అష్టమస్కంధః : త్రయోవింశోఽధ్యాయః - 23
8-23-1
శ్రీశుక ఉవాచ
ఇత్యుక్తవంతం పురుషం పురాతనం
మహానుభావోఽఖిలసాధుసమ్మతః .
బద్ధాంజలిర్బాష్పకలాకులేక్షణో
భక్త్యుద్గలో గద్గదయా గిరాబ్రవీత్
8-23-2
బలిరువాచ
అహో ప్రణామాయ కృతః సముద్యమః
ప్రపన్నభక్తార్థవిధౌ సమాహితః .
యల్లోకపాలైస్త్వదనుగ్రహోఽమరై-
రలబ్ధపూర్వోఽపసదేఽసురేఽర్పితః
8-23-3
శ్రీశుక ఉవాచ
ఇత్యుక్త్వా హరిమానమ్య బ్రహ్మాణం సభవం తతః .
వివేశ సుతలం ప్రీతో బలిర్ముక్తః సహాసురైః
8-23-4
ఏవమింద్రాయ భగవాన్ ప్రత్యానీయ త్రివిష్టపం .
పూరయిత్వాదితేః కామమశాసత్సకలం జగత్
8-23-5
లబ్ధప్రసాదం నిర్ముక్తం పౌత్రం వంశధరం బలిం .
నిశామ్య భక్తిప్రవణః ప్రహ్లాద ఇదమబ్రవీత్
8-23-6
ప్రహ్లాద ఉవాచ
నేమం విరించో లభతే ప్రసాదం
న శ్రీర్న శర్వః కిముతాపరే తే .
యన్నోఽసురాణామసి దుర్గపాలో
విశ్వాభివంద్యైరభివందితాంఘ్రిః
8-23-7
యత్పాదపద్మమకరందనిషేవణేన
బ్రహ్మాదయః శరణదాశ్నువతే విభూతీః .
కస్మాద్వయం కుసృతయః ఖలయోనయస్తే
దాక్షిణ్యదృష్టిపదవీం భవతః ప్రణీతాః
8-23-8
చిత్రం తవేహితమహోఽమితయోగమాయా-
లీలావిసృష్టభువనస్య విశారదస్య .
సర్వాత్మనః సమదృశోఽవిషమః స్వభావో
భక్తప్రియో యదసి కల్పతరుస్వభావః
8-23-9
శ్రీభగవానువాచ
వత్స ప్రహ్లాద భద్రం తే ప్రయాహి సుతలాలయం .
మోదమానః స్వపౌత్రేణ జ్ఞాతీనాం సుఖమావహ
8-23-10
నిత్యం ద్రష్టాసి మాం తత్ర గదాపాణిమవస్థితం .
మద్దర్శనమహాహ్లాదధ్వస్తకర్మనిబంధనః
8-23-11
శ్రీశుక ఉవాచ
ఆజ్ఞాం భగవతో రాజన్ ప్రహ్లాదో బలినా సహ .
బాఢమిత్యమలప్రజ్ఞో మూర్ధ్న్యాధాయ కృతాంజలిః
8-23-12
పరిక్రమ్యాదిపురుషం సర్వాసురచమూపతిః .
ప్రణతస్తదనుజ్ఞాతః ప్రవివేశ మహాబిలం
8-23-13
అథాహోశనసం రాజన్ హరిర్నారాయణోఽన్తికే .
ఆసీనమృత్విజాం మధ్యే సదసి బ్రహ్మవాదినాం
8-23-14
బ్రహ్మన్ సంతను శిష్యస్య కర్మచ్ఛిద్రం వితన్వతః .
యత్తత్కర్మసు వైషమ్యం బ్రహ్మదృష్టం సమం భవేత్
8-23-15
శుక్ర ఉవాచ
కుతస్తత్కర్మవైషమ్యం యస్య కర్మేశ్వరో భవాన్ .
యజ్ఞేశో యజ్ఞపురుషః సర్వభావేన పూజితః
8-23-16
మంత్రతస్తంత్రతశ్ఛిద్రం దేశకాలార్హవస్తుతః .
సర్వం కరోతి నిశ్ఛిద్రం నామసంకీర్తనం తవ
8-23-17
తథాపి వదతో భూమన్ కరిష్యామ్యనుశాసనం .
ఏతచ్ఛ్రేయః పరం పుంసాం యత్తవాజ్ఞానుపాలనం
8-23-18
శ్రీశుక ఉవాచ
అభినంద్య హరేరాజ్ఞాముశనా భగవానితి .
యజ్ఞచ్ఛిద్రం సమాధత్త బలేర్విప్రర్షిభిః సహ
8-23-19
ఏవం బలేర్మహీం రాజన్ భిక్షిత్వా వామనో హరిః .
దదౌ భ్రాత్రే మహేంద్రాయ త్రిదివం యత్పరైర్హృతం
8-23-20
ప్రజాపతిపతిర్బ్రహ్మా దేవర్షిపితృభూమిపైః .
దక్షభృగ్వంగిరోముఖ్యైః కుమారేణ భవేన చ
8-23-21
కశ్యపస్యాదితేః ప్రీత్యై సర్వభూతభవాయ చ .
లోకానాం లోకపాలానామకరోద్వామనం పతిం
8-23-22
వేదానాం సర్వదేవానాం ధర్మస్య యశసః శ్రియః .
మంగలానాం వ్రతానాం చ కల్పం స్వర్గాపవర్గయోః
8-23-23
ఉపేంద్రం కల్పయాంచక్రే పతిం సర్వవిభూతయే .
తదా సర్వాణి భూతాని భృశం ముముదిరే నృప
8-23-24
తతస్త్వింద్రః పురస్కృత్య దేవయానేన వామనం .
లోకపాలైర్దివం నిన్యే బ్రహ్మణా చానుమోదితః
8-23-25
ప్రాప్య త్రిభువనం చేంద్ర ఉపేంద్రభుజపాలితః .
శ్రియా పరమయా జుష్టో ముముదే గతసాధ్వసః
8-23-26
బ్రహ్మా శర్వః కుమారశ్చ భృగ్వాద్యా మునయో నృప .
పితరః సర్వభూతాని సిద్ధా వైమానికాశ్చ యే
8-23-27
సుమహత్కర్మ తద్విష్ణోర్గాయంతః పరమాద్భుతం .
ధిష్ణ్యాని స్వాని తే జగ్మురదితిం చ శశంసిరే
8-23-28
సర్వమేతన్మయాఽఽఖ్యాతం భవతః కులనందన .
ఉరుక్రమస్య చరితం శ్రోతౄణామఘమోచనం
8-23-29
పారం మహిమ్న ఉరువిక్రమతో గృణానో
యః పార్థివాని విమమే స రజాంసి మర్త్యః .
కిం జాయమాన ఉత జాత ఉపైతి మర్త్య
ఇత్యాహ మంత్రదృగృషిః పురుషస్య యస్య
8-23-30
య ఇదం దేవదేవస్య హరేరద్భుతకర్మణః .
అవతారానుచరితం శృణ్వన్ యాతి పరాం గతిం
8-23-31
క్రియమాణే కర్మణీదం దైవే పిత్ర్యేఽథ మానుషే .
యత్ర యత్రానుకీర్త్యేత తత్తేషాం సుకృతం విదుః
8-23-32
ఇతి శ్రీమద్భాగవతే మహాపురాణే పారమహంస్యాం సంహితాయా-
మష్టమస్కంధే వామనావతారచరితే త్రయోవింశోఽధ్యాయః