దశమ స్కంధః- ఉత్తరార్థః : ద్విసప్తతితమోఽధ్యాయః - 72
10(2)-72-1
శ్రీశుక ఉవాచ
ఏకదా తు సభామధ్య ఆస్థితో మునిభిర్వృతః .
బ్రాహ్మణైః క్షత్రియైర్వైశ్యైర్భ్రాతృభిశ్చ యుధిష్ఠిరః
10(2)-72-2
ఆచార్యైః కులవృద్ధైశ్చ జ్ఞాతిసంబంధిబాంధవైః .
శృణ్వతామేవ చైతేషామాభాష్యేదమువాచ హ
10(2)-72-3
యుధిష్ఠిర ఉవాచ
క్రతురాజేన గోవింద రాజసూయేన పావనీః .
యక్ష్యే విభూతీర్భవతస్తత్సంపాదయ నః ప్రభో
10(2)-72-4
త్వత్పాదుకే అవిరతం పరి యే చరంతి
ధ్యాయంత్యభద్రనశనే శుచయో గృణంతి .
విందంతి తే కమలనాభ భవాపవర్గమాశాసతే
యది త ఆశిష ఈశ నాన్యే
10(2)-72-5
తద్దేవదేవ భవతశ్చరణారవింద-
సేవానుభావమిహ పశ్యతు లోక ఏషః .
యే త్వాం భజంతి న భజంత్యుత వోభయేషాం
నిష్ఠాం ప్రదర్శయ విభో కురుసృంజయానాం
10(2)-72-6
న బ్రహ్మణః స్వపరభేదమతిస్తవ
స్యాత్సర్వాత్మనః సమదృశః స్వసుఖానుభూతేః .
సంసేవతాం సురతరోరివ తే ప్రసాదః
సేవానురూపముదయో న విపర్యయోఽత్ర
10(2)-72-7
శ్రీభగవానువాచ
సమ్యగ్వ్యవసితం రాజన్ భవతా శత్రుకర్శన .
కల్యాణీ యేన తే కీర్తిర్లోకాననుభవిష్యతి
10(2)-72-8
ఋషీణాం పితృదేవానాం సుహృదామపి నః ప్రభో .
సర్వేషామపి భూతానామీప్సితః క్రతురాడయం
10(2)-72-9
విజిత్య నృపతీన్ సర్వాన్ కృత్వా చ జగతీం వశే .
సంభృత్య సర్వసంభారానాహరస్వ మహాక్రతుం
10(2)-72-10
ఏతే తే భ్రాతరో రాజంల్లోకపాలాంశసంభవాః .
జితోఽస్మ్యాత్మవతా తేఽహం దుర్జయో యోఽకృతాత్మభిః
10(2)-72-11
న కశ్చిన్మత్పరం లోకే తేజసా యశసా శ్రియా .
విభూతిభిర్వాభిభవేద్దేవోఽపి కిము పార్థివః
10(2)-72-12
శ్రీశుక ఉవాచ
నిశమ్య భగవద్గీతం ప్రీతః ఫుల్లముఖాంబుజః .
భ్రాతౄన్ దిగ్విజయేఽయుంక్త విష్ణుతేజోపబృంహితాన్
10(2)-72-13
సహదేవం దక్షిణస్యామాదిశత్సహ సృంజయైః .
దిశి ప్రతీచ్యాం నకులముదీచ్యాం సవ్యసాచినం .
ప్రాచ్యాం వృకోదరం మత్స్యైః కేకయైః సహ మద్రకైః
10(2)-72-14
తే విజిత్య నృపాన్ వీరా ఆజహ్రుర్దిగ్భ్య ఓజసా .
అజాతశత్రవే భూరి ద్రవిణం నృప యక్ష్యతే
10(2)-72-15
శ్రుత్వాజితం జరాసంధం నృపతేర్ధ్యాయతో హరిః .
ఆహోపాయం తమేవాద్య ఉద్ధవో యమువాచ హ
10(2)-72-16
భీమసేనోఽర్జునః కృష్ణో బ్రహ్మలింగధరాస్త్రయః .
జగ్ముర్గిరివ్రజం తాత బృహద్రథసుతో యతః
10(2)-72-17
తే గత్వాఽఽతిథ్యవేలాయాం గృహేషు గృహమేధినం .
బ్రహ్మణ్యం సమయాచేరన్ రాజన్యా బ్రహ్మలింగినః
10(2)-72-18
రాజన్ విద్ధ్యతిథీన్ ప్రాప్తానర్థినో దూరమాగతాన్ .
తన్నః ప్రయచ్ఛ భద్రం తే యద్వయం కామయామహే
10(2)-72-19
కిం దుర్మర్షం తితిక్షూణాం కిమకార్యమసాధుభిః .
కిం న దేయం వదాన్యానాం కః పరః సమదర్శినాం
10(2)-72-20
యోఽనిత్యేన శరీరేణ సతాం గేయం యశో ధ్రువం .
నాచినోతి స్వయం కల్పః స వాచ్యః శోచ్య ఏవ సః
10(2)-72-21
హరిశ్చంద్రో రంతిదేవ ఉంఛవృత్తిః శిబిర్బలిః .
వ్యాధః కపోతో బహవో హ్యధ్రువేణ ధ్రువం గతాః
10(2)-72-22
శ్రీశుక ఉవాచ
స్వరైరాకృతిభిస్తాంస్తు ప్రకోష్ఠైర్జ్యాహతైరపి .
రాజన్యబంధూన్ విజ్ఞాయ దృష్టపూర్వానచింతయత్
10(2)-72-23
రాజన్యబంధవో హ్యేతే బ్రహ్మలింగాని బిభ్రతి .
దదామి భిక్షితం తేభ్య ఆత్మానమపి దుస్త్యజం
10(2)-72-24
బలేర్ను శ్రూయతే కీర్తిర్వితతా దిక్ష్వకల్మషా .
ఐశ్వర్యాద్భ్రంశితస్యాపి విప్రవ్యాజేన విష్ణునా
10(2)-72-25
శ్రియం జిహీర్షతేంద్రస్య విష్ణవే ద్విజరూపిణే .
జానన్నపి మహీం ప్రాదాద్వార్యమాణోఽపి దైత్యరాట్
10(2)-72-26
జీవతా బ్రాహ్మణార్థాయ కో న్వర్థః క్షత్రబంధునా .
దేహేన పతమానేన నేహతా విపులం యశః
10(2)-72-27
ఇత్యుదారమతిః ప్రాహ కృష్ణార్జునవృకోదరాన్ .
హే విప్రా వ్రియతాం కామో దదామ్యాత్మశిరోఽపి వః
10(2)-72-28
శ్రీభగవానువాచ
యుద్ధం నో దేహి రాజేంద్ర ద్వంద్వశో యది మన్యసే .
యుద్ధార్థినో వయం ప్రాప్తా రాజన్యా నాన్నకాంక్షిణః
10(2)-72-29
అసౌ వృకోదరః పార్థస్తస్య భ్రాతార్జునో హ్యయం .
అనయోర్మాతులేయం మాం కృష్ణం జానీహి తే రిపుం
10(2)-72-30
ఏవమావేదితో రాజా జహాసోచ్చైః స్మ మాగధః .
ఆహ చామర్షితో మందా యుద్ధం తర్హి దదామి వః
10(2)-72-31
న త్వయా భీరుణా యోత్స్యే యుధి విక్లవతేజసా .
మథురాం స్వపురీం త్యక్త్వా సముద్రం శరణం గతః
10(2)-72-32
అయం తు వయసాతుల్యో నాతిసత్త్వో న మే సమః .
అర్జునో న భవేద్యోద్ధా భీమస్తుల్యబలో మమ
10(2)-72-33
ఇత్యుక్త్వా భీమసేనాయ ప్రాదాయ మహతీం గదాం .
ద్వితీయాం స్వయమాదాయ నిర్జగామ పురాద్బహిః
10(2)-72-34
తతః సమే ఖలే వీరౌ సంయుక్తావితరేతరౌ .
జఘ్నతుర్వజ్రకల్పాభ్యాం గదాభ్యాం రణదుర్మదౌ
10(2)-72-35
మండలాని విచిత్రాణి సవ్యం దక్షిణమేవ చ .
చరతోః శుశుభే యుద్ధం నటయోరివ రంగిణోః
10(2)-72-36
తతశ్చటచటాశబ్దో వజ్రనిష్పేషసన్నిభః .
గదయోః క్షిప్తయో రాజన్ దంతయోరివ దంతినోః
10(2)-72-37
తే వై గదే భుజజవేన నిపాత్యమానే
అన్యోన్యతోంఽసకటిపాదకరోరుజత్రూన్ .
చూర్ణీబభూవతురుపేత్య యథార్కశాఖే
సంయుధ్యతోర్ద్విరదయోరివ దీప్తమన్వ్యోః
10(2)-72-38
ఇత్థం తయోః ప్రహతయోర్గదయోర్నృవీరౌ
క్రుద్ధౌ స్వముష్టిభిరయఃస్పరశైరపింష్టాం .
శబ్దస్తయోః ప్రహరతోరిభయోరివాసీ-
న్నిర్ఘాతవజ్రపరుషస్తలతాడనోత్థః
10(2)-72-39
తయోరేవం ప్రహరతోః సమశిక్షాబలౌజసోః .
నిర్విశేషమభూద్యుద్ధమక్షీణజవయోర్నృప
10(2)-72-40
ఏవం తయోర్మహారాజ యుధ్యతోః సప్తవింశతిః .
దినాని నిరగంస్తత్ర సుహృద్వన్నిశి తిష్ఠతోః
10(2)-72-41
ఏకదా మాతులేయం వై ప్రాహ రాజన్ వృకోదరః .
న శక్తోఽహం జరాసంధం నిర్జేతుం యుధి మాధవ
10(2)-72-42
శత్రోర్జన్మమృతీ విద్వాంజీవితం చ జరాకృతం .
పార్థమాప్యాయయన్ స్వేన తేజసాచింతయద్ధరిః
10(2)-72-43
సంచింత్యారివధోపాయం భీమస్యామోఘదర్శనః .
దర్శయామాస విటపం పాటయన్నివ సంజ్ఞయా
10(2)-72-44
తద్విజ్ఞాయ మహాసత్త్వో భీమః ప్రహరతాం వరః .
గృహీత్వా పాదయోః శత్రుం పాతయామాస భూతలే
10(2)-72-45
ఏకం పాదం పదాఽఽక్రమ్య దోర్భ్యామన్యం ప్రగృహ్య సః .
గుదతః పాటయామాస శాఖమివ మహాగజః
10(2)-72-46
ఏకపాదోరువృషణకటిపృష్ఠస్తనాంసకే .
ఏకబాహ్వక్షిభ్రూకర్ణే శకలే దదృశుః ప్రజాః
10(2)-72-47
హాహాకారో మహానాసీన్నిహతే మగధేశ్వరే .
పూజయామాసతుర్భీమం పరిరభ్య జయాచ్యుతౌ
10(2)-72-48
సహదేవం తత్తనయం భగవాన్ భూతభావనః .
అభ్యషించదమేయాత్మా మగధానాం పతిం ప్రభుః .
మోచయామాస రాజన్యాన్ సంరుద్ధా మాగధేన యే
10(2)-72-49
ఇతి శ్రీమద్భాగవతే మహాపురాణే పారమహంస్యాం సంహితాయాం
దశమస్కంధే ఉత్తరార్ధే జరాసంధవధో నామ ద్విసప్తతితమోఽధ్యాయః