అష్టమస్కంధః : సప్తదశోఽధ్యాయః - 17
8-17-1
శ్రీశుక ఉవాచ
ఇత్యుక్తా సాదితీ రాజన్ స్వభర్త్రా కశ్యపేన వై .
అన్వతిష్ఠద్వ్రతమిదం ద్వాదశాహమతంద్రితా
8-17-2
చింతయంత్యేకయా బుద్ధ్యా మహాపురుషమీశ్వరం .
ప్రగృహ్యేంద్రియదుష్టాశ్వాన్ మనసా బుద్ధిసారథిః
8-17-3
మనశ్చైకాగ్రయా బుద్ధ్యా భగవత్యఖిలాత్మని .
వాసుదేవే సమాధాయ చచార హ పయోవ్రతం
8-17-4
తస్యాః ప్రాదురభూత్తాత భగవానాదిపురుషః .
పీతవాసాశ్చతుర్బాహుః శంఖచక్రగదాధరః
8-17-5
తం నేత్రగోచరం వీక్ష్య సహసోత్థాయ సాదరం .
ననామ భువి కాయేన దండవత్ప్రీతివిహ్వలా
8-17-6
సోత్థాయ బద్ధాంజలిరీడితుం స్థితా
నోత్సేహ ఆనందజలాకులేక్షణా .
బభూవ తూష్ణీం పులకాకులాకృతి-
స్తద్దర్శనాత్యుత్సవగాత్రవేపథుః
8-17-7
ప్రీత్యా శనైర్గద్గదయా గిరా హరిం
తుష్టావ సా దేవ్యదితిః కురూద్వహ .
ఉద్వీక్షతీ సా పిబతీవ చక్షుషా
రమాపతిం యజ్ఞపతిం జగత్పతిం
8-17-8
అదితిరువాచ
యజ్ఞేశ యజ్ఞపురుషాచ్యుత తీర్థపాద
తీర్థశ్రవః శ్రవణమంగలనామధేయ .
ఆపన్నలోకవృజినోపశమోదయాద్య
శం నః కృధీశ భగవన్నసి దీననాథః
8-17-9
విశ్వాయ విశ్వభవనస్థితిసంయమాయ
స్వైరం గృహీతపురుశక్తిగుణాయ భూమ్నే .
స్వస్థాయ శశ్వదుపబృంహితపూర్ణబోధ-
వ్యాపాదితాత్మతమసే హరయే నమస్తే
8-17-10
ఆయుః పరం వపురభీష్టమతుల్యలక్ష్మీ-
ర్ద్యోర్భూరసాః సకలయోగగుణాస్త్రివర్గః .
జ్ఞానం చ కేవలమనంత భవంతి తుష్టాత్త్వత్తో
నృణాం కిము సపత్నజయాదిరాశీః
8-17-11
శ్రీశుక ఉవాచ
అదిత్యైవం స్తుతో రాజన్ భగవాన్ పుష్కరేక్షణః .
క్షేత్రజ్ఞః సర్వభూతానామితి హోవాచ భారత
8-17-12
శ్రీభగవానువాచ
దేవమాతర్భవత్యా మే విజ్ఞాతం చిరకాంక్షితం .
యత్సపత్నైర్హృతశ్రీణాం చ్యావితానాం స్వధామతః
8-17-13
తాన్ వినిర్జిత్య సమరే దుర్మదానసురర్షభాన్ .
ప్రతిలబ్ధజయశ్రీభిః పుత్రైరిచ్ఛస్యుపాసితుం
8-17-14
ఇంద్రజ్యేష్ఠైః స్వతనయైర్హతానాం యుధి విద్విషాం .
స్త్రియో రుదంతీరాసాద్య ద్రష్టుమిచ్ఛసి దుఃఖితాః
8-17-15
ఆత్మజాన్ సుసమృద్ధాంస్త్వం ప్రత్యాహృతయశఃశ్రియః .
నాకపృష్ఠమధిష్ఠాయ క్రీడతో ద్రష్టుమిచ్ఛసి
8-17-16
ప్రాయోఽధునా తేఽసురయూథనాథా
అపారణీయా ఇతి దేవి మే మతిః .
యత్తేఽనుకూలేశ్వరవిప్రగుప్తా
న విక్రమస్తత్ర సుఖం దదాతి
8-17-17
అథాప్యుపాయో మమ దేవి చింత్యః
సంతోషితస్య వ్రతచర్యయా తే .
మమార్చనం నార్హతి గంతుమన్యథా
శ్రద్ధానురూపం ఫలహేతుకత్వాత్
8-17-18
త్వయార్చితశ్చాహమపత్యగుప్తయే
పయోవ్రతేనానుగుణం సమీడితః .
స్వాంశేన పుత్రత్వముపేత్య తే సుతాన్
గోప్తాస్మి మారీచతపస్యధిష్ఠితః
8-17-19
ఉపధావ పతిం భద్రే ప్రజాపతిమకల్మషం .
మాం చ భావయతీ పత్యావేవం రూపమవస్థితం
8-17-20
నైతత్పరస్మా ఆఖ్యేయం పృష్టయాపి కథంచన .
సర్వం సంపద్యతే దేవి దేవగుహ్యం సుసంవృతం
8-17-21
శ్రీశుక ఉవాచ
ఏతావదుక్త్వా భగవాంస్తత్రైవాంతరధీయత .
అదితిర్దుర్లభం లబ్ధ్వా హరేర్జన్మాత్మని ప్రభోః
8-17-22
ఉపాధావత్పతిం భక్త్యా పరయా కృతకృత్యవత్ .
స వై సమాధియోగేన కశ్యపస్తదబుధ్యత
8-17-23
ప్రవిష్టమాత్మని హరేరంశం హ్యవితథేక్షణః .
సోఽదిత్యాం వీర్యమాధత్త తపసా చిరసంభృతం .
సమాహితమనా రాజన్ దారుణ్యగ్నిం యథానిలః
8-17-24
అదితేర్ధిష్ఠితం గర్భం భగవంతం సనాతనం .
హిరణ్యగర్భో విజ్ఞాయ సమీడే గుహ్యనామభిః
8-17-25
బ్రహ్మోవాచ
జయోరుగాయ భగవన్నురుక్రమ నమోస్తు తే .
నమో బ్రహ్మణ్యదేవాయ త్రిగుణాయ నమో నమః
8-17-26
నమస్తే పృశ్నిగర్భాయ వేదగర్భాయ వేధసే .
త్రినాభాయ త్రిపృష్ఠాయ శిపివిష్టాయ విష్ణవే
8-17-27
త్వమాదిరంతో భువనస్య మధ్య-
మనంతశక్తిం పురుషం యమాహుః .
కాలో భవానాక్షిపతీశ విశ్వం
స్రోతో యథాంతః పతితం గభీరం
8-17-28
త్వం వై ప్రజానాం స్థిరజంగమానాం
ప్రజాపతీనామసి సంభవిష్ణుః .
దివౌకసాం దేవ దివశ్చ్యుతానాం
పరాయణం నౌరివ మజ్జతోఽప్సు
8-17-29
ఇతి శ్రీమద్భాగవతే మహాపురాణే పారమహంస్యాం సమ్హితాయా-
మష్టమస్కంధే వామనప్రాదుర్భావే సప్తదశోఽధ్యాయః