాదావంకగతౌ విష్ణోః సంస్పృశంఛనకైర్ముదా
10(2)-86-31
రాజోవాచ
భవాన్ హి సర్వభూతానామాత్మా సాక్షీ స్వదృగ్విభో .
అథ నస్త్వత్పదాంభోజం స్మరతాం దర్శనం గతః
10(2)-86-32
స్వవచస్తదృతం కర్తుమస్మద్దృగ్గోచరో భవాన్ .
యదాత్థైకాంతభక్తాన్మే నానంతః శ్రీరజః ప్రియః
10(2)-86-33
కో ను త్వచ్చరణాంభోజమేవంవిద్విసృజేత్పుమాన్ .
నిష్కించనానాం శాంతానాం మునీనాం యస్త్వమాత్మదః
10(2)-86-34
యోఽవతీర్య యదోర్వంశే నృణాం సంసరతామిహ .
యశో వితేనే తచ్ఛాంత్యై త్రైలోక్యవృజినాపహం
10(2)-86-35
నమస్తుభ్యం భగవతే కృష్ణాయాకుంఠమేధసే .
నారాయణాయ ఋషయే సుశాంతం తప ఈయుషే
10(2)-86-36
దినాని కతిచిద్భూమన్ గృహాన్ నో నివస ద్విజైః .
సమేతః పాదరజసా పునీహీదం నిమేః కులం
10(2)-86-37
ఇత్యుపామంత్రితో రాజ్ఞా భగవాంల్లోకభావనః .
ఉవాస కుర్వన్ కల్యాణం మిథిలానరయోషితాం
10(2)-86-38
శ్రుతదేవోఽచ్యుతం ప్రాప్తం స్వగృహాంజనకో యథా .
నత్వా మునీన్ సుసంహృష్టో ధున్వన్ వాసో ననర్త హ
10(2)-86-39
తృణపీఠబృషీష్వేతానానీతేషూపవేశ్య సః .
స్వాగతేనాభినంద్యాంఘ్రీన్ సభార్యోఽవనిజే ముదా
10(2)-86-40
తదంభసా మహాభాగ ఆత్మానం స గృహాన్వయం .
స్నాపయాంచక్ర ఉద్ధర్షో లబ్ధసర్వమనోరథః
10(2)-86-41
ఫలార్హణోశీరశివామృతాంబుభి-
ర్మృదా సురభ్యా తులసీకుశాంబుజైః .
ఆరాధయామాస యథోపపన్నయా
సపర్యయా సత్త్వవివర్ధనాంధసా
10(2)-86-42
స తర్కయామాస కుతో మమాన్వభూ-
ద్గృహాంధకుపే పతితస్య సంగమః .
యః సర్వతీర్థాస్పదపాదరేణుభిః
కృష్ణేన చాస్యాత్మనికేతభూసురైః
10(2)-86-43
సూపవిష్టాన్ కృతాతిథ్యాన్ శ్రుతదేవ ఉపస్థితః .
సభార్యస్వజనాపత్య ఉవాచాంఘ్ర్యభిమర్శనః
10(2)-86-44
శ్రుతదేవ ఉవాచ
నాద్య నో దర్శనం ప్రాప్తః పరం పరమపూరుషః .
యర్హీదం శక్తిభిః సృష్ట్వా ప్రవిష్టో హ్యాత్మసత్తయా
10(2)-86-45
యథా శయానః పురుషో మనసైవాత్మమాయయా .
సృష్ట్వా లోకం పరం స్వాప్నమనువిశ్యావభాసతే
10(2)-86-46
శృణ్వతాం గదతాం శశ్వదర్చతాం త్వాభివందతాం .
నృణాం సంవదతామంతర్హృది భాస్యమలాత్మనాం
10(2)-86-47
హృదిస్థోఽప్యతిదూరస్థః కర్మవిక్షిప్తచేతసాం .
ఆత్మశక్తిభిరగ్రాహ్యోఽప్యంత్యుపేతగుణాత్మనాం
10(2)-86-48
నమోఽస్తు తేఽధ్యాత్మవిదాం పరాత్మనే
అనాత్మనే స్వాత్మవిభక్తమృత్యవే .
సకారణాకారణలింగమీయుషే
స్వమాయయాసంవృతరుద్ధదృష్టయే
10(2)-86-49
స త్వం శాధి స్వభృత్యాన్నః కిం దేవ కరవామ హే .
ఏతదంతో నృణాం క్లేశో యద్భవానక్షిగోచరః
10(2)-86-50
శ్రీశుక ఉవాచ
తదుక్తమిత్యుపాకర్ణ్య భగవాన్ ప్రణతార్తిహా .
గృహీత్వా పాణినా పాణిం ప్రహసంస్తమువాచ హ
10(2)-86-51
శ్రీభగవానువాచ
బ్రహ్మంస్తేఽనుగ్రహార్థాయ సంప్రాప్తాన్ విద్ధ్యమూన్ మునీన్ .
సంచరంతి మయా లోకాన్ పునంతః పాదరేణుభిః
10(2)-86-52
దేవాః క్షేత్రాణి తీర్థాని దర్శనస్పర్శనార్చనైః .
శనైః పునంతి కాలేన తదప్యర్హత్తమేక్షయా
10(2)-86-53
బ్రాహ్మణో జన్మనా శ్రేయాన్ సర్వేషాం ప్రాణినామిహ .
తపసా విద్యయా తుష్ట్యా కిము మత్కలయా యుతః
10(2)-86-54
న బ్రాహ్మణాన్మే దయితం రూపమేతచ్చతుర్భుజం .
సర్వవేదమయో విప్రః సర్వదేవమయో హ్యహం
10(2)-86-55
దుష్ప్రజ్ఞా అవిదిత్వైవమవజానంత్యసూయవః .
గురుం మాం విప్రమాత్మానమర్చాదావిజ్యదృష్టయః
10(2)-86-56
చరాచరమిదం విశ్వం భావా యే చాస్య హేతవః .
మద్రూపాణీతి చేతస్యాధత్తే విప్రో మదీక్షయా
10(2)-86-57
తస్మాద్బ్రహ్మఋషీనేతాన్ బ్రహ్మన్ మచ్ఛ్రద్ధయార్చయ .
ఏవం చేదర్చితోఽస్మ్యద్ధా నాన్యథా భూరిభూతిభిః
10(2)-86-58
శ్రీశుక ఉవాచ
స ఇత్థం ప్రభుణాఽఽదిష్టః సహ కృష్ణాన్ ద్విజోత్తమాన్ .
ఆరాధ్యైకాత్మభావేన మైథిలశ్చాప సద్గతిం
10(2)-86-59
ఏవం స్వభక్తయో రాజన్ భగవాన్ భక్తభక్తిమాన్ .
ఉషిత్వాఽఽదిశ్య సన్మార్గం పునర్ద్వారవతీమగాత్
10(2)-86-60
ఇతి శ్రీమద్భాగవతే మహాపురాణే పారమహంస్యాం సంహితాయాం
దశమస్కంధే ఉత్తరార్ధే శ్రుతదేవానుగ్రహో నామ షడశీతితమోఽధ్యాయః