దశమ స్కంధః- ఉత్తరార్థః : చతుఃసప్తతితమోఽధ్యాయః - 74
10(2)-74-1
శ్రీశుక ఉవాచ
ఏవం యుధిష్ఠిరో రాజా జరాసంధవధం విభోః .
కృష్ణస్య చానుభావం తం శ్రుత్వా ప్రీతస్తమబ్రవీత్
10(2)-74-2
యుధిష్ఠిర ఉవాచ
యే స్యుస్త్రైలోక్యగురవః సర్వే లోకమహేశ్వరాః .
వహంతి దుర్లభం లబ్ధ్వా శిరసైవానుశాసనం
10(2)-74-3
స భవానరవిందాక్షో దీనానామీశమానినాం .
ధత్తేఽనుశాసనం భూమంస్తదత్యంతవిడంబనం
10(2)-74-4
న హ్యేకస్యాద్వితీయస్య బ్రహ్మణః పరమాత్మనః .
కర్మభిర్వర్ధతే తేజో హ్రసతే చ యథా రవేః
10(2)-74-5
న వై తేఽజిత భక్తానాం మమాహమితి మాధవ .
త్వం తవేతి చ నానాధీః పశూనామివ వైకృతా
10(2)-74-6
శ్రీశుక ఉవాచ
ఇత్యుక్త్వా యజ్ఞియే కాలే వవ్రే యుక్తాన్ స ఋత్విజః .
కృష్ణానుమోదితః పార్థో బ్రాహ్మణాన్ బ్రహ్మవాదినః
10(2)-74-7
ద్వైపాయనో భరద్వాజః సుమంతుర్గౌతమోఽసితః .
వసిష్ఠశ్చ్యవనః కణ్వో మైత్రేయః కవషస్త్రితః
10(2)-74-8
విశ్వామిత్రో వామదేవః సుమతిర్జైమినిః క్రతుః .
పైలః పరాశరో గర్గో వైశంపాయన ఏవ చ
10(2)-74-9
అథర్వా కశ్యపో ధౌమ్యో రామో భార్గవ ఆసురిః .
వీతిహోత్రో మధుచ్ఛందా వీరసేనోఽకృతవ్రణః
10(2)-74-10
ఉపహూతాస్తథా చాన్యే ద్రోణభీష్మకృపాదయః .
ధృతరాష్ట్రః సహసుతో విదురశ్చ మహామతిః
10(2)-74-11
బ్రాహ్మణాః క్షత్రియా వైశ్యాః శూద్రా యజ్ఞదిదృక్షవః .
తత్రేయుః సర్వరాజానో రాజ్ఞాం ప్రకృతయో నృప
10(2)-74-12
తతస్తే దేవయజనం బ్రాహ్మణాః స్వర్ణలాంగలైః .
కృష్ట్వా తత్ర యథామ్నాయం దీక్షయాంచక్రిరే నృపం
10(2)-74-13
హైమాః కిలోపకరణా వరుణస్య యథా పురా .
ఇంద్రాదయో లోకపాలా విరించభవసంయుతాః
10(2)-74-14
సగణాః సిద్ధగంధర్వా విద్యాధరమహోరగాః .
మునయో యక్షరక్షాంసి ఖగకిన్నరచారణాః
10(2)-74-15
రాజానశ్చ సమాహూతా రాజపత్న్యశ్చ సర్వశః .
రాజసూయం సమీయుః స్మ రాజ్ఞః పాండుసుతస్య వై
10(2)-74-16
మేనిరే కృష్ణభక్తస్య సూపపన్నమవిస్మితాః .
అయాజయన్ మహారాజం యాజకా దేవవర్చసః
10(2)-74-17
రాజసూయేన విధివత్ప్రచేతసమివామరాః .
సౌత్యేఽహన్యవనీపాలో యాజకాన్ సదసస్పతీన్ .
అపూజయన్మహాభాగాన్ యథావత్సుసమాహితః
10(2)-74-18
సదస్యాగ్ర్యార్హణార్హం వై విమృశంతః సభాసదః .
నాధ్యగచ్ఛన్ననైకాంత్యాత్సహదేవస్తదాబ్రవీత్
10(2)-74-19
అర్హతి హ్యచ్యుతః శ్రైష్ఠ్యం భగవాన్ సాత్వతాంపతిః .
ఏష వై దేవతాః సర్వా దేశకాలధనాదయః
10(2)-74-20
యదాత్మకమిదం విశ్వం క్రతవశ్చ యదాత్మకాః .
అగ్నిరాహుతయో మంత్రాః సాంఖ్యం యోగశ్చ యత్పరః
10(2)-74-21
ఏక ఏవాద్వితీయోఽసావైతదాత్మ్యమిదం జగత్ .
ఆత్మనాఽఽత్మాశ్రయః సభ్యాః సృజత్యవతి హంత్యజః
10(2)-74-22
వివిధానీహ కర్మాణి జనయన్ యదవేక్షయా .
ఈహతే యదయం సర్వః శ్రేయో ధర్మాదిలక్షణం
10(2)-74-23
తస్మాత్కృష్ణాయ మహతే దీయతాం పరమార్హణం .
ఏవం చేత్సర్వభూతానామాత్మనశ్చార్హణం భవేత్
10(2)-74-24
సర్వభూతాత్మభూతాయ కృష్ణాయానన్యదర్శినే .
దేయం శాంతాయ పూర్ణాయ దత్తస్యానంత్యమిచ్ఛతా
10(2)-74-25
ఇత్యుక్త్వా సహదేవోఽభూత్తూష్ణీం కృష్ణానుభావవిత్ .
తచ్ఛ్రుత్వా తుష్టువుః సర్వే సాధు సాధ్వితి సత్తమాః
10(2)-74-26
శ్రుత్వా ద్విజేరితం రాజా జ్ఞాత్వా హార్దం సభాసదాం .
సమర్హయద్ధృషీకేశం ప్రీతః ప్రణయవిహ్వలః
10(2)-74-27
తత్పాదావవనిజ్యాపః శిరసా లోకపావనీః .
సభార్యః సానుజామాత్యః సకుటుంబోఽవహన్ముదా
10(2)-74-28
వాసోభిః పీతకౌశేయైర్భూషణైశ్చ మహాధనైః .
అర్హయిత్వాశ్రుపూర్ణాక్షో నాశకత్సమవేక్షితుం
10(2)-74-29
ఇత్థం సభాజితం వీక్ష్య సర్వే ప్రాంజలయో జనాః .
నమో జయేతి నేముస్తం నిపేతుః పుష్పవృష్టయః
10(2)-74-30
ఇత్థం నిశమ్య దమఘోషసుతః స్వపీఠాదుత్థాయ
కృష్ణగుణవర్ణనజాతమన్యుః .
ఉత్క్షిప్య బాహుమిదమాహ సదస్యమర్షీ
సంశ్రావయన్ భగవతే పరుషాణ్యభీతః
10(2)-74-31
ఈశో దురత్యయః కాల ఇతి సత్యవతీ శ్రుతిః .
వృద్ధానామపి యద్బుద్ధిర్బాలవాక్యైర్విభిద్యతే
10(2)-74-32
యూయం పాత్రవిదాం శ్రేష్ఠా మా మంధ్వం బాలభాషీతం .
సదసస్పతయః సర్వే కృష్ణో యత్సమ్మతోఽర్హణే
10(2)-74-33
తపోవిద్యావ్రతధరాన్ జ్ఞానవిధ్వస్తకల్మషాన్ .
పరమఋషీన్ బ్రహ్మనిష్ఠాంల్లోకపాలైశ్చ పూజితాన్
10(2)-74-34
సదస్పతీనతిక్రమ్య గోపాలః కులపాంసనః .
యథా కాకః పురోడాశం సపర్యాం కథమర్హతి
10(2)-74-35
వర్ణాశ్రమకులాపేతః సర్వధర్మబహిష్కృతః .
స్వైరవర్తీ గుణైర్హీనః సపర్యాం కథమర్హతి
10(2)-74-36
యయాతినైషాం హి కులం శప్తం సద్భిర్బహిష్కృతం .
వృథాపానరతం శశ్వత్సపర్యాం కథమర్హతి
10(2)-74-37
బ్రహ్మర్షిసేవితాన్ దేశాన్ హిత్వైతేఽబ్రహ్మవర్చసం .
సముద్రం దుర్గమాశ్రిత్య బాధంతే దస్యవః ప్రజాః
10(2)-74-38
ఏవమాదీన్యభద్రాణి బభాషే నష్టమంగలః .
నోవాచ కించిద్భగవాన్ యథా సింహః శివారుతం
10(2)-74-39
భగవన్నిందనం శ్రుత్వా దుఃసహం తత్సభాసదః .
కర్ణౌ పిధాయ నిర్జగ్ముః శపంతశ్చేదిపం రుషా
10(2)-74-40
నిందాం భగవతః శృణ్వంస్తత్పరస్య జనస్య వా .
తతో నాపైతి యః సోఽపి యాత్యధః సుకృతాచ్చ్యుతః
10(2)-74-41
తతః పాండుసుతాః క్రుద్ధా మత్స్యకైకయసృంజయాః .
ఉదాయుధాః సముత్తస్థుః శిశుపాలజిఘాంసవః
10(2)-74-42
తతశ్చైద్యస్త్వసంభ్రాంతో జగృహే ఖడ్గచర్మణీ .
భర్త్సయన్ కృష్ణపక్షీయాన్ రాజ్ఞః సదసి భారత
10(2)-74-43
తావదుత్థాయ భగవాన్ స్వాన్ నివార్య స్వయం రుషా .
శిరః క్షురాంతచక్రేణ జహారాపతతో రిపోః
10(2)-74-44
శబ్దః కోలాహలోఽప్యాసీచ్ఛిశుపాలే హతే మహాన్ .
తస్యానుయాయినో భూపా దుద్రువుర్జీవితైషిణః
10(2)-74-45
చైద్యదేహోత్థితం జ్యోతిర్వాసుదేవముపావిశత్ .
పశ్యతాం సర్వభూతానాముల్కేవ భువి ఖాచ్చ్యుతా
10(2)-74-46
జన్మత్రయానుగుణితవైరసంరబ్ధయా ధియా .
ధ్యాయంస్తన్మయతాం యాతో భావో హి భవకారణం
10(2)-74-47
ఋత్విగ్భ్యః ససదస్యేభ్యో దక్షిణాం విపులామదాత్ .
సర్వాన్ సంపూజ్య విధివచ్చక్రేఽవభృథమేకరాట్
10(2)-74-48
సాధయిత్వా క్రతుం రాజ్ఞః కృష్ణో యోగేశ్వరేశ్వరః .
ఉవాస కతిచిన్మాసాన్ సుహృద్భిరభియాచితః
10(2)-74-49
తతోఽనుజ్ఞాప్య రాజానమనిచ్ఛంతమపీశ్వరః .
యయౌ సభార్యః సామాత్యః స్వపురం దేవకీసుతః
10(2)-74-50
వర్ణితం తదుపాఖ్యానం మయా తే బహువిస్తరం .
వైకుంఠవాసినోర్జన్మ విప్రశాపాత్పునః పునః
10(2)-74-51
రాజసూయావభృథ్యేన స్నాతో రాజా యుధిష్ఠిరః .
బ్రహ్మక్షత్రసభామధ్యే శుశుభే సురరాడివ
10(2)-74-52
రాజ్ఞా సభాజితాః సర్వే సురమానవఖేచరాః .
కృష్ణం క్రతుం చ శంసంతః స్వధామాని యయుర్ముదా
10(2)-74-53
దుర్యోధనమృతే పాపం కలిం కురుకులామయం .
యో న సేహే శ్రీయం స్ఫీతాం దృష్ట్వా పాండుసుతస్య తాం
10(2)-74-54
య ఇదం కీర్తయేద్విష్ణోః కర్మ చైద్యవధాదికం .
రాజమోక్షం వితానం చ సర్వపాపైః ప్రముచ్యతే
10(2)-74-55
ఇతి శ్రీమద్భాగవతే మహాపురాణే పారమహంస్యాం సంహితాయాం
దశమస్కంధే ఉత్తరార్ధే శిశుపాలవధో నామ చతుఃసప్తతితమోఽధ్యాయః