పోతన తెలుగు భాగవతము

పోతన తెలుగు భాగవతము

దశమ స్కంధః- ఉత్తరార్థః : అష్టసప్తతితమోఽధ్యాయః - 78

10(2)-78-1
శ్రీశుక ఉవాచ
శిశుపాలస్య శాల్వస్య పౌండ్రకస్యాపి దుర్మతిః .
పరలోకగతానాం చ కుర్వన్ పారోక్ష్యసౌహృదం

10(2)-78-2
ఏకః పదాతిః సంక్రుద్ధో గదాపాణిః ప్రకంపయన్ .
పద్భ్యామిమాం మహారాజ మహాసత్త్వో వ్యదృశ్యత

10(2)-78-3
తం తథాయాంతమాలోక్య గదామాదాయ సత్వరః .
అవప్లుత్య రథాత్కృష్ణః సింధుం వేలేవ ప్రత్యధాత్

10(2)-78-4
గదాముద్యమ్య కారూషో ముకుందం ప్రాహ దుర్మదః .
దిష్ట్యా దిష్ట్యా భవానద్య మమ దృష్టిపథం గతః

10(2)-78-5
త్వం మాతులేయో నః కృష్ణ మిత్రధ్రుఙ్మాం జిఘాంససి .
అతస్త్వాం గదయా మంద హనిష్యే వజ్రకల్పయా

10(2)-78-6
తర్హ్యానృణ్యముపైమ్యజ్ఞ మిత్రాణాం మిత్రవత్సలః .
బంధురూపమరిం హత్వా వ్యాధిం దేహచరం యథా

10(2)-78-7
ఏవం రూక్షైస్తుదన్ వాక్యైః కృష్ణం తోత్రైరివ ద్విపం .
గదయాతాడయన్మూర్ధ్ని సింహవద్వ్యనదచ్చసః

10(2)-78-8
గదయాభిహతోఽప్యాజౌ న చచాల యదూద్వహః .
కృష్ణోఽపి తమహన్ గుర్వ్యా కౌమోదక్యా స్తనాంతరే

10(2)-78-9
గదానిర్భిన్నహృదయ ఉద్వమన్ రుధిరం ముఖాత్ .
ప్రసార్య కేశబాహ్వంఘ్రీన్ ధరణ్యాం న్యపతద్వ్యసుః

10(2)-78-10
తతః సూక్ష్మతరం జ్యోతిః కృష్ణమావిశదద్భుతం .
పశ్యతాం సర్వభూతానాం యథా చైద్యవధే నృప

10(2)-78-11
విదూరథస్తు తద్భ్రాతా భ్రాతృశోకపరిప్లుతః .
ఆగచ్ఛదసిచర్మాభ్యాముచ్ఛ్వసంస్తజ్జిఘాంసయా

10(2)-78-12
తస్య చాపతతః కృష్ణశ్చక్రేణ క్షురనేమినా .
శిరో జహార రాజేంద్ర సకిరీటం సకుండలం

10(2)-78-13
ఏవం సౌభం చ శాల్వం చ దంతవక్త్రం సహానుజం .
హత్వా దుర్విషహానన్యైరీడితః సురమానవైః

10(2)-78-14
మునిభిః సిద్ధగంధర్వైర్విద్యాధరమహోరగైః .
అప్సరోభిః పితృగణైర్యక్షైః కిన్నరచారణైః

10(2)-78-15
ఉపగీయమానవిజయః కుసుమైరభివర్షితః .
వృతశ్చవృష్ణిప్రవరైర్వివేశాలంకృతాం పురీం

10(2)-78-16
ఏవం యోగేశ్వరః కృష్ణో భగవాన్ జగదీశ్వరః .
ఈయతే పశుదృష్టీనాం నిర్జితో జయతీతి సః

10(2)-78-17
శ్రుత్వా యుద్ధోద్యమం రామః కురూణాం సహ పాండవైః .
తీర్థాభిషేకవ్యాజేన మధ్యస్థః ప్రయయౌ కిల

10(2)-78-18
స్నాత్వా ప్రభాసే సంతర్ప్య దేవర్షిపితృమానవాన్ .
సరస్వతీం ప్రతిస్రోతం యయౌ బ్రాహ్మణసంవృతః

10(2)-78-19
పృథూదకం బిందుసరస్త్రితకూపం సుదర్శనం .
విశాలం బ్రహ్మతీర్థం చ చక్రం ప్రాచీం సరస్వతీం

10(2)-78-20
యమునామను యాన్యేవ గంగామను చ భారత .
జగామ నైమిషం యత్ర ఋషయః సత్రమాసతే

10(2)-78-21
తమాగతమభిప్రేత్య మునయో దీర్ఘసత్రిణః .
అభినంద్య యథాన్యాయం ప్రణమ్యోత్థాయ చార్చయన్

10(2)-78-22
సోఽర్చితః సపరీవారః కృతాసనపరిగ్రహః .
రోమహర్షణమాసీనం మహర్షేః శిష్యమైక్షత

10(2)-78-23
అప్రత్యుత్థాయినం సూతమకృతప్రహ్వణాంజలిం .
అధ్యాసీనం చ తాన్ విప్రాంశ్చుకోపోద్వీక్ష్య మాధవః

10(2)-78-24
కస్మాదసావిమాన్ విప్రానధ్యాస్తే ప్రతిలోమజః .
ధర్మపాలాంస్తథైవాస్మాన్ వధమర్హతి దుర్మతిః

10(2)-78-25
ఋషేర్భగవతో భూత్వా శిష్యోఽధీత్య బహూని చ .
సేతిహాసపురాణాని ధర్మశాస్త్రాణి సర్వశః

10(2)-78-26
అదాంతస్యావినీతస్య వృథా పండితమానినః .
న గుణాయ భవంతి స్మ నటస్యేవాజితాత్మనః

10(2)-78-27
ఏతదర్థో హి లోకేఽస్మిన్నవతారో మయా కృతః .
వధ్యా మే ధర్మధ్వజినస్తే హి పాతకినోఽధికాః

10(2)-78-28
ఏతావదుక్త్వా భగవాన్ నివృత్తోఽసద్వధాదపి .
భావిత్వాత్తం కుశాగ్రేణ కరస్థేనాహనత్ప్రభుః

10(2)-78-29
హాహేతి వాదినః సర్వే మునయః ఖిన్నమానసాః .
ఊచుః సంకర్షణం దేవమధర్మస్తే కృతః ప్రభో

10(2)-78-30
అస్య బ్రహ్మాసనం దత్తమస్మాభిర్యదునందన .
ఆయుశ్చాత్మాక్లమం తావద్యావత్సత్రం సమాప్యతే

10(2)-78-31
అజానతైవాచరితస్త్వయా బ్రహ్మవధో యథా .
యోగేశ్వరస్య భవతో నామ్నాయోఽపి నియామకః

10(2)-78-32
యద్యేతద్బ్రహ్మహత్యాయాః పావనం లోకపావన .
చరిష్యతి భవాంల్లోకసంగ్రహోఽనన్యచోదితః

10(2)-78-33
శ్రీభగవానువాచ
కరిష్యే వధనిర్వేశం లోకానుగ్రహకామ్యయా .
నియమః ప్రథమే కల్పే యావాన్ స తు విధీయతాం

10(2)-78-34
దీర్ఘమాయుర్బతైతస్య సత్త్వమింద్రియమేవ చ .
ఆశాసితం యత్తద్బ్రూత సాధయే యోగమాయయా

10(2)-78-35
ఋషయ ఊచుః
అస్త్రస్య తవ వీర్యస్య మృత్యోరస్మాకమేవ చ .
యథా భవేద్వచః సత్యం తథా రామ విధీయతాం

10(2)-78-36
శ్రీభగవానువాచ
ఆత్మా వై పుత్ర ఉత్పన్న ఇతి వేదానుశాసనం .
తస్మాదస్య భవేద్వక్తా ఆయురింద్రియసత్త్వవాన్

10(2)-78-37
కిం వః కామో మునిశ్రేష్ఠా బ్రూతాహం కరవాణ్యథ .
అజానతస్త్వపచితిం యథా మే చింత్యతాం బుధాః

10(2)-78-38
ఋషయ ఊచుః
ఇల్వలస్య సుతో ఘోరో బల్వలో నామ దానవః .
స దూషయతి నః సత్రమేత్య పర్వణి పర్వణి

10(2)-78-39
తం పాపం జహి దాశార్హ తన్నః శుశ్రూషణం పరం .
పూయశోణితవిణ్మూత్రసురామాంసాభివర్షిణం

10(2)-78-40
తతశ్చ భారతం వర్షం పరీత్య సుసమాహితః .
చరిత్వా ద్వాదశమాసాంస్తీర్థస్నాయీ విశుధ్యసే

10(2)-78-41
ఇతి శ్రీమద్భాగవతే మహాపురాణే పారమహంస్యాం సంహితాయాం
దశమస్కంధే ఉత్తరార్ధే బలదేవచరితే బల్వలవధోపక్రమో
నామాష్టసప్తతితమోఽధ్యాయః