అష్టమస్కంధః : పంచదశోఽద్ధ్యయాః - 15
8-15-1
రాజోవాచ
బలేః పదత్రయం భూమేః కస్మాద్ధరిరయాచత .
భూత్వేశ్వరః కృపణవల్లబ్ధార్థోఽపి బబంధ తం
8-15-2
ఏతద్వేదితుమిచ్ఛామో మహత్కౌతూహలం హి నః .
యజ్ఞేశ్వరస్య పూర్ణస్య బంధనం చాప్యనాగసః
8-15-3
శ్రీశుక ఉవాచ
పరాజితశ్రీరసుభిశ్చ హాపితో
హీంద్రేణ రాజన్ భృగుభిః స జీవితః .
సర్వాత్మనా తానభజద్భృగూన్ బలిః
శిష్యో మహాత్మార్థనివేదనేన
8-15-4
తం బ్రాహ్మణా భృగవః ప్రీయమాణా
అయాజయన్ విశ్వజితా త్రిణాకం .
జిగీషమాణం విధినాభిషిచ్య
మహాభిషేకేణ మహానుభావాః
8-15-5
తతో రథః కాంచనపట్టనద్ధో
హయాశ్చ హర్యశ్వతురంగవర్ణాః .
ధ్వజశ్చ సింహేన విరాజమానో
హుతాశనాదాస హవిర్భిరిష్టాత్
8-15-6
ధనుశ్చ దివ్యం పురటోపనద్ధం
తూణావరిక్తౌ కవచం చ దివ్యం .
పితామహస్తస్య దదౌ చ మాలా-
మమ్లానపుష్పాం జలజం చ శుక్రః
8-15-7
ఏవం స విప్రార్జితయోధనార్థస్తైః
కల్పితస్వస్త్యయనోఽథ విప్రాన్ .
ప్రదక్షిణీకృత్య కృతప్రణామః
ప్రహ్లాదమామంత్ర్య నమశ్చకార
8-15-8
అథారుహ్య రథం దివ్యం భృగుదత్తం మహారథః .
సుస్రగ్ధరోఽథ సన్నహ్య ధన్వీ ఖడ్గీ ధృతేషుధిః
8-15-9
హేమాంగదలసద్బాహుః స్ఫురన్మకరకుండలః .
రరాజ రథమారూఢో ధిష్ణ్యస్థ ఇవ హవ్యవాట్
8-15-10
తుల్యైశ్వర్యబలశ్రీభిః స్వయూథైర్దైత్యయూథపైః .
పిబద్భిరివ ఖం దృగ్భిర్దహద్భిః పరిధీనివ
8-15-11
వృతో వికర్షన్ మహతీమాసురీం ధ్వజినీం విభుః .
యయావింద్రపురీం స్వృద్ధాం కంపయన్నివ రోదసీ
8-15-12
రమ్యాముపవనోద్యానైః శ్రీమద్భిర్నందనాదిభిః .
కూజద్విహంగమిథునైర్గాయన్మత్తమధువ్రతైః
8-15-13
ప్రవాలఫలపుష్పోరుభారశాఖామరద్రుమైః .
హంససారసచక్రాహ్వకారండవకులాకులాః .
నలిన్యో యత్ర క్రీడంతి ప్రమదాః సురసేవితాః
8-15-14
ఆకాశగంగయా దేవ్యా వృతాం పరిఖభూతయా .
ప్రాకారేణాగ్నివర్ణేన సాట్టాలేనోన్నతేన చ
8-15-15
రుక్మపట్టకపాటైశ్చ ద్వారైః స్ఫటికగోపురైః .
జుష్టాం విభక్తప్రపథాం విశ్వకర్మవినిర్మితాం
8-15-16
సభాచత్వరరథ్యాఢ్యాం విమానైర్న్యర్బుదైర్వృతాం .
శృంగాటకైర్మణిమయైర్వజ్రవిద్రుమవేదిభిః
8-15-17
యత్ర నిత్యవయోరూపాః శ్యామా విరజవాససః .
భ్రాజంతే రూపవన్నార్యో హ్యర్చిర్భిరివ వహ్నయః
8-15-18
సురస్త్రీకేశవిభ్రష్టనవసౌగంధికస్రజాం .
యత్రామోదముపాదాయ మార్గ ఆవాతి మారుతః
8-15-19
హేమజాలాక్షనిర్గచ్ఛద్ధూమేనాగురుగంధినా .
పాండురేణ ప్రతిచ్ఛన్నమార్గే యాంతి సురప్రియాః
8-15-20
ముక్తావితానైర్మణిహేమకేతుభి-
ర్నానాపతాకావలభీభిరావృతాం .
శిఖండిపారావతభృంగనాదితాం
వైమానికస్త్రీకలగీతమంగలాం
8-15-21
మృదంగశంఖానకదుందుభిస్వనైః
సతాలవీణామురజర్ష్టివేణుభిః .
నృత్యైః సవాద్యైరుపదేవగీతకై-
ర్మనోరమాం స్వప్రభయా జితప్రభాం
8-15-22
యాం న వ్రజంత్యధర్మిష్ఠాః ఖలా భూతద్రుహః శఠాః .
మానినః కామినో లుబ్ధా ఏభిర్హీనా వ్రజంతి యత్
8-15-23
తాం దేవధానీం స వరూథినీపతిర్బహిః
సమంతాద్రురుధే పృతన్యయా .
ఆచార్యదత్తం జలజం మహాస్వనం
దధ్మౌ ప్రయుంజన్ భయమింద్రయోషితాం
8-15-24
మఘవాంస్తమభిప్రేత్య బలేః పరమముద్యమం .
సర్వదేవగణోపేతో గురుమేతదువాచ హ
8-15-25
భగవన్నుద్యమో భూయాన్ బలేర్నః పూర్వవైరిణః .
అవిషహ్యమిమం మన్యే కేనాసీత్తేజసోర్జితః
8-15-26
నైనం కశ్చిత్కుతో వాపి ప్రతివ్యోఢుమధీశ్వరః .
పిబన్నివ ముఖేనేదం లిహన్నివ దిశో దశ .
దహన్నివ దిశో దృగ్భిః సంవర్తాగ్నిరివోత్థితః
8-15-27
బ్రూహి కారణమేతస్య దుర్ధర్షత్వస్య మద్రిపోః .
ఓజః సహో బలం తేజో యత ఏతత్సముద్యమః
8-15-28
గురురువాచ
జానామి మఘవన్ శత్రోరున్నతేరస్య కారణం .
శిష్యాయోపభృతం తేజో భృగుభిర్బ్రహ్మవాదిభిః
8-15-29
(ఓజస్వినం బలిం జేతుం న సమర్థోఽస్తి కశ్చన .
విజేష్యతి న కోఽప్యేనం బ్రహ్మతేజఃసమేధితం .)
భవద్విధో భవాన్ వాపి వర్జయిత్వేశ్వరం హరిం
నాస్య శక్తః పురః స్థాతుం కృతాంతస్య యథా జనాః
8-15-30
తస్మాన్నిలయముత్సృజ్య యూయం సర్వే త్రివిష్టపం .
యాత కాలం ప్రతీక్షంతో యతః శత్రోర్విపర్యయః
8-15-31
ఏష విప్రబలోదర్కః సంప్రత్యూర్జితవిక్రమః .
తేషామేవాపమానేన సానుబంధో వినంక్ష్యతి
8-15-32
ఏవం సుమంత్రితార్థాస్తే గురుణార్థానుదర్శినా .
హిత్వా త్రివిష్టపం జగ్ముర్గీర్వాణాః కామరూపిణః
8-15-33
దేవేష్వథ నిలీనేషు బలిర్వైరోచనః పురీం .
దేవధానీమధిష్ఠాయ వశం నిన్యే జగత్త్రయం
8-15-34
తం విశ్వజయినం శిష్యం భృగవః శిష్యవత్సలాః .
శతేన హయమేధానామనువ్రతమయాజయన్
8-15-35
తతస్తదనుభావేన భువనత్రయవిశ్రుతాం .
కీర్తిం దిక్షు వితన్వానః స రేజ ఉడురాడివ
8-15-36
బుభుజే చ శ్రియం స్వృద్ధాం ద్విజదేవోపలంభితాం .
కృతకృత్యమివాత్మానం మన్యమానో మహామనాః
8-15-37
ఇతి శ్రీమద్భాగవతే మహాపురాణే పారమహంస్యాం సంహితాయా-
మష్టమస్కంధే పంచదశోఽధ్యాయః