దశమ స్కంధః- ఉత్తరార్థః : పంచపంచాశత్తమోఽధ్యాయః - 55
10(2)-55-1
శ్రీశుక ఉవాచ
కామస్తు వాసుదేవాంశో దగ్ధః ప్రాగ్రుద్రమన్యునా .
దేహోపపత్తయే భూయస్తమేవ ప్రత్యపద్యత
10(2)-55-2
స ఏవ జాతో వైదర్భ్యాం కృష్ణవీర్యసముద్భవః .
ప్రద్యుమ్న ఇతి విఖ్యాతః సర్వతోఽనవమః పితుః
10(2)-55-3
తం శంబరః కామరూపీ హృత్వా తోకమనిర్దశం .
స విదిత్వాఽఽత్మనః శత్రుం ప్రాస్యోదన్వత్యగాద్గృహం
10(2)-55-4
తం నిర్జగార బలవాన్ మీనః సోఽప్యపరైః సహ .
వృతో జాలేన మహతా గృహీతో మత్స్యజీవిభిః
10(2)-55-5
తం శంబరాయ కైవర్తా ఉపాజహ్రురుపాయనం .
సూదా మహానసం నీత్వావద్యన్ సుధితినాద్భుతం
10(2)-55-6
దృష్ట్వా తదుదరే బాలం మాయావత్యై న్యవేదయన్ .
నారదోఽకథయత్సర్వం తస్యాః శంకితచేతసః .
బాలస్య తత్త్వముత్పత్తిం మత్స్యోదరనివేశనం
10(2)-55-7
సా చ కామస్య వై పత్నీ రతిర్నామ యశస్వినీ .
పత్యుర్నిర్దగ్ధదేహస్య దేహోత్పత్తిం ప్రతీక్షతీ
10(2)-55-8
నిరూపితా శంబరేణ సా సూదౌదనసాధనే .
కామదేవం శిశుం బుద్ధ్వా చక్రే స్నేహం తదార్భకే
10(2)-55-9
నాతిదీర్ఘేణ కాలేన స కార్ష్ణీ రూఢయౌవనః .
జనయామాస నారీణాం వీక్షంతీనాం చ విభ్రమం
10(2)-55-10
సా తం పతిం పద్మదలాయతేక్షణం
ప్రలంబబాహుం నరలోకసుందరం .
సవ్రీడహాసోత్తభితభ్రువేక్షతీ
ప్రీత్యోపతస్థే రతిరంగ సౌరతైః
10(2)-55-11
తామాహ భగవాన్ కార్ష్ణిర్మాతస్తే మతిరన్యథా .
మాతృభావమతిక్రమ్య వర్తసే కామినీ యథా
10(2)-55-12
రతిరువాచ
భవాన్ నారాయణసుతః శంబరేణ హృతో గృహాత్ .
అహం తేఽధికృతా పత్నీ రతిః కామో భవాన్ ప్రభో
10(2)-55-13
ఏష త్వానిర్దశం సింధావక్షిపచ్ఛంబరోఽసురః .
మత్స్యోఽగ్రసీత్తదుదరాదిహ ప్రాప్తో భవాన్ ప్రభో
10(2)-55-14
తమిమం జహి దుర్ధర్షం దుర్జయం శత్రుమాత్మనః .
మాయాశతవిదం త్వం చ మాయాభిర్మోహనాదిభిః
10(2)-55-15
పరిశోచతి తే మాతా కురరీవ గతప్రజా .
పుత్రస్నేహాకులా దీనా వివత్సా గౌరివాతురా
10(2)-55-16
ప్రభాష్యైవం దదౌ విద్యాం ప్రద్యుమ్నాయ మహాత్మనే .
మాయావతీ మహామాయాం సర్వమాయావినాశినీం
10(2)-55-17
స చ శంబరమభ్యేత్య సంయుగాయ సమాహ్వయత్ .
అవిషహ్యైస్తమాక్షేపైః క్షిపన్ సంజనయన్ కలిం
10(2)-55-18
సోఽధిక్షిప్తో దుర్వచోభిః పాదాహత ఇవోరగః .
నిశ్చక్రామ గదాపాణిరమర్షాత్తామ్రలోచనః
10(2)-55-19
గదామావిధ్య తరసా ప్రద్యుమ్నాయ మహాత్మనే .
ప్రక్షిప్య వ్యనదన్నాదం వజ్రనిష్పేషనిష్ఠురం
10(2)-55-20
తామాపతంతీం భగవాన్ ప్రద్యుమ్నో గదయా గదాం .
అపాస్య శత్రవే క్రుద్ధః ప్రాహిణోత్స్వగదాం నృప
10(2)-55-21
స చ మాయాం సమాశ్రిత్య దైతేయీం మయదర్శితాం .
ముముచేఽస్త్రమయం వర్షం కార్ష్ణౌ వైహాయసోఽసురః
10(2)-55-22
బాధ్యమానోఽస్త్రవర్షేణ రౌక్మిణేయో మహారథః .
సత్త్వాత్మికాం మహావిద్యాం సర్వమాయోపమర్దినీం
10(2)-55-23
తతో గౌహ్యకగాంధర్వపైశాచోరగరాక్షసీః .
ప్రాయుంక్త శతశో దైత్యః కార్ష్ణిర్వ్యధమయత్స తాః
10(2)-55-24
నిశాతమసిముద్యమ్య సకిరీటం సకుండలం .
శంబరస్య శిరః కాయాత్తామ్రశ్మశ్ర్వోజసాహరత్
10(2)-55-25
ఆకీర్యమాణో దివిజైః స్తువద్భిః కుసుమోత్కరైః .
భార్యయాంబరచారిణ్యా పురం నీతో విహాయసా
10(2)-55-26
అంతఃపురవరం రాజన్ లలనాశతసంకులం .
వివేశ పత్న్యా గగనాద్విద్యుతేవ బలాహకః
10(2)-55-27
తం దృష్ట్వా జలదశ్యామం పీతకౌశేయవాససం .
ప్రలంబబాహుం తామ్రాక్షం సుస్మితం రుచిరాననం
10(2)-55-28
స్వలంకృతముఖాంభోజం నీలవక్రాలకాలిభిః .
కృష్ణం మత్వా స్త్రియో హ్రీతా నిలిల్యుస్తత్ర తత్ర హ
10(2)-55-29
అవధార్య శనైరీషద్వైలక్షణ్యేన యోషితః .
ఉపజగ్ముః ప్రముదితాః సస్త్రీరత్నం సువిస్మితాః
10(2)-55-30
అథ తత్రాసితాపాంగీ వైదర్భీ వల్గుభాషిణీ .
అస్మరత్స్వసుతం నష్టం స్నేహస్నుతపయోధరా
10(2)-55-31
కో న్వయం నరవైదూర్యః కస్య వా కమలేక్షణః .
ధృతః కయా వా జఠరే కేయం లబ్ధా త్వనేన వా
10(2)-55-32
మమ చాప్యాత్మజో నష్టో నీతో యః సూతికాగృహాత్ .
ఏతత్తుల్యవయోరూపో యది జీవతి కుత్రచిత్
10(2)-55-33
కథం త్వనేన సంప్రాప్తం సారూప్యం శార్ఙ్గధన్వనః .
ఆకృత్యావయవైర్గత్యా స్వరహాసావలోకనైః
10(2)-55-34
స ఏవ వా భవేన్నూనం యో మే గర్భే ధృతోఽర్భకః .
అముష్మిన్ ప్రీతిరధికా వామః స్ఫురతి మే భుజః
10(2)-55-35
ఏవం మీమాంసమానాయాం వైదర్భ్యాం దేవకీసుతః .
దేవక్యానకదుందుభ్యాముత్తమశ్లోక ఆగమత్
10(2)-55-36
విజ్ఞాతార్థోఽపి భగవాంస్తూష్ణీమాస జనార్దనః .
నారదోఽకథయత్సర్వం శంబరాహరణాదికం
10(2)-55-37
తచ్ఛ్రుత్వా మహదాశ్చర్యం కృష్ణాంతఃపురయోషితః .
అభ్యనందన్ బహూనబ్దాన్ నష్టం మృతమివాగతం
10(2)-55-38
దేవకీ వసుదేవశ్చ కృష్ణరామౌ తథా స్త్రియః .
దంపతీ తౌ పరిష్వజ్య రుక్మిణీ చ యయుర్ముదం
10(2)-55-39
నష్టం ప్రద్యుమ్నమాయాతమాకర్ణ్య ద్వారకౌకసః .
అహో మృత ఇవాయాతో బాలో దిష్ట్యేతి హాబ్రువన్
10(2)-55-40
యం వై ముహుః పితృసరూపనిజేశభావా-
స్తన్మాతరో యదభజన్ రహరూఢభావాః .
చిత్రం న తత్ఖలు రమాస్పదబింబబింబే
కామే స్మరేఽక్షవిషయే కిముతాన్యనార్యః
10(2)-55-41
ఇతి శ్రీమద్భాగవతే మహాపురాణే పారమహంస్యాం
సంహితాయాం దశమస్కంధే ఉత్తరార్ధే
ప్రద్యుమ్నోత్పత్తినిరూపణం నామ
పంచపంచాశత్తమోఽధ్యాయః