పోతన తెలుగు భాగవతము

పోతన తెలుగు భాగవతము

అష్టమస్కంధః : దశమోఽధ్యాయః - 10

8-10-1
శ్రీశుక ఉవాచ
ఇతి దానవదైతేయా నావిందన్నమృతం నృప .
యుక్తాః కర్మణి యత్తాశ్చ వాసుదేవపరాఙ్ముఖాః

8-10-2
సాధయిత్వామృతం రాజన్ పాయయిత్వా స్వకాన్ సురాన్ .
పశ్యతాం సర్వభూతానాం యయౌ గరుడవాహనః

8-10-3
సపత్నానాం పరామృద్ధిం దృష్ట్వా తే దితినందనాః .
అమృష్యమాణా ఉత్పేతుర్దేవాన్ ప్రత్యుద్యతాయుధాః

8-10-4
తతః సురగణాః సర్వే సుధయా పీతయైధితాః .
ప్రతిసంయుయుధుః శస్త్రైర్నారాయణపదాశ్రయాః

8-10-5
తత్ర దైవాసురో నామ రణః పరమదారుణః .
రోధస్యుదన్వతో రాజంస్తుములో రోమహర్షణః

8-10-6
తత్రాన్యోన్యం సపత్నాస్తే సంరబ్ధమనసో రణే .
సమాసాద్యాసిభిర్బాణైర్నిజఘ్నుర్వివిధాయుధైః

8-10-7
శంఖతూర్యమృదంగానాం భేరీడమరిణాం మహాన్ .
హస్త్యశ్వరథపత్తీనాం నదతాం నిఃస్వనోఽభవత్

8-10-8
రథినో రథిభిస్తత్ర పత్తిభిః సహ పత్తయః .
హయా హయైరిభాశ్చేభైః సమసజ్జంత సంయుగే

8-10-9
ఉష్ట్రైః కేచిదిభైః కేచిదపరే యుయుధుః ఖరైః .
కేచిద్గౌరముఖైరృక్షైర్ద్వీపిభిర్హరిభిర్భటాః

8-10-10
గృధ్రైః కంకైర్బకైరన్యే శ్యేనభాసైస్తిమింగిలైః .
శరభైర్మహిషైః ఖడ్గైర్గోవృషైర్గవయారుణైః

8-10-11
శివాభిరాఖుభిః కేచిత్కృకలాసైః శశైర్నరైః .
బస్తైరేకే కృష్ణసారైర్హంసైరన్యే చ సూకరైః

8-10-12
అన్యే జలస్థలఖగైః సత్త్వైర్వికృతవిగ్రహైః .
సేనయోరుభయో రాజన్ వివిశుస్తేఽగ్రతోఽగ్రతః

8-10-13
చిత్రధ్వజపటై రాజన్నాతపత్రైః సితామలైః .
మహాధనైర్వజ్రదండైర్వ్యజనైర్బార్హచామరైః

8-10-14
వాతోద్ధూతోత్తరోష్ణీషైరర్చిర్భిర్వర్మభూషణైః .
స్ఫురద్భిర్విశదైః శస్త్రైః సుతరాం సూర్యరశ్మిభిః

8-10-15
దేవదానవవీరాణాం ధ్వజిన్యౌ పాండునందన .
రేజతుర్వీరమాలాభిర్యాదసామివ సాగరౌ

8-10-16
వైరోచనో బలిః సంఖ్యే సోఽసురాణాం చమూపతిః .
యానం వైహాయసం నామ కామగం మయనిర్మితం

8-10-17
సర్వసాంగ్రామికోపేతం సర్వాశ్చర్యమయం ప్రభో .
అప్రతర్క్యమనిర్దేశ్యం దృశ్యమానమదర్శనం

8-10-18
ఆస్థితస్తద్విమానాగ్ర్యం సర్వానీకాధిపైర్వృతః .
వాలవ్యజనఛత్రాగ్ర్యై రేజే చంద్ర ఇవోదయే

8-10-19
తస్యాసన్ సర్వతో యానైర్యూథానాం పతయోఽసురాః .
నముచిః శంబరో బాణో విప్రచిత్తిరయోముఖః

8-10-20
ద్విమూర్ధా కాలనాభోఽథ ప్రహేతిర్హేతిరిల్వలః .
శకునిర్భూతసంతాపో వజ్రదంష్ట్రో విరోచనః

8-10-21
హయగ్రీవః శంకుశిరాః కపిలో మేఘదుందుభిః .
తారకశ్చక్రదృక్ శుంభో నిశుంభో జంభ ఉత్కలః

8-10-22
అరిష్టోఽరిష్టనేమిశ్చ మయశ్చ త్రిపురాధిపః .
అన్యే పౌలోమకాలేయా నివాతకవచాదయః

8-10-23
అలబ్ధభాగాః సోమస్య కేవలం క్లేశభాగినః .
సర్వ ఏతే రణముఖే బహుశో నిర్జితామరాః

8-10-24
సింహనాదాన్ విముంచంతః శంఖాన్ దధ్ముర్మహారవాన్ .
దృష్ట్వా సపత్నానుత్సిక్తాన్ బలభిత్కుపితో భృశం

8-10-25
ఐరావతం దిక్కరిణమారూఢః శుశుభే స్వరాట్ .
యథా స్రవత్ప్రస్రవణముదయాద్రిమహర్పతిః

8-10-26
తస్యాసన్ సర్వతో దేవా నానావాహధ్వజాయుధాః .
లోకపాలాః సహ గణైర్వాయ్వగ్నివరుణాదయః

8-10-27
తేఽన్యోన్యమభిసంసృత్య క్షిపంతో మర్మభిర్మిథః .
ఆహ్వయంతో విశంతోఽగ్రే యుయుధుర్ద్వంద్వయోధినః

8-10-28
యుయోధ బలిరింద్రేణ తారకేణ గుహోఽస్యత .
వరుణో హేతినాయుధ్యన్మిత్రో రాజన్ ప్రహేతినా

8-10-29
యమస్తు కాలనాభేన విశ్వకర్మా మయేన వై .
శంబరో యుయుధే త్వష్ట్రా సవిత్రా తు విరోచనః

8-10-30
అపరాజితేన నముచిరశ్వినౌ వృషపర్వణా .
సూర్యో బలిసుతైర్దేవో బాణజ్యేష్ఠైః శతేన చ

8-10-31
రాహుణా చ తథా సోమః పులోమ్నా యుయుధేఽనిలః .
నిశుంభశుంభయోర్దేవీ భద్రకాలీ తరస్వినీ

8-10-32
వృషాకపిస్తు జంభేన మహిషేణ విభావసుః .
ఇల్వలః సహ వాతాపిర్బ్రహ్మపుత్రైరరిందమ

8-10-33
కామదేవేన దుర్మర్ష ఉత్కలో మాతృభిః సహ .
బృహస్పతిశ్చోశనసా నరకేణ శనైశ్చరః

8-10-34
మరుతో నివాతకవచైః కాలేయైర్వసవోఽమరాః .
విశ్వేదేవాస్తు పౌలోమై రుద్రాః క్రోధవశైః సహ

8-10-35
త ఏవమాజావసురాః సురేంద్రాః
ద్వంద్వేన సంహత్య చ యుధ్యమానాః .
అన్యోన్యమాసాద్య నిజఘ్నురోజసా
జిగీషవస్తీక్ష్ణశరాసితోమరైః

8-10-36
భుశుండిభిశ్చక్రగదర్ష్టిపట్టిశైః
శక్త్యుల్ముకైః ప్రాసపరశ్వధైరపి .
నిస్త్రింశభల్లైః పరిఘైః సముద్గరైః
సభిందిపాలైశ్చ శిరాంసి చిచ్ఛిదుః

8-10-37
గజాస్తురంగాః సరథాః పదాతయః
సారోహవాహా వివిధా విఖండితాః .
నికృత్తబాహూరుశిరోధరాంఘ్రయ-
శ్ఛిన్నధ్వజేష్వాసతనుత్రభూషణాః

8-10-38
తేషాం పదాఘాతరథాంగచూర్ణితా-
దాయోధనాదుల్బణ ఉత్థితస్తదా .
రేణుర్దిశః ఖం ద్యుమణిం చ ఛాదయన్
న్యవర్తతాసృక్స్రుతిభిః పరిప్లుతాత్

8-10-39
శిరోభిరుద్ధూతకిరీటకుండలైః
సంరంభదృగ్భిః పరిదష్టదచ్ఛదైః .
మహాభుజైః సాభరణైః సహాయుధైః
సా ప్రాస్తృతా భూః కరభోరుభిర్బభౌ

8-10-40
కబంధాస్తత్ర చోత్పేతుః పతితస్వశిరోఽక్షిభిః .
ఉద్యతాయుధదోర్దండైరాధావంతో భటాన్ మృధే

8-10-41
బలిర్మహేంద్రం దశభిస్త్రిభిరైరావతం శరైః .
చతుర్భిశ్చతురో వాహానేకేనారోహమార్చ్ఛయత్

8-10-42
స తానాపతతః శక్రస్తావద్భిః శీఘ్రవిక్రమః .
చిచ్ఛేద నిశితైర్భల్లైరసంప్రాప్తాన్ హసన్నివ

8-10-43
తస్య కర్మోత్తమం వీక్ష్య దుర్మర్షః శక్తిమాదదే .
తాం జ్వలంతీం మహోల్కాభాం హస్తస్థామచ్ఛినద్ధరిః

8-10-44
తతః శూలం తతః ప్రాసం తతస్తోమరమృష్టయః .
యద్యచ్ఛస్త్రం సమాదద్యాత్సర్వం తదచ్ఛినద్విభుః

8-10-45
ససర్జాథాసురీం మాయామంతర్ధానగతోఽసురః .
తతః ప్రాదురభూచ్ఛైలః సురానీకోపరి ప్రభో

8-10-46
తతో నిపేతుస్తరవో దహ్యమానా దవాగ్నినా .
శిలాః సటంకశిఖరాశ్చూర్ణయంత్యో ద్విషద్బలం

8-10-47
మహోరగాః సముత్పేతుర్దందశూకాః సవృశ్చికాః .
సింహవ్యాఘ్రవరాహాశ్చ మర్దయంతో మహాగజాన్

8-10-48
యాతుధాన్యశ్చ శతశః శూలహస్తా వివాససః .
ఛింధి భింధీతి వాదిన్యస్తథా రక్షోగణాః ప్రభో

8-10-49
తతో మహాఘనా వ్యోమ్ని గంభీరపరుషస్వనాః .
అంగారాన్ ముముచుర్వాతైరాహతాః స్తనయిత్నవః

8-10-50
సృష్టో దైత్యేన సుమహాన్ వహ్నిః శ్వసనసారథిః .
సాంవర్తక ఇవాత్యుగ్రో విబుధధ్వజినీమధాక్

8-10-51
తతః సముద్ర ఉద్వేలః సర్వతః ప్రత్యదృశ్యత .
ప్రచండవాతైరుద్ధూతతరంగావర్తభీషణః

8-10-52
ఏవం దైత్యైర్మహామాయైరలక్ష్యగతిభీషణైః .
సృజ్యమానాసు మాయాసు విషేదుః సురసైనికాః

8-10-53
న తత్ప్రతివిధిం యత్ర విదురింద్రాదయో నృప .
ధ్యాతః ప్రాదురభూత్తత్ర భగవాన్ విశ్వభావనః

8-10-54
తతః సుపర్ణాంసకృతాంఘ్రిపల్లవః
పిశంగవాసా నవకంజలోచనః .
అదృశ్యతాష్టాయుధబాహురుల్లస-
చ్ఛ్రీకౌస్తుభానర్ఘ్యకిరీటకుండలః

8-10-55
తస్మిన్ ప్రవిష్టేఽసురకూటకర్మజా
మాయా వినేశుర్మహినా మహీయసః .
స్వప్నో యథా హి ప్రతిబోధ ఆగతే
హరిస్మృతిః సర్వవిపద్విమోక్షణం

8-10-56
దృష్ట్వా మృధే గరుడవాహమిభారివాహ
ఆవిధ్య శూలమహినోదథ కాలనేమిః .
తల్లీలయా గరుడమూర్ధ్ని పతద్గృహీత్వా
తేనాహనన్నృప సవాహమరిం త్ర్యధీశః

8-10-57
మాలీ సుమాల్యతిబలౌ యుధి పేతతుర్యచ్చక్రేణ
కృత్తశిరసావథ మాల్యవాంస్తం .
ఆహత్య తిగ్మగదయాహనదండజేంద్రం
తావచ్ఛిరోఽచ్ఛినదరేర్నదతోఽరిణాద్యః

8-10-58
ఇతి శ్రీమద్భాగవతే మహాపురాణే పారమహంస్యాం సంహితాయాం
అష్టమస్కంధే దేవాసురసంగ్రామే దశమోఽధ్యాయః