పోతన తెలుగు భాగవతము

పోతన తెలుగు భాగవతము

చతుర్థ స్కంధః : ద్వితీయోఽధ్యాయః - 2

4-2-1
విదుర ఉవాచ
భవే శీలవతాం శ్రేష్ఠే దక్షో దుహితృవత్సలః .
విద్వేషమకరోత్కస్మాదనాదృత్యాత్మజాం సతీం

4-2-2
కస్తం చరాచరగురుం నిర్వైరం శాంతవిగ్రహం .
ఆత్మారామం కథం ద్వేష్టి జగతో దైవతం మహత్

4-2-3
ఏతదాఖ్యాహి మే బ్రహ్మన్ జామాతుః శ్వశురస్య చ .
విద్వేషస్తు యతః ప్రాణాంస్తత్యజే దుస్త్యజాన్ సతీ

4-2-4
మైత్రేయ ఉవాచ
పురా విశ్వసృజాం సత్రే సమేతాః పరమర్షయః .
తథామరగణాః సర్వే సానుగా మునయోఽగ్నయః

4-2-5
తత్ర ప్రవిష్టమృషయో దృష్ట్వార్కమివ రోచిషా .
భ్రాజమానం వితిమిరం కుర్వంతం తన్మహత్సదః

4-2-6
ఉదతిష్ఠన్సదస్యాస్తే స్వధిష్ణ్యేభ్యః సహాగ్నయః .
ఋతే విరించం శర్వం చ తద్భాసాక్షిప్తచేతసః

4-2-7
సదసస్పతిభిర్దక్షో భగవాన్ సాధు సత్కృతః .
అజం లోకగురుం నత్వా నిషసాద తదాజ్ఞయా

4-2-8
ప్రాఙ్నిషణ్ణం మృడం దృష్ట్వా నామృష్యత్తదనాదృతః .
ఉవాచ వామం చక్షుర్భ్యామభివీక్ష్య దహన్నివ

4-2-9
శ్రూయతాం బ్రహ్మర్షయో మే సహ దేవాః సహాగ్నయః .
సాధూనాం బ్రువతో వృత్తం నాజ్ఞానాన్న చ మత్సరాత్

4-2-10
అయం తు లోకపాలానాం యశోఘ్నో నిరపత్రపః .
సద్భిరాచరితః పంథా యేన స్తబ్ధేన దూషితః

4-2-11
ఏష మే శిష్యతాం ప్రాప్తో యన్మే దుహితురగ్రహీత్ .
పాణిం విప్రాగ్నిముఖతః సావిత్ర్యా ఇవ సాధువత్

4-2-12
గృహీత్వా మృగశావాక్ష్యాః పాణిం మర్కటలోచనః .
ప్రత్యుత్థానాభివాదార్హే వాచాప్యకృత నోచితం

4-2-13
లుప్తక్రియాయాశుచయే మానినే భిన్నసేతవే .
అనిచ్ఛన్నప్యదాం బాలాం శూద్రాయేవోశతీం గిరం

4-2-14
ప్రేతావాసేషు ఘోరేషు ప్రేతైర్భూతగణైర్వృతః .
అటత్యున్మత్తవన్నగ్నో వ్యుప్తకేశో హసన్ రుదన్

4-2-15
చితాభస్మకృతస్నానః ప్రేతస్రఙ్ న్రస్థిభూషణః .
శివాపదేశో హ్యశివో మత్తో మత్తజనప్రియః .
పతిః ప్రమథభూతానాం తమోమాత్రాత్మకాత్మనాం

4-2-16
తస్మా ఉన్మాదనాథాయ నష్టశౌచాయ దుర్హృదే .
దత్తా బత మయా సాధ్వీ చోదితే పరమేష్ఠినా

4-2-17
మైత్రేయ ఉవాచ
వినింద్యైవం స గిరిశమప్రతీపమవస్థితం .
దక్షోఽథాప ఉపస్పృశ్య క్రుద్ధః శప్తుం ప్రచక్రమే

4-2-18
అయం తు దేవయజన ఇంద్రోపేంద్రాదిభిర్భవః .
సహ భాగం న లభతాం దేవైర్దేవగణాధమః

4-2-19
నిషిధ్యమానః స సదస్యముఖ్యైర్దక్షో
గిరిత్రాయ విసృజ్య శాపం .
తస్మాద్వినిష్క్రమ్య వివృద్ధమన్యుర్జగామ
కౌరవ్య నిజం నికేతనం

4-2-20
విజ్ఞాయ శాపం గిరిశానుగాగ్రణీః
నందీశ్వరో రోషకషాయదూషితః .
దక్షాయ శాపం విససర్జ దారుణం
యే చాన్వమోదంస్తదవాచ్యతాం ద్విజాః

4-2-21
య ఏతన్మర్త్యముద్దిశ్య భగవత్యప్రతిద్రుహి .
ద్రుహ్యత్యజ్ఞః పృథగ్దృష్టిస్తత్త్వతో విముఖో భవేత్

4-2-22
గృహేషు కూటధర్మేషు సక్తో గ్రామ్యసుఖేచ్ఛయా .
కర్మతంత్రం వితనుతే వేదవాదవిపన్నధీః

4-2-23
బుద్ధ్యా పరాభిధ్యాయిన్యా విస్మృతాత్మగతిః పశుః .
స్త్రీకామః సోఽస్త్వతితరాం దక్షో బస్తముఖోఽచిరాత్

4-2-24
విద్యాబుద్ధిరవిద్యాయాం కర్మమయ్యామసౌ జడః .
సంసరంత్విహ యే చాముమను శర్వావమానినం

4-2-25
గిరః శ్రుతాయాః పుష్పిణ్యా మధుగంధేన భూరిణా .
మథ్నా చోన్మథితాత్మానః సమ్ముహ్యంతు హరద్విషః

4-2-26
సర్వభక్షా ద్విజా వృత్త్యై ధృతవిద్యా తపోవ్రతాః .
విత్తదేహేంద్రియారామా యాచకా విచరంత్విహ

4-2-27
తస్యైవం దదతః శాపం శ్రుత్వా ద్విజకులాయ వై .
భృగుః ప్రత్యసృజచ్ఛాపం బ్రహ్మదండం దురత్యయం

4-2-28
భవవ్రతధరా యే చ యే చ తాన్ సమనువ్రతాః
పాఖండినస్తే భవంతు సచ్ఛాస్త్రపరిపంథినః

4-2-29
నష్టశౌచా మూఢధియో జటాభస్మాస్థిధారిణః .
విశంతు శివదీక్షాయాం యత్ర దైవం సురాసవం

4-2-30
బ్రహ్మ చ బ్రాహ్మణాంశ్చైవ యద్యూయం పరినిందథ .
సేతుం విధారణం పుంసామతః పాఖండమాశ్రితాః

4-2-31
ఏష ఏవ హి లోకానాం శివః పంథాః సనాతనః .
యం పూర్వే చానుసంతస్థుర్యత్ప్రమాణం జనార్దనః

4-2-32
తద్బ్రహ్మ పరమం శుద్ధం సతాం వర్త్మ సనాతనం .
విగర్హ్య యాత పాఖండం దైవం వో యత్ర భూతరాట్

4-2-33
మైత్రేయ ఉవాచ
తస్యైవం వదతః శాపం భృగోః స భగవాన్ భవః .
నిశ్చక్రామ తతః కించిద్విమనా ఇవ సానుగః

4-2-34
తేఽపి విశ్వసృజః సత్రం సహస్రపరివత్సరాన్ .
సంవిధాయ మహేష్వాస యత్రేజ్య ఋషభో హరిః

4-2-35
ఆప్లుత్యావభృథం యత్ర గంగా యమునయాన్వితా .
విరజేనాత్మనా సర్వే స్వం స్వం ధామ యయుస్తతః

4-2-36
ఇతి శ్రీమద్భాగవతే మహాపురాణే పారమహంస్యాం సంహితాయాం
చతుర్థస్కంధే దక్షశాపో నామ ద్వితీయోధ్యాయః