దశమ స్కంధః- ఉత్తరార్థః : సప్తషష్టితమోఽధ్యాయః - 67
10(2)-67-1
రాజోవాచ
భుయోఽహం శ్రోతుమిచ్ఛామి రామస్యాద్భుతకర్మణః .
అనంతస్యాప్రమేయస్య యదన్యత్కృతవాన్ ప్రభుః
10(2)-67-2
శ్రీశుక ఉవాచ
నరకస్య సఖా కశ్చిద్ద్వివిదో నామ వానరః .
సుగ్రీవసచివః సోఽథ భ్రాతా మైందస్య వీర్యవాన్
10(2)-67-3
సఖ్యుః సోఽపచితిం కుర్వన్ వానరో రాష్ట్రవిప్లవం .
పురగ్రామాకరాన్ ఘోషానదహద్వహ్నిముత్సృజన్
10(2)-67-4
క్వచిత్స శైలానుత్పాట్య తైర్దేశాన్ సమచూర్ణయత్ .
ఆనర్తాన్ సుతరామేవ యత్రాస్తే మిత్రహా హరిః
10(2)-67-5
క్వచిత్సముద్రమధ్యస్థో దోర్భ్యాముత్క్షిప్య తజ్జలం .
దేశాన్ నాగాయుతప్రాణో వేలాకూలానమజ్జయత్
10(2)-67-6
ఆశ్రమాన్ ఋషిముఖ్యానాం కృత్వా భగ్నవనస్పతీన్ .
అదూషయచ్ఛకృన్మూత్రైరగ్నీన్ వైతానికాన్ ఖలః
10(2)-67-7
పురుషాన్ యోషితో దృప్తః క్ష్మాభృద్ద్రోణీగుహాసు సః .
నిక్షిప్య చాప్యధాచ్ఛైలైః పేశస్కారీవ కీటకం
10(2)-67-8
ఏవం దేశాన్ విప్రకుర్వన్ దూషయంశ్చ కులస్త్రియః .
శ్రుత్వా సులలితం గీతం గిరిం రైవతకం యయౌ
10(2)-67-9
తత్రాపశ్యద్యదుపతిం రామం పుష్కరమాలినం .
సుదర్శనీయసర్వాంగం లలనాయూథమధ్యగం
10(2)-67-10
గాయంతం వారుణీం పీత్వా మదవిహ్వలలోచనం .
విభ్రాజమానం వపుషా ప్రభిన్నమివ వారణం
10(2)-67-11
దుష్టః శాఖామృగః శాఖామారూఢః కంపయన్ ద్రుమాన్ .
చక్రే కిలకిలాశబ్దమాత్మానం సంప్రదర్శయన్
10(2)-67-12
తస్య ధార్ష్ట్యం కపేర్వీక్ష్య తరుణ్యో జాతిచాపలాః .
హాస్యప్రియా విజహసుర్బలదేవపరిగ్రహాః
10(2)-67-13
తా హేలయామాస కపిర్భ్రూక్షేపైః సమ్ముఖాదిభిః .
దర్శయన్ స్వగుదం తాసాం రామస్య చ నిరీక్షతః
10(2)-67-14
తం గ్రావ్ణా ప్రాహరత్క్రుద్ధో బలః ప్రహరతాం వరః .
స వంచయిత్వా గ్రావాణం మదిరాకలశం కపిః
10(2)-67-15
గృహీత్వా హేలయామాస ధూర్తస్తం కోపయన్ హసన్ .
నిర్భిద్య కలశం దుష్టో వాసాంస్యాస్ఫాలయద్బలం
10(2)-67-16
కదర్థీకృత్య బలవాన్ విప్రచక్రే మదోద్ధతః .
తం తస్యావినయం దృష్ట్వా దేశాంశ్చ తదుపద్రుతాన్
10(2)-67-17
క్రుద్ధో ముసలమాదత్త హలం చారిజిఘాంసయా .
ద్వివిదోఽపి మహావీర్యః సాలముద్యమ్య పాణినా
10(2)-67-18
అభ్యేత్య తరసా తేన బలం మూర్ధన్యతాడయత్ .
తం తు సంకర్షణో మూర్ధ్ని పతంతమచలో యథా
10(2)-67-19
ప్రతిజగ్రాహ బలవాన్ సునందేనాహనచ్చ తం .
ముసలాహతమస్తిష్కో విరేజే రక్తధారయా
10(2)-67-20
గిరిర్యథా గైరికయా ప్రహారం నానుచింతయన్ .
పునరన్యం సముత్క్షిప్య కృత్వా నిష్పత్రమోజసా
10(2)-67-21
తేనాహనత్సుసంక్రుద్ధస్తం బలః శతధాచ్ఛినత్ .
తతోఽన్యేన రుషా జఘ్నే తం చాపి శతధాచ్ఛినత్
10(2)-67-22
ఏవం యుధ్యన్ భగవతా భగ్నే భగ్నే పునః పునః .
ఆకృష్య సర్వతో వృక్షాన్ నిర్వృక్షమకరోద్వనం
10(2)-67-23
తతోఽముంచచ్ఛిలావర్షం బలస్యోపర్యమర్షితః .
తత్సర్వం చూర్ణయామాస లీలయా ముసలాయుధః
10(2)-67-24
స బాహూ తాలసంకాశౌ ముష్టీకృత్య కపీశ్వరః .
ఆసాద్య రోహిణీపుత్రం తాభ్యాం వక్షస్యరూరుజత్
10(2)-67-25
యాదవేంద్రోఽపి తం దోర్భ్యాం త్యక్త్వా ముసలలాంగలే .
జత్రావభ్యర్దయత్క్రుద్ధః సోఽపతద్రుధిరం వమన్
10(2)-67-26
చకంపే తేన పతతా సటంకః సవనస్పతిః .
పర్వతః కురుశార్దూల వాయునా నౌరివాంభసి
10(2)-67-27
జయశబ్దో నమః శబ్దః సాధు సాధ్వితి చాంబరే .
సురసిద్ధమునీంద్రాణామాసీత్కుసుమవర్షిణాం
10(2)-67-28
ఏవం నిహత్య ద్వివిదం జగద్వ్యతికరావహం .
సంస్తూయమానో భగవాన్ జనైః స్వపురమావిశత్
10(2)-67-29
ఇతి శ్రీమద్భాగవతే మహాపురాణే పారమహంస్యాం సంహితాయాం
దశమస్కంధే ఉత్తరార్ధే ద్వివిధవధో నామ సప్తషష్టితమోఽధ్యాయః