దశమ స్కంధః- ఉత్తరార్థః : త్రిసప్తతితమోఽధ్యాయః - 73
10(2)-73-1
శ్రీశుక ఉవాచ
అయుతే ద్వే శతాన్యష్టౌ లీలయా యుధి నిర్జితాః .
తే నిర్గతా గిరిద్రోణ్యాం మలినా మలవాససః
10(2)-73-2
క్షుత్క్షామాః శుష్కవదనాః సంరోధపరికర్శితాః .
దదృశుస్తే ఘనశ్యామం పీతకౌశేయవాససం
10(2)-73-3
శ్రీవత్సాంకం చతుర్బాహుం పద్మగర్భారుణేక్షణం .
చారుప్రసన్నవదనం స్ఫురన్మకరకుండలం
10(2)-73-4
పద్మహస్తం గదాశంఖరథాంగైరుపలక్షితం .
కిరీటహారకటకకటిసూత్రాంగదాంచితం
10(2)-73-5
భ్రాజద్వరమణిగ్రీవం నివీతం వనమాలయా .
పిబంత ఇవ చక్షుర్భ్యాం లిహంత ఇవ జిహ్వయా
10(2)-73-6
జిఘ్రంత ఇవ నాసాభ్యాం రంభంత ఇవ బాహుభిః .
ప్రణేముర్హతపాప్మానో మూర్ధభిః పాదయోర్హరేః
10(2)-73-7
కృష్ణసందర్శనాహ్లాదధ్వస్తసంరోధనక్లమాః .
ప్రశశంసుర్హృషీకేశం గీర్భిః ప్రాంజలయో నృపాః
10(2)-73-8
రాజాన ఊచుః
నమస్తే దేవదేవేశ ప్రపన్నార్తిహరావ్యయ .
ప్రపన్నాన్ పాహి నః కృష్ణ నిర్విణ్ణాన్ ఘోరసంసృతేః
10(2)-73-9
నైనం నాథాన్వసూయామో మాగధం మధుసూదన .
అనుగ్రహో యద్భవతో రాజ్ఞాం రాజ్యచ్యుతిర్విభో
10(2)-73-10
రాజ్యైశ్వర్యమదోన్నద్ధో న శ్రేయో విందతే నృపః .
త్వన్మాయామోహితోఽనిత్యా మన్యతే సంపదోఽచలాః
10(2)-73-11
మృగతృష్ణాం యథా బాలా మన్యంత ఉదకాశయం .
ఏవం వైకారికీం మాయామయుక్తా వస్తు చక్షతే
10(2)-73-12
వయం పురా శ్రీమదనష్టదృష్టయో
జిగీషయాస్యా ఇతరేతరస్పృధః .
ఘ్నంతః ప్రజాః స్వా అతినిర్ఘృణాః ప్రభో
మృత్యుం పురస్త్వావిగణయ్య దుర్మదాః
10(2)-73-13
త ఏవ కృష్ణాద్య గభీరరంహసా
దురంతవీర్యేణ విచాలితాః శ్రియః .
కాలేన తన్వా భవతోఽనుకంపయా
వినష్టదర్పాశ్చరణౌ స్మరామ తే
10(2)-73-14
అథో న రాజ్యం మృగతృష్ణిరూపితం
దేహేన శశ్వత్పతతా రుజాం భువా .
ఉపాసితవ్యం స్పృహయామహే విభో
క్రియాఫలం ప్రేత్య చ కర్ణరోచనం
10(2)-73-15
తం నః సమాదిశోపాయం యేన తే చరణాబ్జయోః .
స్మృతిర్యథా న విరమేదపి సంసరతామిహ
10(2)-73-16
కృష్ణాయ వాసుదేవాయ హరయే పరమాత్మనే .
ప్రణతక్లేశనాశాయ గోవిందాయ నమో నమః
10(2)-73-17
శ్రీశుక ఉవాచ
సంస్తూయమానో భగవాన్ రాజభిర్ముక్తబంధనైః .
తానాహ కరుణస్తాత శరణ్యః శ్లక్ష్ణయా గిరా
10(2)-73-18
శ్రీభగవానువాచ
అద్య ప్రభృతి వో భూపా మయ్యాత్మన్యఖిలేశ్వరే .
సుదృఢా జాయతే భక్తిర్బాఢమాశంసితం తథా
10(2)-73-19
దిష్ట్యా వ్యవసితం భూపా భవంత ఋతభాషిణః .
శ్రియైశ్వర్యమదోన్నాహం పశ్య ఉన్మాదకం నృణాం
10(2)-73-20
హైహయో నహుషో వేనో రావణో నరకోఽపరే .
శ్రీమదాద్భ్రంశితాః స్థానాద్దేవదైత్యనరేశ్వరాః
10(2)-73-21
భవంత ఏతద్విజ్ఞాయ దేహాద్యుత్పాద్యమంతవత్ .
మాం యజంతోఽధ్వరైర్యుక్తాః ప్రజా ధర్మేణ రక్షథ
10(2)-73-22
సంతన్వంతః ప్రజాతంతూన్ సుఖం దుఃఖం భవాభవౌ .
ప్రాప్తం ప్రాప్తం చ సేవంతో మచ్చిత్తా విచరిష్యథ
10(2)-73-23
ఉదాసీనాశ్చ దేహాదావాత్మారామా ధృతవ్రతాః .
మయ్యావేశ్య మనః సమ్యఙ్ మామంతే బ్రహ్మ యాస్యథ
10(2)-73-24
శ్రీశుక ఉవాచ
ఇత్యాదిశ్య నృపాన్ కృష్ణో భగవాన్ భువనేశ్వరః .
తేషాం న్యయుంక్త పురుషాన్ స్త్రియో మజ్జనకర్మణి
10(2)-73-25
సపర్యాం కారయామాస సహదేవేన భారత .
నరదేవోచితైర్వస్త్రైర్భూషణైః స్రగ్విలేపనైః
10(2)-73-26
భోజయిత్వా వరాన్నేన సుస్నాతాన్ సమలంకృతాన్ .
భోగైశ్చ వివిధైర్యుక్తాంస్తాంబూలాద్యైర్నృపోచితైః
10(2)-73-27
తే పూజితా ముకుందేన రాజానో మృష్టకుండలాః .
విరేజుర్మోచితాః క్లేశాత్ప్రావృడంతే యథా గ్రహాః
10(2)-73-28
రథాన్ సదశ్వానారోప్య మణికాంచనభూషితాన్ .
ప్రీణయ్య సూనృతైర్వాక్యైః స్వదేశాన్ ప్రత్యయాపయత్
10(2)-73-29
త ఏవం మోచితాః కృచ్ఛ్రాత్కృష్ణేన సుమహాత్మనా .
యయుస్తమేవ ధ్యాయంతః కృతాని చ జగత్పతేః
10(2)-73-30
జగదుః ప్రకృతిభ్యస్తే మహాపురుషచేష్టితం .
యథాన్వశాసద్భగవాంస్తథా చక్రురతంద్రితాః
10(2)-73-31
జరాసంధం ఘాతయిత్వా భీమసేనేన కేశవః .
పార్థాభ్యాం సంయుతః ప్రాయాత్సహదేవేన పూజితః
10(2)-73-32
గత్వా తే ఖాండవప్రస్థం శంఖాన్ దధ్ముర్జితారయః .
హర్షయంతః స్వసుహృదో దుర్హృదాం చాసుఖావహాః
10(2)-73-33
తచ్ఛ్రుత్వా ప్రీతమనస ఇంద్రప్రస్థనివాసినః .
మేనిరే మాగధం శాంతం రాజా చాప్తమనోరథః
10(2)-73-34
అభివంద్యాథ రాజానం భీమార్జునజనార్దనాః .
సర్వమాశ్రావయాంచక్రురాత్మనా యదనుష్ఠితం
10(2)-73-35
నిశమ్య ధర్మరాజస్తత్కేశవేనానుకంపితం .
ఆనందాశ్రుకలాం ముంచన్ ప్రేమ్ణా నోవాచ కించన
10(2)-73-36
ఇతి శ్రీమద్భాగవతే మహాపురాణే పారమహంస్యాం సంహితాయాం
దశమస్కంధే ఉత్తరార్ధే కృష్ణాద్యాగమనే త్రిసప్తతితమోఽధ్యాయః