అష్టమస్కంధః : ఏకాదశోఽధ్యాయః - 11
8-11-1
శ్రీశుక ఉవాచ
అథో సురాః ప్రత్యుపలబ్ధచేతసః
పరస్య పుంసః పరయానుకంపయా .
జఘ్నుర్భృశం శక్రసమీరణాదయ-
స్తాంస్తాన్ రణే యైరభిసంహతాః పురా
8-11-2
వైరోచనాయ సంరబ్ధో భగవాన్ పాకశాసనః .
ఉదయచ్ఛద్యదా వజ్రం ప్రజా హా హేతి చుక్రుశుః
8-11-3
వజ్రపాణిస్తమాహేదం తిరస్కృత్య పురఃస్థితం .
మనస్వినం సుసంపన్నం విచరంతం మహామృధే
8-11-4
నటవన్మూఢ మాయాభిర్మాయేశాన్ నో జిగీషసి .
జిత్వా బాలాన్ నిబద్ధాక్షాన్ నటో హరతి తద్ధనం
8-11-5
ఆరురుక్షంతి మాయాభిరుత్సిసృప్సంతి యే దివం .
తాన్ దస్యూన్ విధునోమ్యజ్ఞాన్ పూర్వస్మాచ్చ పదాదధః
8-11-6
సోఽహం దుర్మాయినస్తేఽద్య వజ్రేణ శతపర్వణా .
శిరో హరిష్యే మందాత్మన్ఘటస్వ జ్ఞాతిభిః సహ
8-11-7
బలిరువాచ
సంగ్రామే వర్తమానానాం కాలచోదితకర్మణాం .
కీర్తిర్జయోఽజయో మృత్యుః సర్వేషాం స్యురనుక్రమాత్
8-11-8
తదిదం కాలరశనం జనాః పశ్యంతి సూరయః .
న హృష్యంతి న శోచంతి తత్ర యూయమపండితాః
8-11-9
న వయం మన్యమానానామాత్మానం తత్ర సాధనం .
గిరో వః సాధుశోచ్యానాం గృహ్ణీమో మర్మతాడనాః
8-11-10
శ్రీశుక ఉవాచ
ఇత్యాక్షిప్య విభుం వీరో నారాచైర్వీరమర్దనః .
ఆకర్ణపూర్ణైరహనదాక్షేపైరాహతం పునః
8-11-11
ఏవం నిరాకృతో దేవో వైరిణా తథ్యవాదినా .
నామృష్యత్తదధిక్షేపం తోత్రాహత ఇవ ద్విపః
8-11-12
ప్రాహరత్కులిశం తస్మా అమోఘం పరమర్దనః .
సయానో న్యపతద్భూమౌ ఛిన్నపక్ష ఇవాచలః
8-11-13
సఖాయం పతితం దృష్ట్వా జంభో బలిసఖః సుహృత్ .
అభ్యయాత్సౌహృదం సఖ్యుర్హతస్యాపి సమాచరన్
8-11-14
స సింహవాహ ఆసాద్య గదాముద్యమ్య రంహసా .
జత్రావతాడయచ్ఛక్రం గజం చ సుమహాబలః
8-11-15
గదాప్రహారవ్యథితో భృశం విహ్వలితో గజః .
జానుభ్యాం ధరణీం స్పృష్ట్వా కశ్మలం పరమం యయౌ
8-11-16
తతో రథో మాతలినా హరిభిర్దశశతైర్వృతః .
ఆనీతో ద్విపముత్సృజ్య రథమారురుహే విభుః
8-11-17
తస్య తత్పూజయన్ కర్మ యంతుర్దానవసత్తమః .
శూలేన జ్వలతా తం తు స్మయమానోఽహనన్మృధే
8-11-18
సేహే రుజం సుదుర్మర్షాం సత్త్వమాలంబ్య మాతలిః .
ఇంద్రో జంభస్య సంక్రుద్ధో వజ్రేణాపాహరచ్ఛిరః
8-11-19
జంభం శ్రుత్వా హతం తస్య జ్ఞాతయో నారదాదృషేః .
నముచిశ్చ బలః పాకస్తత్రాపేతుస్త్వరాన్వితాః
8-11-20
వచోభిః పరుషైరింద్రమర్దయంతోఽస్య మర్మసు .
శరైరవాకిరన్ మేఘా ధారాభిరివ పర్వతం
8-11-21
హరీన్ దశశతాన్యాజౌ హర్యశ్వస్య బలః శరైః .
తావద్భిరర్దయామాస యుగపల్లఘుహస్తవాన్
8-11-22
శతాభ్యాం మాతలిం పాకో రథం సావయవం పృథక్ .
సకృత్సంధానమోక్షేణ తదద్భుతమభూద్రణే
8-11-23
నముచిః పంచదశభిః స్వర్ణపుంఖైర్మహేషుభిః .
ఆహత్య వ్యనదత్సంఖ్యే సతోయ ఇవ తోయదః
8-11-24
సర్వతః శరకూటేన శక్రం సరథసారథిం .
ఛాదయామాసురసురాః ప్రావృట్సూర్యమివాంబుదాః
8-11-25
అలక్షయంతస్తమతీవ విహ్వలా
విచుక్రుశుర్దేవగణాః సహానుగాః .
అనాయకాః శత్రుబలేన నిర్జితా
వణిక్పథా భిన్ననవో యథార్ణవే
8-11-26
తతస్తురాషాడిషుబద్ధపంజరా-
ద్వినిర్గతః సాశ్వరథధ్వజాగ్రణీః .
బభౌ దిశః ఖం పృథివీం చ రోచయన్
స్వతేజసా సూర్య ఇవ క్షపాత్యయే
8-11-27
నిరీక్ష్య పృతనాం దేవః పరైరభ్యర్దితాం రణే .
ఉదయచ్ఛద్రిపుం హంతుం వజ్రం వజ్రధరో రుషా
8-11-28
స తేనైవాష్టధారేణ శిరసీ బలపాకయోః .
జ్ఞాతీనాం పశ్యతాం రాజన్ జహార జనయన్ భయం
8-11-29
నముచిస్తద్వధం దృష్ట్వా శోకామర్షరుషాన్వితః .
జిఘాంసురింద్రం నృపతే చకార పరమోద్యమం
8-11-30
అశ్మసారమయం శూలం ఘంటావద్ధేమభూషణం .
ప్రగృహ్యాభ్యద్రవత్క్రుద్ధో హతోఽసీతి వితర్జయన్ .
ప్రాహిణోద్దేవరాజాయ నినదన్ మృగరాడివ
8-11-31
తదాపతద్గగనతలే మహాజవం
విచిచ్ఛిదే హరిరిషుభిః సహస్రధా .
తమాహనన్నృప కులిశేన కంధరే
రుషాన్వితస్త్రిదశపతిః శిరో హరన్
8-11-32
న తస్య హి త్వచమపి వజ్ర ఊర్జితో
బిభేద యః సురపతినౌజసేరితః .
తదద్భుతం పరమతివీర్యవృత్రభి-
త్తిరస్కృతో నముచిశిరోధరత్వచా
8-11-33
తస్మాదింద్రోఽబిభేచ్ఛత్రోర్వజ్రః ప్రతిహతో యతః .
కిమిదం దైవయోగేన భూతం లోకవిమోహనం
8-11-34
యేన మే పూర్వమద్రీణాం పక్షచ్ఛేదః ప్రజాత్యయే .
కృతో నివిశతాం భారైః పతత్త్రైః పతతాం భువి
8-11-35
తపఃసారమయం త్వాష్ట్రం వృత్రో యేన విపాటితః .
అన్యే చాపి బలోపేతాః సర్వాస్త్రైరక్షతత్వచః
8-11-36
సోఽయం ప్రతిహతో వజ్రో మయా ముక్తోఽసురేఽల్పకే .
నాహం తదాదదే దండం బ్రహ్మతేజోఽప్యకారణం
8-11-37
ఇతి శక్రం విషీదంతమాహ వాగశరీరిణీ .
నాయం శుష్కైరథో నార్ద్రైర్వధమర్హతి దానవః
8-11-38
మయాస్మై యద్వరో దత్తో మృత్యుర్నైవార్ద్రశుష్కయోః .
అతోఽన్యశ్చింతనీయస్తే ఉపాయో మఘవన్ రిపోః
8-11-39
తాం దైవీం గిరమాకర్ణ్య మఘవాన్ సుసమాహితః .
ధ్యాయన్ ఫేనమథాపశ్యదుపాయముభయాత్మకం
8-11-40
న శుష్కేణ న చార్ద్రేణ జహార నముచేః శిరః .
తం తుష్టువుర్మునిగణా మాల్యైశ్చావాకిరన్ విభుం
8-11-41
గంధర్వముఖ్యౌ జగతుర్విశ్వావసుపరావసూ .
దేవదుందుభయో నేదుర్నర్తక్యో ననృతుర్ముదా
8-11-42
అన్యేఽప్యేవం ప్రతిద్వంద్వాన్ వాయ్వగ్నివరుణాదయః .
సూదయామాసురస్త్రౌఘైర్మృగాన్ కేసరిణో యథా
8-11-43
బ్రహ్మణా ప్రేషితో దేవాన్ దేవర్షిర్నారదో నృప .
వారయామాస విబుధాన్ దృష్ట్వా దానవసంక్షయం
8-11-44
నారద ఉవాచ
భవద్భిరమృతం ప్రాప్తం నారాయణభుజాశ్రయైః .
శ్రియా సమేధితాః సర్వ ఉపారమత విగ్రహాత్
8-11-45
శ్రీశుక ఉవాచ
సంయమ్య మన్యుసంరంభం మానయంతో మునేర్వచః .
ఉపగీయమానానుచరైర్యయుః సర్వే త్రివిష్టపం
8-11-46
యేఽవశిష్టా రణే తస్మిన్ నారదానుమతేన తే .
బలిం విపన్నమాదాయ అస్తం గిరిముపాగమన్
8-11-47
తత్రావినష్టావయవాన్ విద్యమానశిరోధరాన్ .
ఉశనా జీవయామాస సంజీవిన్యా స్వవిద్యయా
8-11-48
బలిశ్చోశనసా స్పృష్టః ప్రత్యాపన్నేంద్రియస్మృతిః .
పరాజితోఽపి నాఖిద్యల్లోకతత్త్వవిచక్షణః
8-11-49
ఇతి శ్రీమద్భాగవతే మహాపురాణే పారమహంస్యాం సంహితాయా-
మష్టమస్కంధే దేవాసురసంగ్రామే ఏకాదశోఽధ్యాయః