పోతన తెలుగు భాగవతము

చతుర్థ స్కంధః : పంచదశోఽధ్యాయః - 15

• Print
• Email
• Share on FaceBook
• Share on Twitter

4-15-2
స గో నా సం గో గో
తద్దృష్ట్వా మిథునం జాతం ఋషయో బ్రహ్మవాదినః .
ఊచుః పరమసంతుష్టా విదిత్వా భగవత్కలాం

4-15-3
ఋషయ ఊచుః
ఏష విష్ణోర్భగవతః కలా భువనపాలినీ .
ఇయం చ లక్ష్మ్యాః సంభూతిః పురుషస్యానపాయినీ

4-15-4
అయం తు ప్రథమో రాజ్ఞాం పుమాన్ ప్రథయితా యశః .
పృథుర్నామ మహారాజో భవిష్యతి పృథుశ్రవాః

4-15-5
ఇయం చ సుదతీ దేవీ గుణభూషణభూషణా .
అర్చిర్నామ వరారోహా పృథుమేవావరుంధతీ

4-15-6
ఏష సాక్షాద్ధరేరంశో జాతో లోకరిరక్షయా .
ఇయం చ తత్పరా హి శ్రీరనుజజ్ఞేఽనపాయినీ

4-15-7
మైత్రేయ ఉవాచ
ప్రశంసంతి స్మ తం విప్రా గంధర్వప్రవరా జగుః .
ముముచుః సుమనోధారాః సిద్ధా నృత్యంతి స్వఃస్త్రియః

4-15-8
శంఖతూర్యమృదంగాద్యా నేదుర్దుందుభయో దివి .
తత్ర సర్వ ఉపాజగ్ముర్దేవర్షిపితౄణాం గణాః

4-15-9
బ్రహ్మా జగద్గురుర్దేవైః సహాసృత్య సురేశ్వరైః .
వైన్యస్య దక్షిణే హస్తే దృష్ట్వా చిహ్నం గదాభృతః

4-15-10
పాదయోరరవిందం చ తం వై మేనే హరేః కలాం .
యస్యాప్రతిహతం చక్రమంశః స పరమేష్ఠినః

4-15-11
తస్యాభిషేక ఆరబ్ధో బ్రాహ్మణైర్బ్రహ్మవాదిభిః .
ఆభిషేచనికాన్యస్మై ఆజహ్రుః సర్వతో జనాః

4-15-12
సరిత్సముద్రా గిరయో నాగా గావః ఖగా మృగాః .
ద్యౌః క్షితిః సర్వభూతాని సమాజహ్రురుపాయనం

4-15-13
సోఽభిషిక్తో మహారాజః సువాసాః సాధ్వలంకృతః .
పత్న్యార్చిషాలంకృతయా విరేజేఽగ్నిరివాపరః

4-15-14
తస్మై జహార ధనదో హైమం వీరవరాసనం .
వరుణః సలిలస్రావమాతపత్రం శశిప్రభం

4-15-15
వాయుశ్చ వాలవ్యజనే ధర్మః కీర్తిమయీం స్రజం .
ఇంద్రః కిరీటముత్కృష్టం దండం సంయమనం యమః

4-15-16
బ్రహ్మా బ్రహ్మమయం వర్మ భారతీ హారముత్తమం .
హరిః సుదర్శనం చక్రం తత్పత్న్యవ్యాహతాం శ్రియం

4-15-17
దశచంద్రమసిం రుద్రః శతచంద్రం తథాంబికా .
సోమోఽమృతమయానశ్వాంస్త్వష్టా రూపాశ్రయం రథం

4-15-18
అగ్నిరాజగవం చాపం సూర్యో రశ్మిమయానిషూన్ .
భూః పాదుకే యోగమయ్యౌ ద్యౌః పుష్పావలిమన్వహం

4-15-19
నాట్యం సుగీతం వాదిత్రమంతర్ధానం చ ఖేచరాః .
ఋషయశ్చాశిషః సత్యాః సముద్రః శంఖమాత్మజం

4-15-20
సింధవః పర్వతా నద్యో రథవీథీర్మహాత్మనః .
సూతోఽథ మాగధో వందీ తం స్తోతుముపతస్థిరే

4-15-21
స్తావకాంస్తానభిప్రేత్య పృథుర్వైన్యః ప్రతాపవాన్ .
మేఘనిర్హ్రాదయా వాచా ప్రహసన్నిదమబ్రవీత్

4-15-22
పృథురువాచ
భోః సూత హే మాగధ సౌమ్య వందిన్
లోకేఽధునాస్పష్టగుణస్య మే స్యాత్ .
కిమాశ్రయో మే స్తవ ఏష యోజ్యతాం
మా మయ్యభూవన్ వితథా గిరో వః

4-15-23
తస్మాత్పరోక్షేఽస్మదుపశ్రుతాన్యలం
కరిష్యథ స్తోత్రమపీచ్యవాచః .
సత్యుత్తమశ్లోకగుణానువాదే
జుగుప్సితం న స్తవయంతి సభ్యాః

4-15-24
మహద్గుణానాత్మని కర్తుమీశః
కః స్తావకైః స్తావయతేఽసతోఽపి .
తేఽస్యాభవిష్యన్నితి విప్రలబ్ధో
జనావహాసం కుమతిర్న వేద

4-15-25
ప్రభవో హ్యాత్మనః స్తోత్రం జుగుప్సంత్యపి విశ్రుతాః .
హ్రీమంతః పరమోదారాః పౌరుషం వా విగర్హితం

4-15-26
వయం త్వవిదితా లోకే సూతాద్యాపి వరీమభిః .
కర్మభిః కథమాత్మానం గాపయిష్యామ బాలవత్

4-15-27
ఇతి శ్రీమద్భాగవతే మహాపురాణే పారమహంస్యాం సంహితాయాం
చతుర్థస్కంధే పృథుచరితే పంచదశోఽధ్యాయః