పోతన తెలుగు భాగవతము

పోతన తెలుగు భాగవతము

చతుర్థ స్కంధః : అష్టాదశోఽధ్యాయః - 18

4-18-1
మైత్రేయ ఉవాచ
ఇత్థం పృథుమభిష్టూయ రుషా ప్రస్ఫురితాధరం .
పునరాహావనిర్భీతా సంస్తభ్యాత్మానమాత్మనా

4-18-2
సన్నియచ్ఛాభిభో మన్యుం నిబోధ శ్రావితం చ మే .
సర్వతః సారమాదత్తే యథా మధుకరో బుధః

4-18-3
అస్మిన్ లోకేఽథవాముష్మిన్ మునిభిస్తత్త్వదర్శిభిః .
దృష్టా యోగాః ప్రయుక్తాశ్చ పుంసాం శ్రేయఃప్రసిద్ధయే

4-18-4
తానాతిష్ఠతి యః సమ్యగుపాయాన్ పూర్వదర్శితాన్ .
అవరః శ్రద్ధయోపేత ఉపేయాన్ విందతేఽఞ్జసా

4-18-5
తాననాదృత్య యోఽవిద్వానర్థానారభతే స్వయం .
తస్య వ్యభిచరంత్యర్థా ఆరబ్ధాశ్చ పునః పునః

4-18-6
పురా సృష్టా హ్యోషధయో బ్రహ్మణా యా విశాంపతే .
భుజ్యమానా మయా దృష్టా అసద్భిరధృతవ్రతైః

4-18-7
అపాలితానాదృతా చ భవద్భిర్లోకపాలకైః .
చోరీభూతేఽథ లోకేఽహం యజ్ఞార్థేఽగ్రసమోషధీః

4-18-8
నూనం తా వీరుధః క్షీణా మయి కాలేన భూయసా .
తత్ర యోగేన దృష్టేన భవానాదాతుమర్హతి

4-18-9
వత్సం కల్పయ మే వీర యేనాహం వత్సలా తవ .
ధోక్ష్యే క్షీరమయాన్ కామాననురూపం చ దోహనం

4-18-10
దోగ్ధారం చ మహాబాహో భూతానాం భూతభావన .
అన్నమీప్సితమూర్జస్వద్భగవాన్ వాంఛతే యది

4-18-11
సమాం చ కురు మాం రాజన్ దేవవృష్టం యథా పయః .
అపర్తావపి భద్రం తే ఉపావర్తేత మే విభో

4-18-12
ఇతి ప్రియం హితం వాక్యం భువ ఆదాయ భూపతిః .
వత్సం కృత్వా మనుం పాణావదుహత్సకలౌషధీః

4-18-13
తథాపరే చ సర్వత్ర సారమాదదతే బుధాః .
తతోఽన్యే చ యథాకామం దుదుహుః పృథుభావితాం

4-18-14
ఋషయో దుదుహుర్దేవీమింద్రియేష్వథ సత్తమ .
వత్సం బృహస్పతిం కృత్వా పయశ్ఛందోమయం శుచి

4-18-15
కృత్వా వత్సం సురగణా ఇంద్రం సోమమదూదుహన్ .
హిరణ్మయేన పాత్రేణ వీర్యమోజో బలం పయః

4-18-16
దైతేయా దానవా వత్సం ప్రహ్లాదమసురర్షభం .
విధాయాదూదుహన్ క్షీరమయఃపాత్రే సురాసవం

4-18-17
గంధర్వాప్సరసోఽధుక్షన్ పాత్రే పద్మమయే పయః .
వత్సం విశ్వావసుం కృత్వా గాంధర్వం మధు సౌభగం

4-18-18
వత్సేన పితరోఽర్యమ్ణా కవ్యం క్షీరమధుక్షత .
ఆమపాత్రే మహాభాగాః శ్రద్ధయా శ్రాద్ధదేవతాః

4-18-19
ప్రకల్ప్య వత్సం కపిలం సిద్ధాః సంకల్పనామయీం .
సిద్ధిం నభసి విద్యాం చ యే చ విద్యాధరాదయః

4-18-20
అన్యే చ మాయినో మాయామంతర్ధానాద్భుతాత్మనాం .
మయం ప్రకల్ప్య వత్సం తే దుదుహుర్ధారణామయీం

4-18-21
యక్షరక్షాంసి భూతాని పిశాచాః పిశితాశనాః .
భూతేశవత్సా దుదుహుః కపాలే క్షతజాసవం

4-18-22
తథాహయో దందశూకాః సర్పా నాగాశ్చ తక్షకం .
విధాయ వత్సం దుదుహుర్బిలపాత్రే విషం పయః

4-18-23
పశవో యవసం క్షీరం వత్సం కృత్వా చ గోవృషం .
అరణ్యపాత్రే చాధుక్షన్ మృగేంద్రేణ చ దంష్ట్రిణః

4-18-24
క్రవ్యాదాః ప్రాణినః క్రవ్యం దుదుహుః స్వే కలేవరే .
సుపర్ణవత్సా విహగాశ్చరం చాచరమేవ చ

4-18-25
వటవత్సా వనస్పతయః పృథగ్రసమయం పయః .
గిరయో హిమవద్వత్సా నానాధాతూన్ స్వసానుషు

4-18-26
సర్వే స్వముఖ్యవత్సేన స్వే స్వే పాత్రే పృథక్పయః .
సర్వకామదుఘాం పృథ్వీం దుదుహుః పృథుభావితాం

4-18-27
ఏవం పృథ్వాదయః పృథ్వీమన్నాదాః స్వన్నమాత్మనః .
దోహవత్సాది భేదేన క్షీరభేదం కురూద్వహ

4-18-28
తతో మహీపతిః ప్రీతః సర్వకామదుఘాం పృథుః .
దుహితృత్వే చకారేమాం ప్రేమ్ణా దుహితృవత్సలః

4-18-29
చూర్ణయన్ స్వధనుష్కోట్యా గిరికూటాని రాజరాట్ .
భూమండలమిదం వైన్యః ప్రాయశ్చక్రే సమం విభుః

4-18-30
అథాస్మిన్ భగవాన్ వైన్యః ప్రజానాం వృత్తిదః పితా .
నివాసాన్ కల్పయాంచక్రే తత్ర తత్ర యథార్హతః

4-18-31
గ్రామాన్ పురః పత్తనాని దుర్గాణి వివిధాని చ .
ఘోషాన్ వ్రజాన్ సశిబిరానాకరాన్ ఖేటఖర్వటాన్

4-18-32
ప్రాక్పృథోరిహ నైవైషా పురగ్రామాది కల్పనా .
యథాసుఖం వసంతి స్మ తత్ర తత్రాకుతోభయాః

4-18-33
ఇతి శ్రీమద్భాగవతే మహాపురాణే పారమహంస్యాం సంహితాయాం
చతుర్థస్కంధే పృథువిజయే అష్టాదశోఽధ్యాయః