అష్టమస్కంధః : షష్ఠోఽధ్యాయః - 6
8-6-1
శ్రీశుక ఉవాచ
ఏవం స్తుతః సురగణైర్భగవాన్ హరిరీశ్వరః .
తేషామావిరభూద్రాజన్ సహస్రార్కోదయద్యుతిః
8-6-2
తేనైవ మహసా సర్వే దేవాః ప్రతిహతేక్షణాః .
నాపశ్యన్ ఖం దిశః క్షోణీమాత్మానం చ కుతో విభుం
8-6-3
విరించో భగవాన్ దృష్ట్వా సహ శర్వేణ తాం తనుం .
స్వచ్ఛాం మరకతశ్యామాం కంజగర్భారుణేక్షణాం
8-6-4
తప్తహేమావదాతేన లసత్కౌశేయవాససా .
ప్రసన్నచారుసర్వాంగీం సుముఖీం సుందరభ్రువం
8-6-5
మహామణికిరీటేన కేయూరాభ్యాం చ భూషితాం .
కర్ణాభరణనిర్భాతకపోలశ్రీముఖాంబుజాం
8-6-6
కాంచీకలాపవలయహారనూపురశోభితాం .
కౌస్తుభాభరణాం లక్ష్మీం బిభ్రతీం వనమాలినీం
8-6-7
సుదర్శనాదిభిః స్వాస్త్రైర్మూర్తిమద్భిరుపాసితాం .
తుష్టావ దేవప్రవరః సశర్వః పురుషం పరం .
సర్వామరగణైః సాకం సర్వాంగైరవనిం గతైః
8-6-8
బ్రహ్మోవాచ
అజాతజన్మస్థితిసంయమాయాగుణాయ
నిర్వాణసుఖార్ణవాయ .
అణోరణిమ్నేఽపరిగణ్యధామ్నే
మహానుభావాయ నమో నమస్తే
8-6-9
రూపం తవైతత్పురుషర్షభేజ్యం
శ్రేయోఽర్థిభిర్వైదికతాంత్రికేణ .
యోగేన ధాతః సహ నస్త్రిలోకాన్
పశ్యామ్యముష్మిన్ను హ విశ్వమూర్తౌ
8-6-10
త్వయ్యగ్ర ఆసీత్త్వయి మధ్య ఆసీత్త్వయ్యంత
ఆసీదిదమాత్మతంత్రే .
త్వమాదిరంతో జగతోఽస్య మధ్యం
ఘటస్య మృత్స్నేవ పరః పరస్మాత్
8-6-11
త్వం మాయయాఽఽత్మాశ్రయయా స్వయేదం
నిర్మాయ విశ్వం తదనుప్రవిష్టః .
పశ్యంతి యుక్తా మనసా మనీషిణో
గుణవ్యవాయేఽప్యగుణం విపశ్చితః
8-6-12
యథాగ్నిమేధస్యమృతం చ గోషు
భువ్యన్నమంబూద్యమనే చ వృత్తిం .
యోగైర్మనుష్యా అధియంతి హి త్వాం
గుణేషు బుద్ధ్యా కవయో వదంతి
8-6-13
తం త్వాం వయం నాథ సముజ్జిహానం
సరోజనాభాతిచిరేప్సితార్థం .
దృష్ట్వా గతా నిర్వృతమద్య సర్వే
గజా దవార్తా ఇవ గాంగమంభః
8-6-14
స త్వం విధత్స్వాఖిలలోకపాలా
వయం యదర్థాస్తవ పాదమూలం .
సమాగతాస్తే బహిరంతరాత్మన్
కిం వాన్యవిజ్ఞాప్యమశేషసాక్షిణః
8-6-15
అహం గిరిత్రశ్చ సురాదయో యే
దక్షాదయోఽగ్నేరివ కేతవస్తే .
కిం వా విదామేశ పృథగ్విభాతా
విధత్స్వ శం నో ద్విజదేవమంత్రం
8-6-16
శ్రీశుక ఉవాచ
ఏవం విరించాదిభిరీడితస్తద్విజ్ఞాయ
తేషాం హృదయం యథైవ .
జగాద జీమూతగభీరయా గిరా
బద్ధాంజలీన్ సంవృతసర్వకారకాన్
8-6-17
ఏక ఏవేశ్వరస్తస్మిన్ సురకార్యే సురేశ్వరః .
విహర్తుకామస్తానాహ సముద్రోన్మథనాదిభిః
8-6-18
శ్రీభగవానువాచ
హంత బ్రహ్మన్నహో శంభో హే దేవా మమ భాషితం .
శృణుతావహితాః సర్వే శ్రేయో వః స్యాద్యథా సురాః
8-6-19
యాత దానవదైతేయైస్తావత్సంధిర్విధీయతాం .
కాలేనానుగృహీతైస్తైర్యావద్వో భవ ఆత్మనః
8-6-20
అరయోఽపి హి సంధేయాః సతి కార్యార్థగౌరవే .
అహిమూషికవద్దేవా హ్యర్థస్య పదవీం గతైః
8-6-21
అమృతోత్పాదనే యత్నః క్రియతామవిలంబితం .
యస్య పీతస్య వై జంతుర్మృత్యుగ్రస్తోఽమరో భవేత్
8-6-22
క్షిప్త్వా క్షీరోదధౌ సర్వా వీరుత్తృణలతౌషధీః .
మంథానం మందరం కృత్వా నేత్రం కృత్వా తు వాసుకిం
8-6-23
సహాయేన మయా దేవా నిర్మంథధ్వమతంద్రితాః .
క్లేశభాజో భవిష్యంతి దైత్యా యూయం ఫలగ్రహాః
8-6-24
యూయం తదనుమోదధ్వం యదిచ్ఛంత్యసురాః సురాః .
న సంరంభేణ సిధ్యంతి సర్వేఽర్థాః సాంత్వయా యథా
8-6-25
న భేతవ్యం కాలకూటాద్విషాజ్జలధిసంభవాత్ .
లోభః కార్యో న వో జాతు రోషః కామస్తు వస్తుషు
8-6-26
శ్రీశుక ఉవాచ
ఇతి దేవాన్ సమాదిశ్య భగవాన్ పురుషోత్తమః .
తేషామంతర్దధే రాజన్ స్వచ్ఛందగతిరీశ్వరః
8-6-27
అథ తస్మై భగవతే నమస్కృత్య పితామహః .
భవశ్చ జగ్మతుః స్వం స్వం ధామోపేయుర్బలిం సురాః
8-6-28
దృష్ట్వారీనప్యసంయత్తాన్ జాతక్షోభాన్ స్వనాయకాన్ .
న్యషేధద్దైత్యరాట్ శ్లోక్యః సంధివిగ్రహకాలవిత్
8-6-29
తే వైరోచనిమాసీనం గుప్తం చాసురయూథపైః .
శ్రియా పరమయా జుష్టం జితాశేషముపాగమన్
8-6-30
మహేంద్రః శ్లక్ష్ణయా వాచా సాంత్వయిత్వా మహామతిః .
అభ్యభాషత తత్సర్వం శిక్షితం పురుషోత్తమాత్
8-6-31
తదరోచత దైత్యస్య తత్రాన్యే యేఽసురాధిపాః .
శంబరోఽరిష్టనేమిశ్చ యే చ త్రిపురవాసినః
8-6-32
తతో దేవాసురాః కృత్వా సంవిదం కృతసౌహృదాః .
ఉద్యమం పరమం చక్రురమృతార్థే పరంతప
8-6-33
తతస్తే మందరగిరిమోజసోత్పాట్య దుర్మదాః .
నదంత ఉదధిం నిన్యుః శక్తాః పరిఘబాహవః
8-6-34
దూరభారోద్వహశ్రాంతాః శక్రవైరోచనాదయః .
అపారయంతస్తం వోఢుం వివశా విజహుః పథి
8-6-35
నిపతన్ స గిరిస్తత్ర బహూనమరదానవాన్ .
చూర్ణయామాస మహతా భారేణ కనకాచలః
8-6-36
తాంస్తథా భగ్నమనసో భగ్నబాహూరుకంధరాన్ .
విజ్ఞాయ భగవాంస్తత్ర బభూవ గరుడధ్వజః
8-6-37
గిరిపాతవినిష్పిష్టాన్ విలోక్యామరదానవాన్ .
ఈక్షయా జీవయామాస నిర్జరాన్ నిర్వ్రణాన్ యథా
8-6-38
గిరిం చారోప్య గరుడే హస్తేనైకేన లీలయా .
ఆరుహ్య ప్రయయావబ్ధిం సురాసురగణైర్వృతః
8-6-39
అవరోప్య గిరిం స్కంధాత్సుపర్ణః పతతాం వరః .
యయౌ జలాంత ఉత్సృజ్య హరిణా స విసర్జితః
8-6-40
ఇతి శ్రీమద్భాగవతే మహాపురాణే పారమహంస్యాం సంహితాయాం
అష్టమస్కంధే అమృతమథనే మందరాచలానయనం నామ షష్ఠోఽధ్యాయః