పోతన తెలుగు భాగవతము

పోతన తెలుగు భాగవతము

అష్టమస్కంధః : ఏకవింశోఽధ్యాయః - 21

8-21-1
శ్రీశుక ఉవాచ
సత్యం సమీక్ష్యాబ్జభవో నఖేందుభి-
ర్హతస్వధామద్యుతిరావృతోఽభ్యగాత్ .
మరీచిమిశ్రా ఋషయో బృహద్వ్రతాః
సనందనాద్యా నరదేవ యోగినః

8-21-2
వేదోపవేదా నియమాన్వితా
యమాస్తర్కేతిహాసాంగపురాణసంహితాః .
యే చాపరే యోగసమీరదీపిత-
జ్ఞానాగ్నినా రంధితకర్మకల్మషాః .
వవందిరే యత్స్మరణానుభావతః
స్వాయంభువం ధామ గతా అకర్మకం

8-21-3
అథాంఘ్రయే ప్రోన్నమితాయ విష్ణో-
రుపాహరత్పద్మభవోఽర్హణోదకం .
సమర్చ్య భక్త్యాభ్యగృణాచ్ఛుచిశ్రవా
యన్నాభిపంకేరుహసంభవః స్వయం

8-21-4
ధాతుః కమండలుజలం తదురుక్రమస్య
పాదావనేజనపవిత్రతయా నరేంద్ర .
స్వర్ధున్యభూన్నభసి సా పతతీ నిమార్ష్టి
లోకత్రయం భగవతో విశదేవ కీర్తిః

8-21-5
బ్రహ్మాదయో లోకనాథాః స్వనాథాయ సమాదృతాః .
సానుగా బలిమాజహ్రుః సంక్షిప్తాత్మవిభూతయే

8-21-6
తోయైః సమర్హణైః స్రగ్భిర్దివ్యగంధానులేపనైః .
ధూపైర్దీపైః సురభిభిర్లాజాక్షతఫలాంకురైః

8-21-7
స్తవనైర్జయశబ్దైశ్చ తద్వీర్యమహిమాంకితైః .
నృత్యవాదిత్రగీతైశ్చ శంఖదుందుభినిఃస్వనైః

8-21-8
జాంబవాన్ ఋక్షరాజస్తు భేరీశబ్దైర్మనోజవః .
విజయం దిక్షు సర్వాసు మహోత్సవమఘోషయత్

8-21-9
మహీం సర్వాం హృతాం దృష్ట్వా త్రిపదవ్యాజయాచ్ఞయా .
ఊచుః స్వభర్తురసురా దీక్షితస్యాత్యమర్షితాః

8-21-10
న వా అయం బ్రహ్మబంధుర్విష్ణుర్మాయావినాం వరః .
ద్విజరూపప్రతిచ్ఛన్నో దేవకార్యం చికీర్షతి

8-21-11
అనేన యాచమానేన శత్రుణా వటురూపిణా .
సర్వస్వం నో హృతం భర్తుర్న్యస్తదండస్య బర్హిషి

8-21-12
సత్యవ్రతస్య సతతం దీక్షితస్య విశేషతః .
నానృతం భాషితుం శక్యం బ్రహ్మణ్యస్య దయావతః

8-21-13
తస్మాదస్య వధో ధర్మో భర్తుః శుశ్రూషణం చ నః .
ఇత్యాయుధాని జగృహుర్బలేరనుచరాసురాః

8-21-14
తే సర్వే వామనం హంతుం శూలపట్టిశపాణయః .
అనిచ్ఛతో బలే రాజన్ ప్రాద్రవన్ జాతమన్యవః

8-21-15
తానభిద్రవతో దృష్ట్వా దితిజానీకపాన్ నృప .
ప్రహస్యానుచరా విష్ణోః ప్రత్యషేధన్నుదాయుధాః

8-21-16
నందః సునందోఽథ జయో విజయః ప్రబలో బలః .
కుముదః కుముదాక్షశ్చ విష్వక్సేనః పతత్త్రిరాట్

8-21-17
జయంతః శ్రుతదేవశ్చ పుష్పదంతోఽథ సాత్వతః .
సర్వే నాగాయుతప్రాణాశ్చమూం తే జఘ్నురాసురీం

8-21-18
హన్యమానాన్ స్వకాన్ దృష్ట్వా పురుషానుచరైర్బలిః .
వారయామాస సంరబ్ధాన్ కావ్యశాపమనుస్మరన్

8-21-19
హే విప్రచిత్తే హే రాహో హే నేమే శ్రూయతాం వచః .
మా యుధ్యత నివర్తధ్వం న నః కాలోఽయమర్థకృత్

8-21-20
యః ప్రభుః సర్వభూతానాం సుఖదుఃఖోపపత్తయే .
తం నాతివర్తితుం దైత్యాః పౌరుషైరీశ్వరః పుమాన్

8-21-21
యో నో భవాయ ప్రాగాసీదభవాయ దివౌకసాం .
స ఏవ భగవానద్య వర్తతే తద్విపర్యయం

8-21-22
బలేన సచివైర్బుద్ధ్యా దుర్గైర్మంత్రౌషధాదిభిః .
సామాదిభిరుపాయైశ్చ కాలం నాత్యేతి వై జనః

8-21-23
భవద్భిర్నిర్జితా హ్యేతే బహుశోఽనుచరా హరేః .
దైవేనర్ద్ధైస్త ఏవాద్య యుధి జిత్వా నదంతి నః

8-21-24
ఏతాన్ వయం విజేష్యామో యది దైవం ప్రసీదతి .
తస్మాత్కాలం ప్రతీక్షధ్వం యో నోఽర్థత్వాయ కల్పతే

8-21-25
శ్రీశుక ఉవాచ
పత్యుర్నిగదితం శ్రుత్వా దైత్యదానవయూథపాః .
రసాం నిర్వివిశూ రాజన్ విష్ణుపార్షదతాడితాః

8-21-26
అథ తార్క్ష్యసుతో జ్ఞాత్వా విరాట్ ప్రభుచికీర్షితం .
బబంధ వారుణైః పాశైర్బలిం సౌత్యేఽహని క్రతౌ

8-21-27
హాహాకారో మహానాసీద్రోదస్యోః సర్వతోదిశం .
నిగృహ్యమాణేఽసురపతౌ విష్ణునా ప్రభవిష్ణునా

8-21-28
తం బద్ధం వారుణైః పాశైర్భగవానాహ వామనః .
నష్టశ్రియం స్థిరప్రజ్ఞముదారయశసం నృప

8-21-29
పదాని త్రీణి దత్తాని భూమేర్మహ్యం త్వయాసుర .
ద్వాభ్యాం క్రాంతా మహీ సర్వా తృతీయముపకల్పయ

8-21-30
యావత్తపత్యసౌ గోభిర్యావదిందుః సహోడుభిః .
యావద్వర్షతి పర్జన్యస్తావతీ భూరియం తవ

8-21-31
పదైకేన మయాక్రాంతో భూర్లోకః ఖం దిశస్తనోః .
స్వర్లోకస్తు ద్వితీయేన పశ్యతస్తే స్వమాత్మనా

8-21-32
ప్రతిశ్రుతమదాతుస్తే నిరయే వాస ఇష్యతే .
విశ త్వం నిరయం తస్మాద్గురుణా చానుమోదితః

8-21-33
వృథా మనోరథస్తస్య దూరే స్వర్గః పతత్యధః .
ప్రతిశ్రుతస్యాదానేన యోఽర్థినం విప్రలంభతే

8-21-34
విప్రలబ్ధో దదామీతి త్వయాహం చాఢ్యమానినా .
తద్వ్యలీకఫలం భుంక్ష్వ నిరయం కతిచిత్సమాః

8-21-35
ఇతి శ్రీమద్భాగవతే మహాపురాణే పారమహంస్యాం సంహితాయా-
మష్టమస్కంధే వామనప్రాదుర్భావే బలినిగ్రహో
నామైకవింశోఽధ్యాయః