పోతన తెలుగు భాగవతము

పోతన తెలుగు భాగవతము

దశమ స్కంధః- ఉత్తరార్థః : అష్టపంచాశత్తమోఽధ్యాయః - 58

10(2)-58-1
శ్రీశుక ఉవాచ
ఏకదా పాండవాన్ ద్రష్టుం ప్రతీతాన్ పురుషోత్తమః .
ఇంద్రప్రస్థం గతః శ్రీమాన్ యుయుధానాదిభిర్వృతః

10(2)-58-2
దృష్ట్వా తమాగతం పార్థా ముకుందమఖిలేశ్వరం .
ఉత్తస్థుర్యుగపద్వీరాః ప్రాణా ముఖ్యమివాగతం

10(2)-58-3
పరిష్వజ్యాచ్యుతం వీరా అంగసంగహతైనసః .
సానురాగస్మితం వక్త్రం వీక్ష్య తస్య ముదం యయుః

10(2)-58-4
యుధిష్ఠిరస్య భీమస్య కృత్వా పాదాభివందనం .
ఫాల్గునం పరిరభ్యాథ యమాభ్యాం చాభివందితః

10(2)-58-5
పరమాసన ఆసీనం కృష్ణా కృష్ణమనిందితా .
నవోఢా వ్రీడితా కించిచ్ఛనైరేత్యాభ్యవందత

10(2)-58-6
తథైవ సాత్యకిః పార్థైః పూజితశ్చాభివందితః .
నిషసాదాసనేఽన్యే చ పూజితాః పర్యుపాసత

10(2)-58-7
పృథాం సమాగత్య కృతాభివాదన-
స్తయాతిహార్దార్ద్రదృశాభిరంభితః .
ఆపృష్టవాంస్తాం కుశలం సహస్నుషాం
పితృష్వసారం పరిపృష్టబాంధవః

10(2)-58-8
తమాహ ప్రేమవైక్లవ్యరుద్ధకంఠాశ్రులోచనా .
స్మరంతీ తాన్ బహూన్ క్లేశాన్ క్లేశాపాయాత్మదర్శనం

10(2)-58-9
తదైవ కుశలం నోఽభూత్సనాథాస్తే కృతా వయం .
జ్ఞాతీన్ నః స్మరతా కృష్ణ భ్రాతా మే ప్రేషితస్త్వయా

10(2)-58-10
న తేఽస్తి స్వపరభ్రాంతిర్విశ్వస్య సుహృదాత్మనః .
తథాపి స్మరతాం శశ్వత్క్లేశాన్ హంసి హృది స్థితః

10(2)-58-11
యుధిష్ఠిర ఉవాచ
కిం న ఆచరితం శ్రేయో న వేదాహమధీశ్వర .
యోగేశ్వరాణాం దుర్దర్శో యన్నో దృష్టః కుమేధసాం

10(2)-58-12
ఇతి వై వార్షికాన్ మాసాన్ రాజ్ఞా సోఽభ్యర్థితః సుఖం .
జనయన్ నయనానందమింద్రప్రస్థౌకసాం విభుః

10(2)-58-13
ఏకదా రథమారుహ్య విజయో వానరధ్వజం .
గాండీవం ధనురాదాయ తూణౌ చాక్షయసాయకౌ

10(2)-58-14
సాకం కృష్ణేన సన్నద్ధో విహర్తుం విపినం వనం .
బహువ్యాలమృగాకీర్ణం ప్రావిశత్పరవీరహా

10(2)-58-15
తత్రావిధ్యచ్ఛరైర్వ్యాఘ్రాన్ సూకరాన్ మహిషాన్ రురూన్ .
శరభాన్ గవయాన్ ఖడ్గాన్ హరిణాన్ శశశల్లకాన్

10(2)-58-16
తాన్ నిన్యుః కింకరా రాజ్ఞే మేధ్యాన్ పర్వణ్యుపాగతే .
తృట్ పరీతః పరిశ్రాంతో బీభత్సుర్యమునామగాత్

10(2)-58-17
తత్రోపస్పృశ్య విశదం పీత్వా వారి మహారథౌ .
కృష్ణౌ దదృశతుః కన్యాం చరంతీం చారుదర్శనాం

10(2)-58-18
తామాసాద్య వరారోహాం సుద్విజాం రుచిరాననాం .
పప్రచ్ఛ ప్రేషితః సఖ్యా ఫాల్గునః ప్రమదోత్తమాం

10(2)-58-19
కా త్వం కస్యాసి సుశ్రోణి కుతోఽసి కిం చికీర్షసి .
మన్యే త్వాం పతిమిచ్ఛంతీం సర్వం కథయ శోభనే

10(2)-58-20
కాలింద్యువాచ
అహం దేవస్య సవితుర్దుహితా పతిమిచ్ఛతీ .
విష్ణుం వరేణ్యం వరదం తపః పరమమాస్థితా

10(2)-58-21
నాన్యం పతిం వృణే వీర తమృతే శ్రీనికేతనం .
తుష్యతాం మే స భగవాన్ ముకుందోఽనాథసంశ్రయః

10(2)-58-22
కాలిందీతి సమాఖ్యాతా వసామి యమునాజలే .
నిర్మితే భవనే పిత్రా యావదచ్యుతదర్శనం

10(2)-58-23
తథావదద్గుడాకేశో వాసుదేవాయ సోఽపి తాం .
రథమారోప్య తద్విద్వాన్ ధర్మరాజముపాగమత్

10(2)-58-24
యదైవ కృష్ణః సందిష్టః పార్థానాం పరమాద్భుతం .
కారయామాస నగరం విచిత్రం విశ్వకర్మణా

10(2)-58-25
భగవాంస్తత్ర నివసన్ స్వానాం ప్రియచికీర్షయా .
అగ్నయే ఖాండవం దాతుమర్జునస్యాస సారథిః

10(2)-58-26
సోఽగ్నిస్తుష్టో ధనురదాద్ధయాన్ శ్వేతాన్ రథం నృప .
అర్జునాయాక్షయౌ తూణౌ వర్మ చాభేద్యమస్త్రిభిః

10(2)-58-27
మయశ్చ మోచితో వహ్నేః సభాం సఖ్య ఉపాహరత్ .
యస్మిన్ దుర్యోధనస్యాసీజ్జలస్థలదృశిభ్రమః

10(2)-58-28
స తేన సమనుజ్ఞాతః సుహృద్భిశ్చానుమోదితః .
ఆయయౌ ద్వారకాం భూయః సాత్యకిప్రముఖైర్వృతః

10(2)-58-29
అథోపయేమే కాలిందీం సుపుణ్యర్త్వర్క్ష ఊర్జితే .
వితన్వన్ పరమానందం స్వానాం పరమమంగలం

10(2)-58-30
విందానువిందావావంత్యౌ దుర్యోధనవశానుగౌ .
స్వయంవరే స్వభగినీం కృష్ణే సక్తాం న్యషేధతాం

10(2)-58-31
రాజాధిదేవ్యాస్తనయాం మిత్రవిందాం పితృష్వసుః .
ప్రసహ్య హృతవాన్ కృష్ణో రాజన్ రాజ్ఞాం ప్రపశ్యతాం

10(2)-58-32
నగ్నజిన్నామ కౌసల్య ఆసీద్రాజాతిధార్మికః .
తస్య సత్యాభవత్కన్యా దేవీ నాగ్నజితీ నృప

10(2)-58-33
న తాం శేకుర్నృపా వోఢుమజిత్వా సప్త గోవృషాన్ .
తీక్ష్ణశృంగాన్ సుదుర్ధర్షాన్ వీరగంధాసహాన్ ఖలాన్

10(2)-58-34
తాం శ్రుత్వా వృషజిల్లభ్యాం భగవాన్ సాత్వతాం పతిః .
జగామ కౌసల్యపురం సైన్యేన మహతా వృతః

10(2)-58-35
స కోసలపతిః ప్రీతః ప్రత్యుత్థానాసనాదిభిః .
అర్హణేనాపి గురుణా పూజయన్ ప్రతినందితః

10(2)-58-36
వరం విలోక్యాభిమతం సమాగతం
నరేంద్రకన్యా చకమే రమాపతిం .
భూయాదయం మే పతిరాశిషోఽమలాః
కరోతు సత్యా యది మే ధృతో వ్రతైః

10(2)-58-37
యత్పాదపంకజరజః శిరసా బిభర్తి
శ్రీరబ్జజః సగిరిశః సహ లోకపాలైః .
లీలాతనూః స్వకృతసేతుపరీప్సయేశః
కాలే దధత్స భగవాన్ మమ కేన తుష్యేత్

10(2)-58-38
అర్చితం పునరిత్యాహ నారాయణ జగత్పతే .
ఆత్మానందేన పూర్ణస్య కరవాణి కిమల్పకః

10(2)-58-39
శ్రీశుక ఉవాచ
తమాహ భగవాన్ హృష్టః కృతాసనపరిగ్రహః .
మేఘగంభీరయా వాచా సస్మితం కురునందన

10(2)-58-40
శ్రీభగవానువాచ
నరేంద్ర యాచ్ఞా కవిభిర్విగర్హితా
రాజన్యబంధోర్నిజధర్మవర్తినః .
తథాపి యాచే తవ సౌహృదేచ్ఛయా
కన్యాం త్వదీయాం న హి శుల్కదా వయం

10(2)-58-41
రాజోవాచ
కోఽన్యస్తేఽభ్యధికో నాథ కన్యావర ఇహేప్సితః .
గుణైకధామ్నో యస్యాంగే శ్రీర్వసత్యనపాయినీ

10(2)-58-42
కింత్వస్మాభిః కృతః పూర్వం సమయః సాత్వతర్షభ .
పుంసాం వీర్యపరీక్షార్థం కన్యావరపరీప్సయా

10(2)-58-43
సప్తైతే గోవృషా వీర దుర్దాంతా దురవగ్రహాః .
ఏతైర్భగ్నాః సుబహవో భిన్నగాత్రా నృపాత్మజాః

10(2)-58-44
యదిమే నిగృహీతాః స్యుస్త్వయైవ యదునందన .
వరో భవానభిమతో దుహితుర్మే శ్రియఃపతే

10(2)-58-45
ఏవం సమయమాకర్ణ్య బద్ధ్వా పరికరం ప్రభుః .
ఆత్మానం సప్తధా కృత్వా న్యగృహ్ణాల్లీలయైవ తాన్

10(2)-58-46
బద్ధ్వా తాన్ దామభిః శౌరిర్భగ్నదర్పాన్ హతౌజసః .
వ్యకర్షల్లీలయా బద్ధాన్ బాలో దారుమయాన్ యథా

10(2)-58-47
తతః ప్రీతః సుతాం రాజా దదౌ కృష్ణాయ విస్మితః .
తాం ప్రత్యగృహ్ణాద్భగవాన్ విధివత్సదృశీం ప్రభుః

10(2)-58-48
రాజపత్న్యశ్చ దుహితుః కృష్ణం లబ్ధ్వా ప్రియం పతిం .
లేభిరే పరమానందం జాతశ్చ పరమోత్సవః

10(2)-58-49
శంఖభేర్యానకా నేదుర్గీతవాద్యద్విజాశిషః .
నరా నార్యః ప్రముదితాః సువాసఃస్రగలంకృతాః

10(2)-58-50
దశధేనుసహస్రాణి పారిబర్హమదాద్విభుః .
యువతీనాం త్రిసాహస్రం నిష్కగ్రీవసువాసాం

10(2)-58-51
నవనాగసహస్రాణి నాగాచ్ఛతగుణాన్ రథాన్ .
రథాచ్ఛతగుణానశ్వానశ్వాచ్ఛతగుణాన్ నరాన్

10(2)-58-52
దంపతీ రథమారోప్య మహత్యా సేనయా వృతౌ .
స్నేహప్రక్లిన్నహృదయో యాపయామాస కోసలః

10(2)-58-53
శ్రుత్వైతద్రురుధుర్భూపా నయంతం పథి కన్యకాం .
భగ్నవీర్యాః సుదుర్మర్షా యదుభిర్గోవృషైః పురా

10(2)-58-54
తానస్యతః శరవ్రాతాన్ బంధుప్రియకృదర్జునః .
గాండీవీ కాలయామాస సింహః క్షుద్రమృగానివ

10(2)-58-55
పారిబర్హముపాగృహ్య ద్వారకామేత్య సత్యయా .
రేమే యదూనామృషభో భగవాన్ దేవకీసుతః

10(2)-58-56
శ్రుతకీర్తేః సుతాం భద్రాముపయేమే పితృష్వసుః .
కైకేయీం భ్రాతృభిర్దత్తాం కృష్ణః సంతర్దనాదిభిః

10(2)-58-57
సుతాం చ మద్రాధిపతేర్లక్ష్మణాం లక్షణైర్యుతాం .
స్వయంవరే జహారైకః స సుపర్ణః సుధామివ

10(2)-58-58
అన్యాశ్చైవంవిధా భార్యాః కృష్ణస్యాసన్ సహస్రశః .
భౌమం హత్వా తన్నిరోధాదాహృతాశ్చారుదర్శనాః

10(2)-58-59
ఇతి శ్రీమద్భాగవతే మహాపురాణే పారమహంస్యాం సంహితాయాం
దశమస్కంధే ఉత్తరార్ధే అష్టమహిష్యుద్వాహో
నామాష్టపంచాశత్తమోఽధ్యాయః