పోతన తెలుగు భాగవతము

పోతన తెలుగు భాగవతము

చతుర్థ స్కంధః : పంచమోఽధ్యాయః - 5

4-5-1
మైత్రేయ ఉవాచ
భవో భవాన్యా నిధనం ప్రజాపతే-
రసత్కృతాయా అవగమ్య నారదాత్ .
స్వపార్షదసైన్యం చ తదధ్వరర్భుభి-
ర్విద్రావితం క్రోధమపారమాదధే

4-5-2
క్రుద్ధః సుదష్టౌష్ఠపుటః స ధూర్జటిర్జటాం
తడిద్వహ్నిసటోగ్రరోచిషం .
ఉత్కృత్య రుద్రః సహసోత్థితో హసన్
గంభీరనాదో విససర్జ తాం భువి

4-5-3
తతోఽతికాయస్తనువా స్పృశన్ దివం
సహస్రబాహుర్ఘనరుక్ త్రిసూర్యదృక్ .
కరాలదంష్ట్రో జ్వలదగ్నిమూర్ధజః
కపాలమాలీ వివిధోద్యతాయుధః

4-5-4
తం కిం కరోమీతి గృణంతమాహ
బద్ధాంజలిం భగవాన్ భూతనాథః .
దక్షం సయజ్ఞం జహి మద్భటానాం
త్వమగ్రణీ రుద్రభటాంశకో మే

4-5-5
ఆజ్ఞప్త ఏవం కుపితేన మన్యునా
స దేవదేవం పరిచక్రమే విభుం .
మేనే తదాత్మానమసంగరంహసా
మహీయసాం తాత సహః సహిష్ణుం

4-5-6
అన్వీయమానః స తు రుద్ర పార్షదైర్భృశం
నదద్భిర్వ్యనదత్సుభైరవం .
ఉద్యమ్య శూలం జగదంతకాంతకం
స ప్రాద్రవద్ఘోషణభూషణాంఘ్రిః

4-5-7
అథర్త్విజో యజమానః సదస్యాః
కకుద్భ్యుదీచ్యాం ప్రసమీక్ష్య రేణుం .
తమః కిమేతత్కుత ఏతద్రజోఽభూదితి
ద్విజా ద్విజపత్న్యశ్చ దధ్యుః

4-5-8
వాతా న వాంతి న హి సంతి దస్యవః
ప్రాచీనబర్హిర్జీవతి హోగ్రదండః .
గావో న కాల్యంత ఇదం కుతో రజో
లోకోఽధునా కిం ప్రలయాయ కల్పతే

4-5-9
ప్రసూతిమిశ్రాః స్త్రియ ఉద్విగ్నచిత్తా
ఊచుర్విపాకో వృజినస్యైవ తస్య .
యత్పశ్యంతీనాం దుహితౄణాం ప్రజేశః
సుతాం సతీమవదధ్యావనాగాం

4-5-10
యస్త్వంతకాలే వ్యుప్తజటాకలాపః
స్వశూలసూచ్యర్పితదిగ్గజేంద్రః .
వితత్య నృత్యత్యుదితాస్త్రదోర్ధ్వజా-
నుచ్చాట్టహాసస్తనయిత్నుభిన్నదిక్

4-5-11
అమర్షయిత్వా తమసహ్యతేజసం
మన్యుప్లుతం దుర్విషహం భ్రుకుట్యా .
కరాలదంష్ట్రాభిరుదస్తభాగణం
స్యాత్స్వస్తి కిం కోపయతో విధాతుః

4-5-12
బహ్వేవముద్విగ్నదృశోచ్యమానే
జనేన దక్షస్య ముహుర్మహాత్మనః .
ఉత్పేతురుత్పాతతమాః సహస్రశో
భయావహా దివి భూమౌ చ పర్యక్

4-5-13
తావత్స రుద్రానుచరైర్మఖో మహాన్
నానాయుధైర్వామనకైరుదాయుధైః .
పింగైః పిశంగైర్మకరోదరాననైః
పర్యాద్రవద్భిర్విదురాన్వరుధ్యత

4-5-14
కేచిద్బభంజుః ప్రాగ్వంశం పత్నీశాలాం తథాపరే .
సద ఆగ్నీధ్రశాలాం చ తద్విహారం మహానసం

4-5-15
రురుజుర్యజ్ఞపాత్రాణి తథైకేఽగ్నీననాశయన్ .
కుండేష్వమూత్రయన్ కేచిద్బిభిదుర్వేదిమేఖలాః

4-5-16
అబాధంత మునీనన్యే ఏకే పత్నీరతర్జయన్ .
అపరే జగృహుర్దేవాన్ ప్రత్యాసన్నాన్ పలాయితాన్

4-5-17
భృగుం బబంధ మణిమాన్ వీరభద్రః ప్రజాపతిం .
చండేశః పూషణం దేవం భగం నందీశ్వరోఽగ్రహీత్

4-5-18
సర్వ ఏవర్త్విజో దృష్ట్వా సదస్యాః సదివౌకసః .
తైరర్ద్యమానాః సుభృశం గ్రావభిర్నైకధాద్రవన్

4-5-19
జుహ్వతః స్రువహస్తస్య శ్మశ్రూణి భగవాన్ భవః .
భృగోర్లులుంచే సదసి యోఽహసచ్ఛ్మశ్రు దర్శయన్

4-5-20
భగస్య నేత్రే భగవాన్ పాతితస్య రుషా భువి .
ఉజ్జహార సదఃస్థోఽక్ష్ణా యః శపంతమసూసుచత్

4-5-21
పూష్ణశ్చాపాతయద్దంతాన్ కాలింగస్య యథా బలః .
శప్యమానే గరిమణి యోఽహసద్దర్శయన్ దతః

4-5-22
ఆక్రమ్యోరసి దక్షస్య శితధారేణ హేతినా .
ఛిందన్నపి తదుద్ధర్తుం నాశక్నోత్త్ర్యంబకస్తదా

4-5-23
శస్త్రైరస్త్రాన్వితైరేవమనిర్భిన్నత్వచం హరః .
విస్మయం పరమాపన్నో దధ్యౌ పశుపతిశ్చిరం

4-5-24
దృష్ట్వా సంజ్ఞపనం యోగం పశూనాం స పతిర్మఖే .
యజమానపశోః కస్య కాయాత్తేనాహరచ్ఛిరః

4-5-25
సాధువాదస్తదా తేషాం కర్మ తత్తస్య పశ్యతాం .
భూతప్రేతపిశాచానామన్యేషాం తద్విపర్యయః

4-5-26
జుహావైతచ్ఛిరస్తస్మిన్ దక్షిణాగ్నావమర్షితః .
తద్దేవయజనం దగ్ధ్వా ప్రాతిష్ఠద్గుహ్యకాలయం

4-5-27
ఇతి శ్రీమద్భాగవతే మహాపురాణే పారమహంస్యాం సంహితాయాం
చతుర్థస్కంధే దక్షయజ్ఞవిధ్వంసో నామ పంచమోఽధ్యాయః