అష్టమస్కంధః : అష్టాదశోఽధ్యాయః - 18
8-18-1
శ్రీశుక ఉవాచ
ఇత్థం విరించస్తుతకర్మవీర్యః
ప్రాదుర్బభూవామృతభూరదిత్యాం .
చతుర్భుజః శంఖగదాబ్జచక్రః
పిశంగవాసా నలినాయతేక్షణః
8-18-2
సర్వత్ర గోవిందనామసంకీర్తనం గోవింద గోవింద .
శ్యామావదాతో ఝషరాజకుండల-
త్విషోల్లసచ్ఛ్రీవదనాంబుజః పుమాన్ .
శ్రీవత్సవక్షా బలయాంగదోల్లస-
త్కిరీటకాంచీగుణచారునూపురః
8-18-3
మధువ్రతవ్రాతవిఘుష్టయా స్వయా
విరాజితః శ్రీవనమాలయా హరిః .
ప్రజాపతేర్వేశ్మతమః స్వరోచిషా
వినాశయన్ కంఠనివిష్టకౌస్తుభః
8-18-4
దిశః ప్రసేదుః సలిలాశయాస్తదా
ప్రజాః ప్రహృష్టా ఋతవో గుణాన్వితాః .
ద్యౌరంతరిక్షం క్షితిరగ్నిజిహ్వా
గావో ద్విజాః సంజహృషుర్నగాశ్చ
8-18-5
శ్రోణాయాం శ్రవణద్వాదశ్యాం ముహూర్తేఽభిజితి ప్రభుః .
సర్వే నక్షత్రతారాద్యాశ్చక్రుస్తజ్జన్మ దక్షిణం
8-18-6
ద్వాదశ్యాం సవితాతిష్ఠన్మధ్యందినగతో నృప .
విజయా నామ సా ప్రోక్తా యస్యాం జన్మ విదుర్హరేః
8-18-7
శంఖదుందుభయో నేదుర్మృదంగపణవానకాః .
చిత్రవాదిత్రతూర్యాణాం నిర్ఘోషస్తుములోఽభవత్
8-18-8
ప్రీతాశ్చాప్సరసోఽనృత్యన్ గంధర్వప్రవరా జగుః .
తుష్టువుర్మునయో దేవా మనవః పితరోఽగ్నయః
8-18-9
సిద్ధవిద్యాధరగణాః సకింపురుషకిన్నరాః .
చారణా యక్షరక్షాంసి సుపర్ణా భుజగోత్తమాః
8-18-10
గాయంతోఽతిప్రశంసంతో నృత్యంతో విబుధానుగాః .
అదిత్యా ఆశ్రమపదం కుసుమైః సమవాకిరన్
8-18-11
దృష్ట్వాదితిస్తం నిజగర్భసంభవం
పరం పుమాంసం ముదమాప విస్మితా .
గృహీతదేహం నిజయోగమాయయా
ప్రజాపతిశ్చాహ జయేతి విస్మితః
8-18-12
యత్తద్వపుర్భాతి విభూషణాయుధై-
రవ్యక్తచిద్వ్యక్తమధారయద్ధరిః .
బభూవ తేనైవ స వామనో వటుః
సంపశ్యతోర్దివ్యగతిర్యథా నటః
8-18-13
తం వటుం వామనం దృష్ట్వా మోదమానా మహర్షయః .
కర్మాణి కారయామాసుః పురస్కృత్య ప్రజాపతిం
8-18-14
తస్యోపనీయమానస్య సావిత్రీం సవితాబ్రవీత్ .
బృహస్పతిర్బ్రహ్మసూత్రం మేఖలాం కశ్యపోఽదదాత్
8-18-15
దదౌ కృష్ణాజినం భూమిర్దండం సోమో వనస్పతిః .
కౌపీనాచ్ఛాదనం మాతా ద్యౌశ్ఛత్రం జగతః పతేః
8-18-16
కమండలుం వేదగర్భః కుశాన్ సప్తర్షయో దదుః .
అక్షమాలాం మహారాజ సరస్వత్యవ్యయాత్మనః
8-18-17
తస్మా ఇత్యుపనీతాయ యక్షరాట్ పాత్రికామదాత్ .
భిక్షాం భగవతీ సాక్షాదుమాదాదంబికా సతీ
8-18-18
స బ్రహ్మవర్చసేనైవం సభాం సంభావితో వటుః .
బ్రహ్మర్షిగణసంజుష్టామత్యరోచత మారిషః
8-18-19
సమిద్ధమాహితం వహ్నిం కృత్వా పరిసమూహనం .
పరిస్తీర్య సమభ్యర్చ్య సమిద్భిరజుహోద్ద్విజః
8-18-20
శ్రుత్వాశ్వమేధైర్యజమానమూర్జితం
బలిం భృగూణాముపకల్పితైస్తతః .
జగామ తత్రాఖిలసారసంభృతో
భారేణ గాం సన్నమయన్ పదే పదే
8-18-21
తం నర్మదాయాస్తట ఉత్తరే బలేర్య
ఋత్విజస్తే భృగుకచ్ఛసంజ్ఞకే .
ప్రవర్తయంతో భృగవః క్రతూత్తమం
వ్యచక్షతారాదుదితం యథా రవిం
8-18-22
త ఋత్విజో యజమానః సదస్యా
హతత్విషో వామనతేజసా నృప .
సూర్యః కిలాయాత్యుత వా విభావసుః
సనత్కుమారోఽథ దిదృక్షయా క్రతోః
8-18-23
ఇత్థం సశిష్యేషు భృగుష్వనేకధా
వితర్క్యమాణో భగవాన్ స వామనః .
ఛత్రం సదండం సజలం కమండలుం
వివేశ బిభ్రద్ధయమేధవాటం
8-18-24
మౌంజ్యా మేఖలయా వీతముపవీతాజినోత్తరం .
జటిలం వామనం విప్రం మాయామాణవకం హరిం
8-18-25
ప్రవిష్టం వీక్ష్య భృగవః సశిష్యాస్తే సహాగ్నిభిః .
ప్రత్యగృహ్ణన్ సముత్థాయ సంక్షిప్తాస్తస్య తేజసా
8-18-26
యజమానః ప్రముదితో దర్శనీయం మనోరమం .
రూపానురూపావయవం తస్మా ఆసనమాహరత్
8-18-27
స్వాగతేనాభినంద్యాథ పాదౌ భగవతో బలిః .
అవనిజ్యార్చయామాస ముక్తసంగమనోరమం
8-18-28
తత్పాదశౌచం జనకల్మషాపహం
స ధర్మవిన్మూర్ధ్న్యదధాత్సుమంగలం .
యద్దేవదేవో గిరిశశ్చంద్రమౌలిర్దధార
మూర్ధ్నా పరయా చ భక్త్యా
8-18-29
బలిరువాచ
స్వాగతం తే నమస్తుభ్యం బ్రహ్మన్ కిం కరవామ తే .
బ్రహ్మర్షీణాం తపః సాక్షాన్మన్యే త్వాఽఽర్య వపుర్ధరం
8-18-30
అద్య నః పితరస్తృప్తా అద్య నః పావితం కులం .
అద్య స్విష్టః క్రతురయం యద్భవానాగతో గృహాన్
8-18-31
అద్యాగ్నయో మే సుహుతా యథావిధి
ద్విజాత్మజ త్వచ్చరణావనేజనైః .
హతాంహసో వార్భిరియం చ భూరహో
తథా పునీతా తనుభిః పదైస్తవ
8-18-32
యద్యద్వటో వాంఛసి తత్ప్రతీచ్ఛ మే
త్వామర్థినం విప్రసుతానుతర్కయే .
గాం కాంచనం గుణవద్ధామ మృష్టం
తథాన్నపేయముత వా విప్రకన్యాం .
గ్రామాన్ సమృద్ధాంస్తురగాన్ గజాన్ వా
రథాంస్తథార్హత్తమ సంప్రతీచ్ఛ
8-18-33
ఇతి శ్రీమద్భాగవతే మహాపురాణే పారమహంస్యాం సమ్హితాయా-
మష్టమస్కంధే వామనప్రాదుర్భావే బలివామనసంవాదే అష్టాదశోఽధ్యాయః