అష్టమస్కంధః : నవమోఽధ్యాయః - 9
8-9-1
శ్రీశుక ఉవాచ
తేఽన్యోన్యతోఽసురాః పాత్రం హరంతస్త్యక్తసౌహృదాః .
క్షిపంతో దస్యుధర్మాణ ఆయాంతీం దదృశుః స్త్రియం
8-9-2
అహో రూపమహో ధామ అహో అస్యా నవం వయః .
ఇతి తే తామభిద్రుత్య పప్రచ్ఛుర్జాతహృచ్ఛయాః
8-9-3
కా త్వం కంజపలాశాక్షి కుతో వా కిం చికీర్షసి .
కస్యాసి వద వామోరు మథ్నంతీవ మనాంసి నః
8-9-4
న వయం త్వామరైర్దైత్యైః సిద్ధగంధర్వచారణైః .
నాస్పృష్టపూర్వాం జానీమో లోకేశైశ్చ కుతో నృభిః
8-9-5
నూనం త్వం విధినా సుభ్రూః ప్రేషితాసి శరీరిణాం .
సర్వేంద్రియమనఃప్రీతిం విధాతుం సఘృణేన కిం
8-9-6
సా త్వం నః స్పర్ధమానానామేకవస్తుని మానిని .
జ్ఞాతీనాం బద్ధవైరాణాం శం విధత్స్వ సుమధ్యమే
8-9-7
వయం కశ్యపదాయాదా భ్రాతరః కృతపౌరుషాః .
విభజస్వ యథాన్యాయం నైవ భేదో యథా భవేత్
8-9-8
ఇత్యుపామంత్రితో దైత్యైర్మాయాయోషిద్వపుర్హరిః .
ప్రహస్య రుచిరాపాంగైర్నిరీక్షన్నిదమబ్రవీత్
8-9-9
శ్రీభగవానువాచ
కథం కశ్యపదాయాదాః పుంశ్చల్యాం మయి సంగతాః .
విశ్వాసం పండితో జాతు కామినీషు న యాతి హి
8-9-10
సాలావృకాణాం స్త్రీణాం చ స్వైరిణీనాం సురద్విషః .
సఖ్యాన్యాహురనిత్యాని నూత్నం నూత్నం విచిన్వతాం
8-9-11
శ్రీశుక ఉవాచ
ఇతి తే క్ష్వేలితైస్తస్యా ఆశ్వస్తమనసోఽసురాః .
జహసుర్భావగంభీరం దదుశ్చామృతభాజనం
8-9-12
తతో గృహీత్వామృతభాజనం హరిర్బభాష
ఈషత్స్మితశోభయా గిరా .
యద్యభ్యుపేతం క్వ చ సాధ్వసాధు వా
కృతం మయా వో విభజే సుధామిమాం
8-9-13
ఇత్యభివ్యాహృతం తస్యా ఆకర్ణ్యాసురపుంగవాః .
అప్రమాణవిదస్తస్యాస్తత్తథేత్యన్వమంసత
8-9-14
అథోపోష్య కృతస్నానా హుత్వా చ హవిషానలం .
దత్త్వా గోవిప్రభూతేభ్యః కృతస్వస్త్యయనా ద్విజైః
8-9-15
యథోపజోషం వాసాంసి పరిధాయాహతాని తే .
కుశేషు ప్రావిశన్ సర్వే ప్రాగగ్రేష్వభిభూషితాః
8-9-16
ప్రాఙ్ముఖేషూపవిష్టేషు సురేషు దితిజేషు చ .
ధూపామోదితశాలాయాం జుష్టాయాం మాల్యదీపకైః
8-9-17
తస్యాం నరేంద్ర కరభోరురుశద్దుకూల-
శ్రోణీతటాలసగతిర్మదవిహ్వలాక్షీ .
సా కూజతీ కనకనూపురశింజితేన
కుంభస్తనీ కలశపాణిరథావివేశ
8-9-18
తాం శ్రీసఖీం కనకకుండలచారుకర్ణ-
నాసాకపోలవదనాం పరదేవతాఖ్యాం .
సంవీక్ష్య సమ్ముముహురుత్స్మితవీక్షణేన
దేవాసురా విగలితస్తనపట్టికాంతాం
8-9-19
అసురాణాం సుధాదానం సర్పాణామివ దుర్నయం .
మత్వా జాతినృశంసానాం న తాం వ్యభజదచ్యుతః
8-9-20
కల్పయిత్వా పృథక్ పంక్తీరుభయేషాం జగత్పతిః .
తాంశ్చోపవేశయామాస స్వేషు స్వేషు చ పంక్తిషు
8-9-21
దైత్యాన్ గృహీతకలశో వంచయన్నుపసంచరైః .
దూరస్థాన్ పాయయామాస జరామృత్యుహరాం సుధాం
8-9-22
తే పాలయంతః సమయమసురాః స్వకృతం నృప .
తూష్ణీమాసన్ కృతస్నేహాః స్త్రీవివాదజుగుప్సయా
8-9-23
తస్యాం కృతాతిప్రణయాః ప్రణయాపాయకాతరాః .
బహుమానేన చాబద్ధా నోచుః కించన విప్రియం
8-9-24
దేవలింగప్రతిచ్ఛన్నః స్వర్భానుర్దేవసంసది .
ప్రవిష్టః సోమమపిబచ్చంద్రార్కాభ్యాం చ సూచితః
8-9-25
చక్రేణ క్షురధారేణ జహార పిబతః శిరః .
హరిస్తస్య కబంధస్తు సుధయాఽఽప్లావితోఽపతత్
8-9-26
శిరస్త్వమరతాం నీతమజో గ్రహమచీకౢపత్ .
యస్తు పర్వణి చంద్రార్కావభిధావతి వైరధీః
8-9-27
పీతప్రాయేఽమృతే దేవైర్భగవాన్ లోకభావనః .
పశ్యతామసురేంద్రాణాం స్వం రూపం జగృహే హరిః
8-9-28
ఏవం సురాసురగణాః సమదేశకాల-
హేత్వర్థకర్మమతయోఽపి ఫలే వికల్పాః .
తత్రామృతం సురగణాః ఫలమంజసాఽఽపు-
ర్యత్పాదపంకజరజఃశ్రయణాన్న దైత్యాః
8-9-29
యద్యుజ్యతేఽసువసుకర్మమనోవచోభి-
ర్దేహాత్మజాదిషు నృభిస్తదసత్పృథక్త్వాత్ .
తైరేవ సద్భవతి యత్క్రియతేఽపృథక్త్వాత్సర్వస్య
తద్భవతి మూలనిషేచనం యత్
8-9-30
ఇతి శ్రీమద్భాగవతే మహాపురాణే పారమహంస్యాం సంహితాయాం
అష్టమస్కంధే అమృతమథనే నవమోఽధ్యాయః